Read Hadiyya Luqaas Mishiraachcha 2 Bible Online

Luqaas Mishiraachcha 2 - Hadiyya bible

Luqaas Mishiraachcha 2

¹Yohaannis qaramu doollenne Oroo'm uulli adil Agusxoos Qeesaar heer uulli manni hundim kitaabamoo'isina ijaajo fissukko.

²Ee luxxi xigina manni kitaabamu ammane Qeereniwoosa yakkam manchi Sooriy uullina gassaanchi hee'ukko.

³Manni hundim summa kitaabiseena qaramu uulla marukko.

⁴Yooseefim Daawiit moolliinsette ihu bikkina Galiilanne yoo Naazireexxi beero'iinsi ki'aa Yihuxxi uullanne yoo Daawiit beero'o Beeteeliheema

⁵summa kitaabixxeena xeehaa hee'u Maaraamennem marukko.

⁶Ixxuwwi Beeteeliheemanne hee'amonam Maaraame ee ammane lamfoorette hee'llo'i bikkina qattam amman afukkaare

⁷won beeto qatto'o. Ixxuwwina koyyi garoo minenne gattam beyyi bee'u bikkina ciilichchooma eddechchinne xaaxxa'a larina itoo luwwa uwwakkam wongiranne iinsiisso'o.

⁸Ee uullanne ixxuwwika diinate allaattu'uuyyi hiimo biiranne gattam allaaraan hee'llo'o.

⁹Waa'i asse'amaanchi ee allaaraanina moo'amukkaare Waa'ik lombi ixxuwwina caakkukko. Ixxuwwim lobakata baddito'o.

¹⁰Ihukkaarem Waa'i asse'amaanchi ixxuwwina «Oono'o! Manni hundam lobakata liiransoo danaam mishiraachcha ki'nnuwwina eebummi bikkina badditakkotte.

¹¹Kaballa Daawiit beero'onne Gatisaanchi ixxim Moollanni Kiristoos ki'nnuwwina qaramaakko.

¹²Ki'nnuwwina mare'i kane; larina itoo luwwa uwwakkam wongiranne ee ciilichcho eddechchinne xaaxakka'a iinsiisakko'oo moo'llakkamo» yukko.

¹³Ee ammanchom iima'n asse'amaa'n gogot ee asse'amaanchinne maqirem «Iimanenne Waa'ina lombi ihona! Uullanne Waa'i iittoo manni hundinam xummi ihona» yitu'uuyyi Waa'a galaxxitam hee'llo'o.

¹⁴

¹⁵Waa'i asse'amaan ixxuwwiinsi annanni ikka'a iimane daba'llita'a matto'i ammanenne oo allaaraan ixxuwwina'i ixxuwwim «Ki'llehe; Beeteeliheema mallaa Waa'i niina kuru luwwa moo'nnona» yaqqanto'o.

¹⁶Allaaraanim qaqqissa'a matta'a Maaraame, Yooseefaa larina itoo luwwa uwwakkam wongiranne iinse'aakkoo ciilichchoo moo'llo'o.

¹⁷Allaaraanim ciilichcho moo'llo'i ammanenne ciilichchi bikkina Waa'i asse'amaanchi kuru woshsha kutto'o.

¹⁸Allaaraan kutto'i woshsha macceesso'i keen hundim maalalto'o.

¹⁹Ihukkaarem Maaraame ee woshsha hundam is wodanonne amadda'a sawwitam hee'llo'o.

²⁰Allaaraan ixxuwwina kuramukkisam ihaa macceesso'i bikkinaa moo'llo'i bikkinaa Waa'a lonsitu'uuyyii galaxxitu'uuyyii daba'llito'o.

²¹ Am godabonne uumameena illageenim Waa'i asse'amaanchi kurukkisam qaramu sadeenti ayyaamina ballachchamu balla ee ciilichchik summi Yesuusa yama mukko.

²² Muse'i See'llisinne Yooseefii Maaraamee muccuttam amman afukkaare ciilichcho Waa'ina uwwiteena Yerusaaleema massito'o.

²³ Oohim «Luxxeka qaramu won beet Waa'ina keesammi ihaakkoohan ihona» yamamaa Seeranne kitaabamukkane.

²⁴Odim Seer «Lam geex handare'e kitim issitakka'a hincaa'llehe» yaa ijaajukkisam hincaa'lleena matto'o.

²⁵Ee ammane Yerusaaleemanne Simi'oona yakkam manchi hee'ukko. Ixxim Waa'ina garaakkoo er manchi hee'ukko. Keesammi Ayyaan ixxonne hee'ukko. Ixxim Isra'ee'l minaadaba Waa'i gatisoo ayyaamo egeram hee'ukko.

²⁶Moollanna, Kiristoosa moo'oo'n lehoobee'isam Keesammi Ayyaan ixxena kuraa hee'ukko.

²⁷Ixxom Keesammi Ayyaan ki'isukkaare Keesammi Mine marukko. Yooseefii Maaraamee ciilichchina issitona Seer ijaajoo luwwa issiteena Keesammi Mine aaggo'i ammanenne

²⁸Simi'oon ciilichcho ixxi anganne aa'aa qaaphphaa

²⁹«Waa'a! At yittisam kaba ki awwaadaancho eese xumminne aa'e.

³⁰Mashka'oomim at manni hundi illagenne gudissitti ki Gatisaancho i illinne moo'aammo.

³¹

³² Ixxim keese laqqambee'i minaadabina ki woshsha la'isoo caakka. Ki minaadab Isra'eelinam lomba» yaa Waa'a galaxxukko.

³³Ciilichchi annii amaa ciilichchi bikkina Simi'oon wocu woshshanne maalalto'o.

³⁴Simi'oonim ixxuwwa maasse'aa lasage ciilichchi amana Maaraamena «Ku ciilichchi lobakat Isra'ee'l minaadabina gatimminaa bi'imminaa doo'llamaakkoohane. Odim ixxo sabbam keeninam mare'i ihookko.

³⁵Ee'isinne lobakat mannik maaxammi sawwit la'amookko. Kichchechchim ki wodano bisa'isa dereeraa higookko» yukko.

³⁶Ee ammane Aseer moollitan ikkam Faanu'eel landichcho Haanna'a hiraagaanchotte hee'llo'o. Isem baajoommaninne mine issito'i lama'l hiinchina

³⁷isek aro'i lehukkaare mulli goonanne affoo'n sadeentayyee soor hiinchoo hee'llo'ookkotan hee'llo'o. Haanna'a soommanimminnee Waa'a uunximminnee ballaa hiimoo Waa'ina otossitu'uuyyi Keesammi Miniinsi annanni ikkamoyyi hee'llo'o.

³⁸Isem ee ammanchom ixxuwwi beyyo waatta'a Waa'a galaxxito'o. Odim Isra'ee'l minaadaba gatisoo'isa egettam hee'llo'i keenina hundinam Yesuus bikkina kutto'o.

³⁹ Yooseefii Maaraamee Waa'i ijaaju luwwi hundam issita'a guullita'a lasage ixxuwwi hee'llam hee'llo'i beyyo Galiilanne yoo Naazireexxi beero'o daba'llito'o.

⁴⁰Ciilichchim li'ukkuuyyii qoxxukkuuyyii marukko. Lobakat qoor beetom ihukko. Waa'ik maassim ixxonne hee'ukko.

⁴¹ Yooseefii Maaraamee Shaashshiqqi Ugudina Yerusaaleema hiinchina hiinchina mattam hee'llo'o.

⁴²Yesuus qaramukkaanniinsi tommoo lam hiinchoo ihaakkoohaannonne losa'nnisam ugudina Yerusaaleema matto'o.

⁴³Oo ugud beeddaa lasage mine daba'llita'a waattonam Yesuus Yerusaaleemanne gatukko. Yerusaaleemanne gatukkisa ixxi annii amaa laqqo'oyyi hee'llo'o.

⁴⁴Ihukkaarem ixxuwwi «Manninne maqire yookko» yita'a sawwito'i bikkina mat balli goog hundoomam taakke'llo'o. Ee lasage qarmannaannonnee ixxuwwi laqqam manni lambe'ennee hasso'o.

⁴⁵Siidimma hooggo'i ammanenne hassu'uuyyi laso daba'llita'a Yerusaaleema matto'o.

⁴⁶Sas balliinsi lasage losisaaninne maqirem Keesammi Minenne afuuraa macceesukkuuyyii xa'mmichcha xa'mmukkuuyyii siiddo'o.

⁴⁷Ee ixxi woshsha macceesso'i keen hundim ixxi lachchannee dabaru dabachchannee maalalto'o.

⁴⁸Yooseefii Maaraamee Yesuusa moo'llo'i ammanenne maalalto'o. Ixxi ama Maaraame ixxena «I beeto, mahina neese kid issitto? Anii kiyyannii batbatinummuuyyi keese hansam hee'nnummo» yito'o.

⁴⁹Yesuusim ixxuwwina dabaraa «Eese mahina hassakkamuulla? An Iyyanni minenne ihimmi hasisoohan ihukkisa laqqakko'oyyonnihe?» yukko.

⁵⁰Ihukkaarem Yesuus ixxuwwina wocu luwwa ixxuwwi qoossito'oyyo.

⁵¹Ee lasage Yesuus ixxuwwinnem Naazireexxi beero'o daba'llaa marukko. Ixxuwwinam ijaajamam hee'ukko. Ixxi ama ee woshshi hundam is wodanonne amadda'a hee'llo'o.

⁵² Yesuusim Waa'i illagennee manni illagennee nuuraam ihaa uullichchinnee lachchinnee li'ukko.