Read Hadiyya Luqaas Mishiraachcha 20 Bible Online

Luqaas Mishiraachcha 20 - Hadiyya bible

Luqaas Mishiraachcha 20

¹Mat ayyaamo Keesammi Minenne manna Yesuus losisukkuuyyii mishiraachchi sagara kurukkuuyyii hee'onam qeessa awwonsaan, seera losisaanii lommannii mat ikka'a waatta'a Yesuusina

²«At kaka issitoo'isa issukkok ayyette? Te'im kaka issitona kiina malaayye uwwukkok ayyette?» yita'a xa'mmito'o.

³Yesuusim ixxuwwina «Huno'o anim ki'nnuwwa mat xa'mmichcha xa'mmoommo; kullehe.

⁴Manna Yohaannis xammaqoo'isa issukkok Waa'annii manna?» yukko.

⁵Ee ammanenne ixxuwwina'i ixxuwwim «Mayyino? Waa'a yinumlas ‹Eehannah ixxi yukkoka mahina amma'nnitakko'oyyo› yookko.

⁶Manna yinumlas manni hundim hiraagaanchi issaa Yohaannisa amma'nnoo bikkina neese kininne aphphissa'a shitamo» yita'a a'llanta'a

⁷«Ayyeensetda'e ihukkisa lanqoommoyyo» yita'a dabatto'o.

⁸Yesuusim ixxuwwina «Anim ka keeno mah malaayyinne issoommuulda'e ki'nnuwwina kuroommoyyo» yaa dabarukko.

⁹ Minaadabina ka kobi'llishsha Yesuus kurukko. Ixxim «Mat manchi woyina kaasukko. Ee kaasu woyi'n kaashsham abuullaanina uwwaa lobakat ammanina mulli uulla marukko.

¹⁰Oo woyi'n kaashshi annichchim woyi'n misha feerakkam amman afukkaare woyi'n mishika uwwitamisina abuullaa'n beyyo awwaadaancho asse'ukko. Ihukkaarem abuullaan ee awwaadaancho ganta'a kora'i angam daba'lloo'isa issito'o.

¹¹Odim la'mmekam mulli awwaadaancho asse'ukko. Ihukkaarem oo abuullaan ee awwaadaanchom ganta'atii sholliissa'atii kora'i angam dabatta'a hollito'o.

¹²Saxxi korem mulli awwaadaancho asse'ukko. Abuullaanim madissa'a woyi'n kaashshi woriinsi fissita'a uunjito'o.

¹³Ee lasagem oo woyi'n kaashshi annichchi ‹Maha issumta'n e'llookko? Hanqinam iikka lobakata iittoommi beeto asse'ummaare hayditamo› yaa ixxuwwi beyyo asse'ukko.

¹⁴Ihukkaarem oo abuullaan ee beeto moo'lla'a ixxuwwina'i ixxuwwim ‹Lagaanchi kanena'e; lag niihan ihoo'isina ixxo shinona!› yito'o.

¹⁵Ee bikkina ee beeto amadda'a woyi'n kaashshi beyyiinsi biiranne fissita'a shito'o. Eehaara'i oo woyi'n kaashshi annichchi ee abuullaano maha issookko?

¹⁶Ixxim waaraa ee abuullaano shookko. Woyi'n kaashshoomam mulli keenina uwwookko» yukko. Ixxuwwim eekka macceesso'i ammanenne «Eehido'i luwwa Waa'i eeboone» yito'o.

¹⁷ Ixxim ixxuwwa moo'aa «Keesammi Kitaabanne ‹Kininne mine baxxam keen awwaadooyyo» yita'a uunjito'i kinchi hundiinsim lobakata lophphaa awwaadoo kinchi ihukko› yamamaa kitaabamukkok mayyimma?

¹⁸Ayyim ee kinanne ubookkok xaamookko. Ihukkaarem oo kin hanenne ubookkok liitamookko» yukko.

¹⁹Seera losisaanii qeessa awwonsaanii kobi'llishshinne Yesuus ixxuwwa acceeqasukkisa laqqo'i bikkina ee ammanem ixxo amaddeena hasso'o. Ihukkaarem minaadaba baddito'i bikkina utto'o.

²⁰Ee lasage gassimmi malaayyii daannoomii yoo Oroo'm uulli gassaanchina higissa'a uwwimmina makka hassam hee'llo'o. Ee bikkina er manna labbu'uuyyi Yesuus wocoo wocanne huushancha siiddeena egettam manna Yesuus beyyo asse'llo'o.

²¹Oo asse'anto'i keenim Yesuus beyyo matta'a «Losisaancho! At woccoo woshshii losissoo losishshii hanqo'an ihukkisa lanqoommo. Odim Waa'i googo hanqo'isinne losisimmiinsi bagaan mannika miine moo'lloobee'isa lanqoommo.

²²Ni See'llisanne Oroo'm uulli adilina gibiro minqonnii minqoone?» yito'o.

²³Ihukkaarem Yesuus ixxuwwika hantaaro la'aa

²⁴«Huno'o, diinaarooma moo'oommo keyye eebbehe» yukko. Ixxim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o.

²⁵Yesuusim ixxuwwina «Eehaara'i Qeesaarinam ihu luwwa Qeesaarinam uwwehe. Waa'an ihu luwwa Waa'inam uwwehe» yukko.

²⁶Ixxuwwim ixxi dabaru dabachchanne maalalta'a cawwita'a utto'o bagaan Yesuus wocu wocanne minaadaphphi illagenne huushancha siiddeena xanto'oyyo.

²⁷ «Manni lehaa lasage ki'ooyyo» yitam Saduuqaawe'uwwiinsi mat qax manni Yesuus beyyo waatta'a

²⁸ «Losisaancho! Muse'e niina ‹Mat manchi meentichcho eebaa ooso qaroo'nnim lehulas ixxi abbaayyi ee meentichcho lago gassaa ee lehukkaannina shumo'i ihoo ooso qarimmi hasisookko› yaa kitaabaakko.

²⁹Mat ammane lamar abbaayyuwwi hee'llo'o. Ee abbaayyuwwiinsim won beet meentichcho eebaa ooso qaroo'nnim lehukko.

³⁰Ee lasage wona awwonaanchi ee meentichcho laggassukko.

³¹Ee lasage odim saxxekim laggassukko. Ee'isinne lamarem abbaayyuwwim ee meentichcho gassita'a ooso qattoo'nnim leto'o.

³²Ee lasage isem leto'o.

³³Eehaare isa'i lamarannem affo'ookko leto'i keen lehiinsi ki'llam ayyaamo hinkannitan ikkamo?» yita'a xa'mmito'o.

³⁴Yesuusim ixxuwwina dabaraa «Uullanne yo'i manni eebbamoo ladiissamoo.

³⁵Ihukkaarem lehiinsi ki'imminaa lehiinsi ki'akka'a lasage hee'akkam doollenne hee'imminaa labbam keen eebbamoyyoo ladiissamoyyoo.

³⁶Lehiinsi ixxuwwi ki'llo'i bikkina Waa'i asse'amaa'nnisa ikkamo bagaan letamoyyo. Oo lehiinsi ki'llo'i keen Waa'i ooso.

³⁷ Odim giir aphpham hee'u shif aganna Muse'e kitaabu ammane Moollanni Waa'ina ‹Abrihaam Waa'a, Yisaaq Waa'aa Yaaqoob Waa'aa› yimminne Waa'i lehu keeno lehiinsi ki'isoo'isa caakkisaa kuraakko.

³⁸Waa'ina hundim fooraam ihaa hee'oohan ihu bikkina Waa'i hee'oo kee'n Waa'a bagaan lehu kee'n Waa'ayyo» yaa dabarukko.

³⁹Seera losisaa'nnek mat mat keen «Losisaancho! Danaam dabachcha dabattaatto» yito'o.

⁴⁰Ee lasage ixxuwwi mulli xa'mmichcha xa'mmiteena iggito'oyyo.

⁴¹Yesuus ixxuwwina «Manni ‹Kiristoosa Daawiit beeto› yookkok mahinatte?

⁴² Daawiit ixxi gagim Mazmuu'l Kitaabanne ‹Waa'i i Moollannina «Ki diina'a ki lokkiinsi woroon isseembe'e

⁴³I makkanne afuure» yaakko› yukko.

⁴⁴Eehaara'i Daawiit ixxi gagim Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yaa xa'mmukko.

⁴⁵Minaadab hundim macceesonam Yesuus ixxi losaanina

⁴⁶«Seera losisaano ege'llehe. Ixxuwwi qeeraa'l eddechcha edde'lla'a do'imma, meeranne manni ixxuwwa xummaatisona, wixxixxi minneewwannem hundiinsim e'lloo beyyonne afuuchchaa maadda itteena afuuttam ammanem lombi beyyonne afuurimmaa iittitam keeno.

⁴⁷Odim ixxuwwi qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggam keeno. Ee bikkina ixxuwwanne afoo oogato'i kee'mmaalla» yukko.