Read Hadiyya Luqaas Mishiraachcha 21 Bible Online

Luqaas Mishiraachcha 21 - Hadiyya bible

Luqaas Mishiraachcha 21

¹Keesammi Minenne diinate uwwakkam mu'utanne goddaan diinate issukkuuyyi Yesuus asi'mmaa moo'ukko.

²Mat buxichchi busara lam saantiba ee mu'utanne issito'o.

³Yesuusim «Hanqinam an ki'nnuwwina kuroommo; tu buxichchi busara ka mu'utanne issito'i diinat mulli keen hundim issito'aanniinsi lobane.

⁴Mashka'oomim mulli keen hundim uwwito'ok ixxuwwina ihaa gatukkaanniinsette. Ihukkaarem ise ma'lluchchim bee'i buxichchotte ikka'a isena yoo qaxichcho hundichchom uwwito'o» yukko.

⁵Mat mat manni «Ka Keesammi Mine mishisoo kininnee Waa'ina uwwakko'i mu'utinnee wereeggisakka'a baxakko'is hinkaa'nna mishisoolla?» yita'a wocco'o.

⁶Yesuusim ixxuwwina dabaraa «Ka moo'llakkam mi'nnek kin ki'n hanenne ihaa baxamukkok mat kinchim gatoo'n gindamaa uboo balli waarookko» yukko.

⁷Ixxuwwim Yesuusina «Losisaancho! Kuk ihookkok hinki ammane? Iheena hincukkisa moo'isoo mare'i maruchcho?» yita'a xa'mmito'o.

⁸Yesuusim ixxuwwina dabaraa «Ayyim ki'nnuwwa huushansoobee'isa ege'llehe! Lobakat keen ‹Kiristoos anette; doollim afaakko› yitu'uuyyi waattamo. Ee keeno awwontakkotte.

⁹Odim orii hambalaachchii gaassaa ihimmi hasisoohan ihu bikkina eekka macceessakkam ammane baa'llakkotte. Ihukkaarem lasaanchi afukkoyyome.

¹⁰Yesuus odim ixxuwwina «Minaadab minaadabanne adilim adilanne ki'ookko.

¹¹Malaayyaam uulli huxechchi, annanni annanni beyyonne qaanne'ii boobanii ihookko. Iimaniinsim baddisoo luwwii maalalsiisoo mare'ii moo'amookko.

¹²Ihukkaarem oo woshshi iheena illageen i summi bikkina ki'nnuwwa amadakka'a hawwisakkamo. Dummichchinaa karatinaa higisakka'a uwwakkamo. Odim adilluwwi illagennee gassaa'n illagennee hincaa'akkamo.

¹³Oohim i bikkina kuttakkamisina danaam amman ihookko.

¹⁴ Ee bikkina xa'mmantakkam xa'mmichchina ‹Maha daballoommo› yitakka'a hawwitakkotte.

¹⁵Anim ki'nnuwwi maso'uwwik ayyim ki'nnuwwinne uullixxameena te'im gafe'ameena xanoobee'i woccakkam sagaraa qooroomaa uwwoommo.

¹⁶Ki'nnuwwik anno'i, amo'i, abbaayyuwwi, qarmannii beshshuwwii gattoo'n ki'nnuwwa higissa'a uwwitamo. Ki'nnuwwiinsim mat mat keeno shitamo.

¹⁷I mashka'inne manni hundim ki'nnuwwa sabookko.

¹⁸Ihukkaarem ki'nnuwwi horoo'l saraatik matichchim bi'ooyyo.

¹⁹Ki'nnuwwim xa'nnimminne ki'nnuwwi foore gatixxitakkamo.

²⁰«Yerusaalee'm beero'i diina'inne kibbamaa moo'llakkam ammane bichchina hincukkisa laqqehe.

²¹Ee ammane Yihuxxi uullanne yo'i keen duunnuwwanne gibbona. Ee beero'onnem yo'i keen beero'iinsi fitta'a gibbona. Odim beero'iinsi tochchi uullanne yo'i keenim beero'o aaggoone.

²² Mashka'oomim Keesammi Kitaabanne kitaabamukkok wo'mmoo'isina oo ayyaam Waa'i baado miqisoo ayyaamo.

²³Ka uullanne kee'mmaalli hawwi ihoo bikkinaa ka minaadabanne Waa'i quunqi dilloo bikkinaa ee ammane lamfoor meentinaa iicisaaninaa aayye!

²⁴Ixxuwwiinsim mat qax bisa'inne beedditamo. Qeefadanta'atim mulli minaadaphphi lambe'ennem binnitamo. Ixxuwwina uwwamu doolli beeddeebe'i afeebe'e mulli minaadab Yerusaalee'm beero'o hance'lla'a gassitamo.

²⁵ «Eelliinchonne, aganannee boollaankannee maalalsiisoo mare'i ihookko. Uulli minaadab hundim dambalaqikaa womoo'llekaa baddisoo guga macceessa'a u'nnantamo.

²⁶Iima'n malaayyuwwi heekke'oo bikkina uullanne ihoo luwwa moo'imminne baa'aa mannik tiir bi'ookko.

²⁷ Ee lasage Manchi Beet malaayyinnee lobakat lombinnee ihaa duubinne waarukkuuyyi moo'llamo.

²⁸Oo luwwi hundim ihukkuuyyi moo'llakkam ammane Waa'i ki'nnuwwa gatisoo ayyaam hincu bikkina xabbitakka'a iim moo'llehe» yukko.

²⁹Yesuusim ixxuwwina kobi'llishshinne «Oda'aa mulli haqqaa moo'llehe.

³⁰Oo oda'ii mulli haqqii lataa moo'llakkam ammane billi hincukkisa laqqakkamo.

³¹Ee'isam oo luwwi ihukkuuyyi moo'llakkam ammane Waa'i adillan hincukkisa laqqakkamo.

³²Hanqinam an ki'nnuwwina kuroommo; ku luwwi hundim iheebe'i afeebe'e ku qaranchi higooyyo.

³³Iimanii uullii higookko. Ihukkaarem i sagar hore'em higooyyo.

³⁴«Oo balli dangonnem qaashisa amadoobee'isa hundi luwwam abdaadakku'uuyyi hasakko'isa hee'imminne, dimbimminnee ka uulli heechchina hawwimminnee ki'nnuwwi wodan hoogoobee'isa qoxxitakka'a ki'nnuwwi gaga ege'llehe.

³⁵Mashka'oomim oo balli uullanne hee'oo minaadab hundam qaashisa amadookko.

³⁶Ihukkaarem ee afoo luwwi hundam qoxxitakka'a higimminaa Manchi Beet illagenne uullimminaa hundi ammanem Waa'a uunxatonne qoxxehe» yukko.

³⁷ Yesuusim ballina ballina Keesammi Minenne losisam hee'ukko. Ihukkaarem hiim hiimo Wee'l duunanne firaa garam hee'ukko.

³⁸Minaadab hundim ixxi losisoo losishsha macceesseena soodaraarom Keesammi Mine waattam hee'llo'o.