Read Hadiyya Luqaas Mishiraachcha 22 Bible Online

Luqaas Mishiraachcha 22 - Hadiyya bible

Luqaas Mishiraachcha 22

¹ Shaashshiqqi Uguda yakkam Qorosho'i Uguxxi balli hincaa hee'ukko.

²Qeessa awwonsaanii Seera losisaanii Yesuusa shiteena manna baddito'i bikkina hinkid issita'a shitamda'e e'lloo googo hassam hee'llo'o.

³Ee lasage tommiinsii lam losaaniinsii mat hee'u Asqorotokkichchi Yihudanne Sheexaanchi aagukko.

⁴Ixxim qeessa awwonsaaninnee Keesammi Mine egettam keeninnee Yesuusa ixxuwwina hinkid issaa uwwooda'e a'llamukko.

⁵Ixxuwwim liiranta'a diinate uwwiteena iittanto'o.

⁶Yihudim ee woshshanne iittamaa manni bee'i beyyonne higisaa uwweena makki ammane hasam hee'ukko.

⁷Shaashshiqqi Ugudina geex ambula durakkam Qorosho'i Uguxxi balli afukko.

⁸Ee bikkina Yesuusim Pheexiroosaa Yohaannisaa «Mattakka'a uguxxi hurbaata intona gudissehe» yaa asse'ukko.

⁹Ixxuwwim ixxena dabatta'a «Uguxxi hurbaata hannonne gudinso?» yita'a xa'mmito'o.

¹⁰Yesuusim ixxuwwina dabaraa «Oono'o! Mattakka'a beero'o aaggakkam ammane wo'i harachcho iyyaakkoo mat manchinne edantakkamo. Oo manchi aagoo mine awwontakka'a aaggehe.

¹¹Ee mi'n annichchinam ‹Losisaanchi «I losaaninne maqirem uguxxi hurbaata itoommi koyyi min hannonnette?» yoolla› yi'llehe.

¹²Oo mi'n annichchim hundem luwwim gudaakkoo haraar mine fooqanne moo'isookko; eekke'enne gudissehe» yukko.

¹³Ixxuwwim Yesuus kurukkisam luwwi hundim ihaa siiddo'o; Shaashshiqqi Uguxxi maaddi hurbaatam ee beyyonne gudisso'o.

¹⁴Hurbaata itakkam amman afukkaare Yesuus ixxi asse'amaaninne maqirem hurbaata iteena afuurukko.

¹⁵Yesuusim ixxuwwina «An hawwonne aageena illageen ki'nnuwwinne maqire ka uguxxi hurbaata iteena lobakata mixam hee'ummo.

¹⁶An ki'nnuwwina kuroommo; ka uguxxi hurbaaxxek tirat Waa'i adillanonne caakkaa la'ameebe'e ka lasage uguxxi hurbaata hore'em itoommoyyo» yukko.

¹⁷Ee lasage Yesuus humbullonne yoo woyi'n diqaasa ki'isaa amadaa Waa'a galaxxukko. Ixxim «Hii'nnehe; kaka ki'nnuwwi baxxammehe.

¹⁸An ki'nnuwwina kuroommo; kabadiinsi ki'isaa Waa'i adillan waareebe'e woyi'n mishiinsi ciinsamu diqaasa agoommoyyo» yukko.

¹⁹Odim qorosho'om ki'isaa amadaa Waa'a galaxxukko. Ee qorosho'om iiqaa ixxi losaanina «Kuk ki'nnuwwina uwwamu i maara; ki'nnuwwi kaka eese tiirimmina issehe» yaa uwwukko.

²⁰ Ee'isam hii'm hurbaata itta'a lasage humbullonne yoo woyi'n diqaasam ki'isaa amadaa «Kuk ki'nnuwwi bikkina dunamoo i xiiginne wo'mmoo haareechchi hidiro.

²¹ «Oono'o! Eese higisaa uwwoo manchi ka maaddanne iinninne maqirem itoolla.

²²Manchi Beeta'i yamamukkisam lehookko; ihukkaarem ixxo higisaa uwwoohaannina aayye!» yukko.

²³Ee bikkina ixxuwwina'i ixxuwwim «Ni woriinsi kaka issookkok ayyette?» yita'a xa'mmaqancha asheetto'o.

²⁴ Losaanim issena'i issem «Niinniinsi lophphookkok ayyette?» yita'a fitanto'o.

²⁵ Yesuusim ixxuwwina «Mulli minaadaphphi adilluwwi minaadabanne moollannooma moo'ixxitamo. Ee minaadaphphi gassaanim minaadabina eroomma issitam keeno yamantamo.

²⁶ Ihukkaarem ki'nnuwwi ee'isa ikkakkotte. Ki'nnuwwi lambe'iinsi loban ihookkok hoffan ihona. Moollanni ihookkokim awwaadaanchi ihona.

²⁷ Afuuraa itoohaanniinsii uullaa itisoohaanniinsii hinki lobane? Lophphookkok afuuraa itoohaneyyonnihe? Ee'isam an ki'nnuwwi lambe'enne awwaadaanchisa.

²⁸«Eesenne afu hawwonne hundannem ki'nnuwwi iinninne maqirem qoxxitakka'a uullitakko'ookko.

²⁹Iyyanni iina gassimmi malaayye uwwukkisam anim ki'nnuwwina gassimmi malaayye uwwoommo.

³⁰ Ki'nnuwwim i adillanonne maaddiinsi ittakkamoo aggakkamoo. Odim adilla'n barcumanne afuuttakka'a tommonnee lamem Isra'ee'l sullonnee oogattakkamo» yukko.

³¹Moollannim «Simi'oona, Simi'oona! Oono'o! Sheexaanchi ki'nnuwwa arasisa ufeeseena xa'mmaakko.

³²Ihukkaarem at ki amma'nnatiinsi ubboobee'isa an ki bikkina Waa'a uunxaammo. At saxxitaa daba'llitti ammane kiyyabbaayyuwwa qoxxise» yukko.

³³Pheexiroosim Yesuusina «Moollanna! An kiinninne maqire karameenaa leheenaa gudaammo» yukko.

³⁴Yesuusim ixxena «Pheexiroosa, an kiina kuroommo; at ‹Ixxo la'oommoyyo› yitaa eese sas kore laggeebe'e ka hiimo antabaa'i muunooyyo» yukko.

³⁵ Ee lasage Yesuus ixxi losaanina «An ki'nnuwwa gonoona, canaa caamma'aa amaddakkoo'nnim asse'ummi ammane ki'nnuwwina mah hanqatukko?» yaa xa'mmukko. Ixxuwwim «Mahim hanqatukkoyyo» yita'a dabatto'o.

³⁶Yesuusim ixxuwwina dabaraa «Ihukkaarem kaba gonoon yookkok gonoonam amaxxona. Can yookkokim cana amaxxona. Bisa'i bee'ekim eddechcha biteesaa mat bisa'a bita'llona.

³⁷ An ki'nnuwwina kuroommo; ‹Boqqi keeninne xigamukko› yamamaa kitaabamu woshshi eesenne wo'mmimmi hasisookko. Mashka'oomim i bikkina kitaabamu woshshi hundim wo'mmoo'isinatte» yukko.

³⁸Ixxuwwim «Moollanna! Moo'e; kuno'o, lam bisa'i keyye yookko» yito'o. Yesuusim ixxuwwina dabaraa «Ihookko» yukko.

³⁹Yesuusim beero'iinsi firaa eraare losukkisam Wee'l duuna firukko. Ixxi losaanim ixxo awwonta'a matto'o.

⁴⁰Wee'l duuna afaa ixxi losaanina «Keennaanchonne aaggakkambee'isa Waa'a uunxehe» yukko.

⁴¹Ixxim ixxuwwiinsi kina huushakka'a afisakkamqax beyyo qee'llaa maraa guruphphaa

⁴²«Iyyanna! Ki doo'l ihulas ka hawwi humbullo at iinniinsi higise. Ihukkaarem i doo'llisa ihoo'n ki doo'llisa ihona» yaa Waa'a uunxukko.

⁴³Ee ammanem Waa'i asse'amaanchi iimaniinsi waaraa ixxo qoxxisukkuuyyi ixxena moo'amukko.

⁴⁴Ixxim u'nnanne hee'u bikkina qoxxaa Waa'a uunxukko. Ixxeensi firoo biincim xiiqqisa uullanne daadam hee'ukko[30].

⁴⁵Waa'a uunxatiinsi ki'aa losaa'n beyyo maru ammanenne losaan kichchechchiinsi ki'ukkok diriitta'a hee'llo'o.

⁴⁶Ixxim dabaraa «Mahina diriittakkamuulla? Keenanchanne aaggakkambee'isa baqitakka'a Waa'a uunxehe» yukko.

⁴⁷Yesuus woconam ixxi losaa'nnek tommiinsii lamiinsii mat hee'u Yihud awwonsaakkoo dut manni waarukko. Ixxim Yesuusa suunqeena hincukko.

⁴⁸Ihukkaarem Yesuus ixxena «Yihuda, Manchi Beeto suunqimminne higissaa uwwitoohonnihe?» yukko.

⁴⁹Woshshika duuha'a ixxi losaan moo'llo'i ammanenne «Moollanna! Ka manna bisa'inne aphphinsonnihe?» yito'o.

⁵⁰Ixxuwwiinsim mat manchi hundiinsi lob qeessichchina awwaadaanchika makki kolli macce aphphisaa murukko.

⁵¹Ihukkaarem Yesuus «Od la'mmeka eddoobee'isa»[31] yaa ee awwaadaanchika macce amadaa fayyiisukko.

⁵²Ee lasage ixxo amaddeena waatto'i qeessa awwonsaano, Keesammi Mine egettam keeno, ijaajaanoo lommannaa «Fanga amadakkamisa eese amaddakkeena bisa'aa mugaa amaddakka'a waattakko'onnihe?

⁵³ An ballina ballina Keesammi Minenne ki'nnuwwinne hee'ummuuyyi amaddakko'oyyo. Ihukkaarem ku amman ki'nnuwwanee tuunsi gassaanchanee» yukko.

⁵⁴Ee lasage oo manni Yesuusa amadda'a hundiinsi lob qeessichchi mine massito'o. Pheexiroosim qee'llonne ihaa awwonam hee'ukko.

⁵⁵Ixxuwwim qash woro'l lambe'enne giira giitta'a iibbixxiteena wixxita'a afuutto'aare Pheexiroosim ixxuwwinnem afuurukko.

⁵⁶Ee lasage ixxim gii'l caakkanne afuuraakkoohaannonne mat awwaadaancho ixxo qoossita'a moo'lla'a «Ku manchim ixxenne maqire hee'ukko» yito'o.

⁵⁷Pheexiroosim «Meentichche, an ixxo la'oommoyyo» yaa lagukko.

⁵⁸Odim hofqax ammaniinsi lasonne mat manchi «At ixxuwwiinsi mato» yukko. Ihukkaarem Pheexiroos «Mancho, aneyyo» yaa dabarukko.

⁵⁹Mat sa'aata ihooqax ammaniinsi lasage mulli manchim «Hanqinam ku manchi Galiiliinsette ihu bikkina ixxenne maqire yoohane» yaa qoxxisaa wocukko.

⁶⁰Ihukkaarem Pheexiroos «Mancho, at yitoottoka an la'oommoyyo» yukko. Ee ammanchom Pheexiroos woconam antabaa'i muunukko.

⁶¹Moollanni Yesuusim Pheexiroosa daba'llaa moo'ukko. Pheexiroosim «Kaballi hiimo antabaa'i muuneebe'e sas kore eese laggootto» yaa Moollanni kuru woshsha tiirukko.

⁶²Ee lasage ixxim ee beyyiinsi firaa shikkaa wi'llukko.

⁶³Ee ammane Yesuusa amadda'a hee'llo'i manni ganimmaa ixxonne naacimmaa asheetto'o.

⁶⁴Odim ixxeka ille katta'a aphphissu'uuyyi «Keese aphphisukkok ayyetda'e huno'o, la'e?» yita'a xa'mmitam hee'llo'o.

⁶⁵Lobakat mulli game'llaxxi sagalluwwam woccam hee'llo'o.

⁶⁶Uulli soodaa lasage minaadaphphi lommanni, qeessa awwonsaanii Seera losisaanii mat ikka'a Yesuusa ixxuwwi dummichchi beyyo massita'a

⁶⁷«At Kiristoosatte ikkaattoolas niina kure» yita'a xa'mmito'o. Ihukkaarem ixxi ixxuwwina dabaraa «Ki'nnuwwina kurummaarem eese amma'nnitakkamoyyo.

⁶⁸An ki'nnuwwa xa'mmumta'nnim dabattakkamoyyo.

⁶⁹Ihukkaarem kabadiinsi ki'isaa Manchi Beet hundam xanoo Waa'i makkanne afuurookko» yukko.

⁷⁰Ixxuwwi hundim dabatta'a «Eehaare at Waa'i Beetonnihe?» yito'o. Ixxim ixxuwwina dabaraa «Eeyya, ki'nnuwwi yitakko'isame» yukko.

⁷¹Ixxuwwim «Neese ni gagima'i ixxi suumiinsi macceensummo; kanniinsi lophphoo naqaash niina mahina hasisookko?» yito'o.