Read Hadiyya Luqaas Mishiraachcha 23 Bible Online

Luqaas Mishiraachcha 23 - Hadiyya bible

Luqaas Mishiraachcha 23

¹Eehe'e wixxaa hee'u manni hundim ki'aa Yesuusa Philaaxoos beyyo massaa

²«Ku manchi ni minaadabina boqqooma losisukkuuyyi, ‹Oroo'm uulli adilina gibiro uwwitakkotte› yukkuuyyii ‹An adil Kiristoosatte› yukkuuyyii siindaammo» yita'a kasasso'o.

³Ee lasage Philaaxoos «At Ayihuxxi manni adilannihe?» yaa xa'mmukkaare Yesuus «At yittisame» yaa dabarukko.

⁴Odim Philaaxoos qeessa awwonsaaninaa minaadabinaa «An ka manchonne matem bi'ishsham siidummoyyo» yukko.

⁵Ihukkaarem ixxuwwi qoxxissa'a «Ku manchi Galiiliinsi ki'isaa ka beyyonne afeebe'e manna losisukkuuyyi Yihuxxi uulli manni hundam adilanne ki'isoolla» yito'o.

⁶Galiila yoo sagara Philaaxoos macceesu ammanenne «Ku manchi Galii'l uulli manchonnihe?» yaa xa'mmukko.

⁷Ixxim Yesuus Heeroodis gassoo uullan ihukkisa la'u ammanenne Heeroodis beyyo Yesuusa asse'ukko. Heeroodis ee ammane Yerusaaleemanne hee'ukko.

⁸Heeroodisim Yesuusa moo'eena lobakata mixam hee'u bikkina moo'u ammanenne lobakata liiramukko. Mashka'oomim Yesuus bikkina macceesaa mat mat mare'e issukkuuyyi moo'eena neeyyato issaa hee'u bikkinatte.

⁹Ee bikkina Heeroodis dut xa'mmichcha Yesuusa xa'mmukko. Ihukkaarem Yesuus maham dabarukkoyyo.

¹⁰Qeessa awwonsaanii Seera losisaanii Heeroodis illagenne uullita'a qoxxissa'a kasassam hee'llo'o.

¹¹Ee lasage Heeroodis ixxi gaadaaninnem mat ihaa sholliisaatii ixxonne naacaatii wereeggisakka'a baxakko'oo mishisoo eddechcha eddeesaa Philaaxoos beyyo dabaraa asse'ukko.

¹²Heeroodisii Philaaxoosii ee ayyaamom beshshuwwi ikko'o. Eehanniinsi illageen ixxuwwi lambe'enne maso'oom hee'ukko.

¹³Ee lasage Philaaxoos qeessa awwonsaano, uulli gassaanoo minaadabaa mat issaa weeshaa

¹⁴«Ki'nnuwwi ka mancho ‹Minaadabina boqqooma losisoohane› yitakka'a i beyyo eebbakko'ookko. Oono'o! Ki'nnuwwi ixxo kasassakko'i woshshina ki'nnuwwi illagenne saarayyaa moo'aa ixxonne mat bi'ishsham siidummoyyo.

¹⁵Heeroodisim ixxonne maham siidubee'i bikkina woddaa'i ni beyyom asse'aakko. Oono'o! Shisiisoo luwwa maham issukkoyyo.

¹⁶Ee bikkina an ixxo ganaa tiroommo» yukko.

¹⁷Shaashshiqqi Ugudanne Philaaxoos ixxuwwina mat mancho tirimmi hasisoohanem hee'ukko.

¹⁸Ihukkaarem ixxuwwi hundim «Ka mancho hoore! Niina Barbaana tire!» yita'a shuutto'o.

¹⁹Barbaan beero'i woronne adilanne manna ki'isimminnee manna shimminnee karamaakkoohan hee'ukko.

²⁰Philaaxoos Yesuusa tireena hasaa la'm korem minaadabina wocukko.

²¹Ihukkaarem ixxuwwi «Ixxo saqale! Saqale!» yita'a shuutto'o.

²²Saxxaaggem Philaaxoos «Mahinatte? Ku manchi maha bi'isaate? An ixxo shisiisoo bi'ishsha ixxonne siidummoyyo. Ee bikkina an ka mancho ganaa tiroommo» yukko.

²³Ihukkaarem ixxuwwi saqalamoo'isina shuurimminne qoxxissa'a xa'mmito'o. Ixxuwwi shuurimmim wodukko.

²⁴Ee bikkina Philaaxoos ixxuwwi xa'mmito'i woshshi ihoo'isina oogatukko.

²⁵Manna shaatii adilanne manna ki'isaatii karamaa hee'u mancho tiramoo'isina xa'mmito'isinnem tirukko. Ihukkaarem ixxuwwi hasso'isa issitona Yesuusa ixxuwwina higisaa uwwukko.

²⁶Yesuusa massitonam Qaareena yakkam uullik mat Simi'oona yakkam manchi uulliinsi beero'o waaronam amadda'a masqala iyyiissa'a Yesuusa awwonoo'isa issito'o.

²⁷Odim lobakat minaadabim Yesuusa awwontam hee'llo'o. Ee minaadaphphi lambe'iinsi meenti lobakata kichche'lla'a biqe aphphixxitu'uuyyi wi'llitam hee'llo'o.

²⁸Ihukkaarem Yesuus ee meenti kollonne daba'llaa «Yerusaalee'm meento, ki'nnuwwi ki'nnuwwi gaginaa ki'nnuwwi oosinaa wi'llehe bagaan iina wi'llitakkotte.

²⁹Mashka'oomim ‹Alceennuwwi, qarubee'i godabbuwwii iicisubee'i anuunnuwwii maassaammuwwa› yakkam balli waaroolla.

³⁰ Ee ammane manni duunnuwwa ‹Ni hanenne ubbehe› hoffi duunnuwwa ‹Neese maaxxehe› yookko.

³¹Aashaalli haqqichcho ka'isa issitolas gogaalli haqqichchi maha ihookko?» yukko.

³²Odim jora baxxo'oo lam mulli mannam Yesuusinne edda'a shiteena massito'o.

³³Ixxuwwim Horoo'l Qooma yakkam beyyo affa'a lasage Yesuusa saqalto'o. Jora baxxo'i keenom matoo makkinne matoo qeddinne saqalto'o.

³⁴ Yesuusim «Iyyanna! Ixxuwwi issitamoka laqqambee'i bikkina ixxuwwina haafihe» yukko. Ixxuwwim Yesuusika eddechcha baxxanteena saamo fissito'o.

³⁵Odim minaadab uullita'a moo'llu'uuyyi ixxuwwi gassaan «Waa'i doo'llaakkoo Kiristoosatte ihulas mulli keena'i gatisukko. Huno'o, ixxi gagam gatixxona» yita'a naaccam hee'llo'o.

³⁶ Odim gaadaanim hincita'a shiishaakkoo woyi'n diqaasa uwwitu'uuyyi

³⁷«At Ayihuxxi adil ikkaattoolas ki gaga gatixxe» yita'a naaccam hee'llo'o.

³⁸Odim ixxi horoo'l aganne «Kuk Ayihuxxi adila» yoo sagar kitaabamaa hee'ukko[32].

³⁹Jora baxxa'a ixxenne saqalanto'i keeniinsi mat «At Kiristoosatteyyonnihe? Oono'o! Ki gagaa neesee gatise» yaa game'llukko.

⁴⁰Ihukkaarem saqalanto'i keeniinsi la'mmek «Atim ixxesam oogato'o aa'llitti bikkina Waa'a badditooyyonnihe?

⁴¹Neese issinummi baxina hasisookkoka aa'nnoommuulli ihu bikkina niikka'i hanqo'i oogato'o. Ihukkaarem ku manchi maham bi'isubee'i mancho» yaa quuqukko.

⁴²Ixxim Yesuusina «Yesuusa! At ki adillanonne eese xadditte!» yukko.

⁴³Yesuusim ixxena «Hanqinam an kaballa kiina kuroommo; at iinninne maqire Gannattanne ikkootto» yukko.

⁴⁴Oo amman loh sa'aata ihooqax ammane hee'ukko. Ee ammaniinsi ki'isaa honsi sa'aat afeebe'e uulli hundim tuunsukko.

⁴⁵ Eelliinchi tuunsukkisam Waa'i mi'nnek du'm eddechchi lam ihaa dereeramukko.

⁴⁶ Yesuusim sagara iimaa'aa «Iyyanna! I foore ki anganne higisaa uwwaammo!» yaa laaraa lehukko.

⁴⁷Xibbi halaqichchi ee ihu luwwa moo'u ammanenne «Hanqinam ku manchi muccura» yaa Waa'a lonsukko.

⁴⁸Odim eekka moo'lleena wixxito'i minaadab hundim ihu luwwa moo'lla'a biqe aphphixxitu'uuyyi mine daba'llito'o.

⁴⁹ Ihukkaarem Yesuusinne la'antam keenii Galiiliinsi Yesuusa awwonta'a waatto'i meentii qee'llonne ikka'a eekka moo'llam hee'llo'o.

⁵⁰Ee ammane Ayihuxxi dummichchi daannuwwiinsi mat hee'u Yooseefa yakkam xummaanchi er manchi hee'ukko.

⁵¹Oo manchi Ayihuxxi manni a'llanchannee baxonnee iittamubee'an hee'ukko. Ixxim Yihuxxi uullanne yoo Armaatiyaas beero'an ihaa Waa'i adillano egeroohan hee'ukko.

⁵²Yooseefim Philaaxoos beyyo maraa Yesuusika leesha uwwona uunxukko.

⁵³Ee lasage leeshooma dilliisaa talbiinsi baxamaakkoo danaam eddechchinne Keefanaa kina fere'akka'a axisakko'oohaannonne ayyim waammamoo'n yoo barenne waammukko.

⁵⁴Oo ballim Usheexxaxxi Ayyaam aageena ihaa hee'u bikkina gudakkam balli hee'ukko.

⁵⁵Galiiliinsi Yesuusinne maqire waatta'a hee'llo'i meenti Yooseefa awwonta'a Yesuusika waammaa waammamukkisaa moo'llo'o.

⁵⁶ Ee lasage oo meenti ee beyyiinsi daba'llita'a Yesuus leeshanne labbeena enje'oo luwwaa shitto'oo gudisso'o. Ixxuwwim ijaaccisannem Usheexxaxxi Ayyaamonne usheexxito'o.