Read Hadiyya Luqaas Mishiraachcha 24 Bible Online

Luqaas Mishiraachcha 24 - Hadiyya bible

Luqaas Mishiraachcha 24

¹Ihukkaarem saantiinsi luxxi ballanne soodaraar daram oo meenti gudisso'i shitto'o amadda'a Yesuusa waammakko'i beyyo matto'o.

²Ixxuwwim waammanne ifiisakko'i kin onkoroollaakkoo moo'llo'o.

³Ihukkaarem waammakko'i ba'l woro aagga'a moo'llo'i ammanenne Moollanni Yesuusika leesha siiddo'oyyo.

⁴Ee woshshanne ixxuwwina mal bi'aakkoohaannonne belecce'oo qadaalli eddechcha edde'llo'oo lam manchi waatta'a dangonnem illagenne uullito'o.

⁵Oo meenti baddita'a uullanne qubbita'a hee'llo'isam oo lamem manchim «Foorinne yookkoka lehu kee'n lambe'enne mahina hassakkamuulla? Ixxi ki'aakko, ka beyyonne bee'e.

⁶ ‹Manchi Beet baaxiilaa'n anganne higaa uwwamaa saqalamimmi hasisookko. Saxxi ballannem lehiinsi ki'ookko› yaa Galiilanne hee'ukkuuyyi kuru woshsha sawwi'llehe» yito'o.

⁷

⁸Meentim ixxi wocu woshsha sawwito'o.

⁹Ixxuwwim waammi beyyiinsi daba'llita'a ee woshshi hundam tomminaa mat losaaninaa gatto'i keen hundinaa kutto'o.

¹⁰Ee woshsha asse'amaanina kuramu keen Magda'l Maaraamette, Yoona'atte, Yaaqoob ama Maaraamettee ixxuwwinne maqire hee'llo'i meentoo.

¹¹Ihukkaarem ixxuwwina woshshoom haqaawwo labaa moo'amu bikkina ee meentika woshsha amma'nnito'oyyo.

¹²Ihukkaarem Pheexiroos ee beyyiinsi ki'aa waammi beyyo geerukkuuyyi marukko. Eehe'em afaa heeshaa moo'u ammanenne talbiinsi baxamu keefa'n eddechchi xale'e moo'ukko. Ixxim ee ihu woshshanne maalalukkuuyyi mine marukko.

¹³Ee ayyaamom Yesuus losaaniinsi lam losaan Yerusaaleemiinsi tommoo mat kiilomeetiraa massoo Eema'oosa yakkam gatte mattam hee'llo'o[33].

¹⁴Ixxuwwina'i ixxuwwim ee ihaa hee'u luwwi hundi bikkinam woccam hee'llo'o.

¹⁵Ixxuwwim mat ikka'a lobakata sawwita'a atoorattonam Yesuus hincaa ixxuwwinne marukko.

¹⁶Ihukkaarem ixxotte ihukkisa qoossitambee'isa ixxuwwik illi amadamaa hee'ukko.

¹⁷Yesuusim ixxuwwina dabaraa «Ku ki'nnuwwina'i ki'nnuwwim atoorattakku'uuyyi mattakkam luwwi maruwwa?» yukko. Ixxuwwim kichche'lla'a cawwita'a uullito'o.

¹⁸Ee lasage ixxuwwiinsi mat Qalayoophpha yakkamok dabaraa «Ka saanti woronne ihu luwwa laqqibee'ek Yerusaaleemina koyyiinchi xale'i atettennihe?» yukko.

¹⁹Ixxim ixxuwwina dabaraa «Maruwwa?» yukkaare ixxuwwim dabatta'a «Hiraagaanchi Naazireexxi Yesuus bikkinatte. Ixxi manni hundi illagennee Waa'i illagennee baxinnee wocimminnee malaayyaam hee'ukko.

²⁰Ee ixxo qeessa awwonsaanii ni gassaanii leh oogato'ina higissa'a uwwita'a saqalto'o.

²¹Ihukkaarem neese ‹Isra'eela wolabbanonne fissookko› yinaa neeyyato issinaa hee'nnummo. Odim eehannonnem exxaa oo luwwi hundim ihukkaanniinsi kaballi saxxi balla.

²²Niinninne maqire yo'i meentiinsi mat mat keen neese maalalsiisso'o. Oo meentim daram ki'lla'a waammi beyyo matta'a

²³ixxeka leesha siiddo'oyyo. Ixxuwwim ‹ «Ixxi lehiinsi ki'aakko» yitam asse'amaano kaaltanne moo'nnaammo› yitu'uuyyi waatto'o.

²⁴Niinninne maqire hee'llo'i keeniinsi mat mat keen waammi beyyo matta'a meenti yukkisam ihaakkoo moo'llo'o. Ihukkaarem ixxooma moo'llo'oyyo» yito'o.

²⁵Ee lasage Yesuusim ixxuwwina dabaraa «Hiraagaan kuru woshshi hundam qaqqisonne amma'nnitakkambee'i hinkido'i qawwuwwa,

²⁶Kiristoos ka hawwi hundam aa'aa ixxi lombanne aagimmi hasisooyyonnihe?» yukko.

²⁷Ee lasage Muse'aanniinsii hiraagaa'n kitaabbuwwiinsii asheeraa keesammi kitaabbuwwanne hundannem ixxi bikkina kuramu luwwi hundam tiraa kurukko.

²⁸Ixxuwwim mattam hee'llo'i gatte affeena hincito'oohaannonne Yesuus qee'llo maroohaannisa ihukko.

²⁹Ihukkaarem ixxuwwi «Kaba eelliinchi aageena ihaa uulli hiimu bikkina niinninne maqire gare» yita'a lobakata uunxito'o. Ee bikkina ixxuwwinne maqirem gareena aagukko.

³⁰Ixxim ixxuwwinne maqire hurbaata iteena afuuraa qorosho'o ki'isaa Waa'a galaxxaa iiqaa ixxuwwina uwwukko.

³¹Ee lasage ixxuwwik illi fooqukkaare ixxotte ihukkisa qoossita'a laqqo'o. Ihukkaarem Yesuus ixxuwwi illiinsi willukko.

³²Ixxuwwina'i ixxuwwim «Ixxi niina googonne wocukkuuyyii Keesammi Kitaabiinsi tiraa kurukkuuyyii ni wodan lobakata liiramam hee'ukkoyyonnihe?» yaqqanto'o.

³³Ixxuwwi ee ammanchom ki'lla'a Yerusaaleema daba'llita'a matto'o. Tommii mat losaanii ee losaaninne maqire yo'i keenii mat ikka'a wixxita'a

³⁴«Hanqinam Moollanni ki'aakko. Simi'ooninam moo'amaakko» yitonam affo'o.

³⁵Ee lasage oo lamem mannim googonne ihu luwwaa qorosho'o iiqaa uwwukkuuyyi ixxuwwina la'amukkisaa kutto'o.

³⁶Ixxuwwim eekka wocconam Yesuus ixxi gagim ixxuwwi lambe'enne uullaa «Xummi ki'nnuwwina ihona» yukko.

³⁷Ixxuwwim wiidda moo'llo'oka labissa'a muggita'a jallito'o.

³⁸Ihukkaarem Yesuus ixxuwwina «Ki'nnuwwi badditakkamokii ki'nnuwwi wodanonne malantakkamokii mahinatte?

³⁹An anette ihummisa i angaa i lokkoo moo'llehe. Eesenne moo'llakkam maarii miqii wiiddanne bee'an ihu bikkina eese amaddakka'a moo'llehe» yukko.

⁴⁰Yesuusim eehid yaa lasage ixxeka angaa lokkoo ixxuwwina moo'isukko[34].

⁴¹Ixxuwwim liiranchiinsii maalallatiinsii ki'ukkok amma'nnitoo'n hee'llonam «Ka beyyonne ki'nnuwwina ittakkam luwwi yoohonnihe?» yaa xa'mmukko.

⁴²Ixxuwwim saramaakkoo qurxumme'ika hoffokam uwwito'o[35].

⁴³Ixxim eekka aa'aa ixxuwwi illagennem itukko.

⁴⁴Ee lasage ixxim ixxuwwina «An ki'nnuwwinne maqire hee'ummuuyyi ‹Muse'i Seeranne, hiraagaa'nnaannonnee Mazmuu'l Kitaabbuwwannee i bikkina kitaabamu woshshi hundim wo'mmimmi hasisookko› yaa kurummi woshshi kane» yukko.

⁴⁵Ee lasage odim Keesammi Kitaaba qoossitamisina ixxuwwika wodano fooqaa'ukko.

⁴⁶Ixxim ixxuwwina «Kiristoos hawwo aa'oo'isinaa saxxi ballannem lehiinsi ki'oo'isinaa kitaabamaakko.

⁴⁷Ee'isam ‹Ixxi summinnem baaxiilo biiraa yimmikii baaxiilo Waa'i haafoo'isii Yerusaaleemiinsi ki'isaa minaadab hundinam kuramookko› yamamaakko.

⁴⁸Ka woshshinam ki'nnuwwi naqaashshuwwa.

⁴⁹ Oono'o! Iyyanni ‹Asse'oommo› yukkoka an ki'nnuwwina asse'oommo. Ihukkaarem malaayyi iimaniinsi ki'nnuwwanne dilleebe'e ka beero'onne afuullehe» yukko.

⁵⁰ Ee lasage ixxi losaano Biitaan afeebe'e massaa ixxi anga iim ki'isaa maasse'ukko.

⁵¹Maasse'ukkuuyyim ixxuwwiinsi annanni ihaa iimane marukko.

⁵²Ixxuwwim ixxena otossita'a lobakat liiranchinne Yerusaaleema daba'llito'o.

⁵³Daba'llita'ahim hundi ammanem Waa'a galaxxitu'uuyyi Keesammi Miniinsi annanni ikkam hee'llo'oyyo.