Read Hadiyya Luqaas Mishiraachcha 3 Bible Online

Luqaas Mishiraachcha 3 - Hadiyya bible

Luqaas Mishiraachcha 3

¹Xibaaroos Qeesaar adil ihukkaanniinsi tommoo onti hiinchoo ihaakkoohaannonne Pheenxeenaawekkichchi Philaaxoos Yihuxxi uulla gassam hee'ukko. Odim Heeroodis[1] Galii'l uulla gassam hee'ukko. Ee'isam Heeroodis abbaayyi Filiphphoos Iixuriyaasaa Xiraakondoosaa yakkam uulla gassam hee'ukko. Lisaanoosim Abiliina yakkam uulla gassam hee'ukko.

²Odim Haanna'aa Qayyaafii hundiinsi lob qeessuwwi hee'llo'o[2]. Ee doollenne udma'anne yoo Yohaannisina Zakkaaryaas beetina Waa'i sagar waarukko.

³Ee bikkina Yohaannis «Waa'i ki'nnuwwika baaxiilo haafihona baaxiilo biira yitakka'a xammaqammehe» yaa alallaatukkuuyyi Yoordaanoos daajji kululleetanne yoo uulli hundam marukko.

⁴ Oohim hiraagaanchi Issaayyaas Kitaabanne «Udma'anne ‹Moollannina googo gudissehe. Googguwwam shiraashillehe.

⁵Cebbi beyyi hundim gudona. Lob duunii hoffi duunii hundim shiraashiramona. Boqqu googim xabbeen ihona. Gargante'aam googim lii'llaalli ihona.

⁶Maara edde'u hundim Waa'ika gatishsha moo'ookko› yaa laaroo manchi sagara» yamamaa kitaabamukkane.

⁷ Yohaannisim xammaqameena waaru minaadabina «Ki'nnuwwi hamashshi ooso, waaroo Waa'i quunqiinsi gibbakkamisina ki'nnuwwina ayyi kurukko?

⁸ Kabadem ‹Neese Abrihaam ooso› yimma uttakka'a baaxiilo biira yitakko'isa moo'isoo danaam baxo baxxehe. Mashka'oomim Waa'i Abrihaamina ooso ka kiniinsi ki'iseena xanoo'isa an ki'nnuwwina kuroommo.

⁹ Oono'o! Meesaan haqqi lugumonne gudaakko. Kabadem danaam misha mishoobee'i haqqi hundim muramaa giiranne edamookko» yukko.

¹⁰Minaadabim «Eehaare maha issino?» yita'a Yohaannisa xa'mmito'o.

¹¹Yohaannisim dabaraa «Lam eddechchi yookkok matooma bee'aannina uwwona. Hurbaat yookkokim ee'isam issona» yukko.

¹² Qaraxaanim xammaqanteena waatta'a Yohaannisina «Losisaancho, maha issino?» yita'a xa'mmito'o.

¹³Yohaannisim dabaraa «Ki'nnuwwim ijaajantakko'aanniinsi lonsitakka'a aa'llakkotte» yukko.

¹⁴Gaadaanim ixxi beyyo waatta'a «Neesdu maha issino?» yita'a xa'mmito'o. Ixxim dabaraa «Ki'nnuwwi baxxakka'a siiddakkam diinat ihookko. Ayyem malaayyinne te'im qophphanonne kasasimminne boggakkotte» yukko.

¹⁵Manni hundim Kiristoos waaroo'isa egettam hee'llo'i bikkina «Kuk Gatisaanchi Kiristoosatda'e?» yita'a ixxuwwi wodanonne Yohaannis bikkina sawwito'o.

¹⁶Yohaannisim dabaraa «An ki'nnuwwa wo'inne xammaqoommo. Ihukkaarem an ixxeka caamma'i fatira tireena laboombee'ek iinniinsi lophphoo malaayyaam waaroolla. Ixxi Keesammi Ayyaaninnee giirinnee ki'nnuwwa xammaqookko.

¹⁷Hurbaata muccusseena axuruunsoo maanshim ixxi angannette. Muccussaa lasagem arasooma sechchonne aagisookko. Ihukkaarem bura'ooma xoo'oobee'i giiranne shokkiisookko» yukko.

¹⁸Yohaannisim dutisinne sogukkuuyyi minaadabina mishiraachchi sagara kurukko.

¹⁹ Galii'l uulla gassam hee'u Heeroodisam Filiphphoos are Heeroodiyaada gassu bikkinaa mulli dut jor baxom baxu bikkinaa acceeqasukko. Filiphphoos Heeroodisina abbaayyi hee'ukko.

²⁰Ee bikkina Heeroodis Yohaannisam karaxxi minenne kassiisimminne eraa baxu jollennem edaa jora baxukko.

²¹Manni hundim xammaqamaa lasage Yesuusim xammaqamukko. Xammaqamaa ki'aa Waa'a uunxukkuuyyi hee'onam iiman fooqukko.

²² Keesammi Ayyaanim handarekkichchi kobi'llanne ihaa ixxonne dillukko. Iimaniinsim «An iittoommi i beet eesem liiransitoottok atette» yoo sagar waarukko.

²³Yesuus losisimma asheeru ammane qaramukkaanniinsi sad hiincho ihaa hee'ukko. Manni Yesuusa Yooseef beeto labisam hee'ukko. Yooseef Eeli'i beeto;

²⁴Eeli'i Maati'i beeto; Maati'i Leewi'i beeto; Leewi'i Milke'i beeto; Milke'i Yoona'i beeto; Yoona'i Yooseef beeto.

²⁵Yooseef Mataatiy beeto; Mataatiy Amoox beeto; Amoox Naahoom beeto; Naahoom Eesiliim beeto; Eesiliim Naage'i beeto.

²⁶Naage'i Maa'at beeto; Maa'at Mataatiy beeto; Mataatiy Semeey beeto; Semeey Yooseef beeto; Yooseef Yooda'i beeto.

²⁷Yooda'i Yoonaan beeto; Yoonaan Erees beeto; Erees Zarubaabeel beeto; Zarubaabeel Saalaatiyaal beeto; Saalaatiyaal Neer beeto.

²⁸Neer Milki'i beeto; Milki'i Hade'i beeto; Hade'i Qoossam beeto; Qoossam Elmoodaam beeto; Elmoodaam Eer beeto.

²⁹Eer Yoose'i beeto; Yoose'i Eli'eezar beeto; Eli'eezar Yooraam beeto; Yooraam Maaxaat beeto; Maaxaat Leewi'i beeto.

³⁰Leewi'i Simi'oon beeto; Simi'oon Yihud beeto; Yihud Yooseef beeto; Yooseef Yoonaan beeto; Yoonaan Eeliyaaqeem beeto.

³¹Eeliyaaqeem Meeliy beeto; Meeliy Maynaan beeto; Maynaan Maaxaat beeto; Maaxaat Naataan beeto; Naataan Daawiit beeto.

³²Daawiit Issayyi beeto; Issayyi Iyyoobeed beeto; Iyyoobeed Boo'eez beeto; Boo'eez Saalimoon beeto; Saalimoon Na'aasoon beeto.

³³Na'aasoon Aminaadaab beeto; Aminaadaab Raam beeto; Raam Aariin beeto; Aariin Heexroon beeto; Heexroon Faarees beeto; Faarees Yihud beeto; Yihud Yaaqoob beeto.

³⁴Yaaqoob Yisaaq beeto; Yisaaq Abrihaam beeto; Abrihaam Taara'i beeto; Taara'i Naakoor beeto; Naakoor Saruug beeto.

³⁵Saruug Ra'u beeto; Ra'u Feleg beeto; Feleg Eebeer beeto; Eebeer Sheela'i beeto.

³⁶Sheela'i Qaayinaam beeto; Qaayinaam Arfaakisaad beeto; Arfaakisaad Seem beeto; Seem Nohe'i beeto; Nohe'i Laameek beeto.

³⁷Laameek Maatusaal beeto; Maatusaal Heenook beeto; Heenook Yaareed beeto; Yaareed Malaali'eel beeto; Malaali'eel Qaayinaan beeto.

³⁸Qaayinaan Heenoos beeto; Heenoos Seet beeto; Seet Addaam beeto; Addaam Waa'i beeto.