Read Hadiyya Luqaas Mishiraachcha 4 Bible Online

Luqaas Mishiraachcha 4 - Hadiyya bible

Luqaas Mishiraachcha 4

¹Keesammi Ayyaaninne wo'mmaa Yoordaanoos daajjiinsi Yesuus daba'llukko. Keesammi Ayyaanim udma'i uulla massukko.

²Eekke'em Sheexaanchi Yesuusa sor balla keenukko. Ee sorem ballam Yesuus maham itubee'i bikkina sorem ayyaamim beeddaa lasage sibaarukko.

³Sheexaanchim Yesuusina «At Waa'ina Beet ikkaattoolas huno'o, ku kin hurbaat ihoo'isina ijaaje» yukko.

⁴ Yesuusim Sheexaanchina dabaraa «Keesammi Kitaabanne ‹Manni xale'i hurbaatinne hee'ooyyo› yamamaa kitaabamaakko» yukko.

⁵Ee lasage Sheexaanchi qeeraa'l duunanne Yesuusa fissaa heer uulli adillan hundam winxo'i ammanchonnem moo'isukko.

⁶Moo'isaa «Ka gassimmi malaayyee ixxuwwi lombaa hundam kiina uwwoommo. Mashka'oomim hundim iina uwwamu bikkina anim hasummaannina uwweena xanoommo.

⁷Ee bikkina uullanne aad heeshitaa iina otossitlas ku luwwi hundim kiihan ihookko» yukko.

⁸ Yesuusim ixxena dabaraa «Keesammi Kitaabanne ‹Ki Moollanni Waa'ina otossihe; xale'i ixxenam awwaade!› yamamaa kitaabamaakko» yukko.

⁹Sheexaanchi odim Yesuusa Yerusaaleema massaa Keesammi mi'n ludonne uullisaa «Keesammi Kitaabanne ‹Keese qoxxita'a egettona Waa'i ixxi asse'amaano ijaajookko. Ixxuwwim kinanne ki lokki qolamoobee'isa ixxuwwi anganne qoltamo› yamamaa kitaabamu bikkina huno'o, at Waa'i Beet ikkaattoolas ka beyyiinsi aad ube» yukko.

¹² Yesuusim Sheexaanchina dabaraa «Keesammi Kitaabanne ‹Ki Moollanni Waa'a keentitte!› yamamaa kitaabamaakko» yukko.

¹³Ee lasage Sheexaanchi keenu keenat hundam guullaa ammanoomina Yesuusiinsi annanni ihukko.

¹⁴Keesammi Ayyaa'n malaayyinne Yesuus Galiila daba'llukko. Ixxi sadim kululleetanne yoo uulli hundannem macceesamukko.

¹⁵Ayihuxxi manni wixxixxi minneewwannem losisam hee'ukko. Manni hundim Yesuusa galaxxukko.

¹⁶Ee lasage Yesuus li'u uulla Naazireeta waarukko. Ixxi losa'nnisam Usheexxaxxi Ayyaamonne wixxixxi mine marukko. Ixxi qananaa'eena uullukkaare

¹⁷hiraagaanchi Issaayyaas Kitaaba uwwakko'o. Ixxim kitaaba biddiqaa'u ammanenne

¹⁸ «Buxina mishiraachchi sagara kuroommisina, qeefadanto'i keenim wolabbanonne fittamisa alallaatoommisina, qooqquwwam fooqaa'oommisina, wor amadanto'i keenom wolabbano fissoommisinaa Waa'i ixxi minaadaba gatisoo amman afukkisa alallaatoommisinaa eese doo'llaa asse'u bikkina Moollannik Ayyaan i hanennette» yoo beyyo siidaa qananaa'ukko.

²⁰Ixxim kitaabooma xaaxaa awwaadaanchina dabaraa uwwaa afuurukko. Ee minennem hee'llo'i manni hundim ixxo xuxxita'a moo'llam hee'llo'o.

²¹Ixxim ixxuwwina «Ku qanannaatamukkaare macceessakko'i kitaabik sagar kaballa wo'mmaakko» yimma asheerukko.

²²Ixxi bikkina hundim eroomma wocco'o. Ixxi suumiinsi firoo danaam woshshanne maalalta'a «Kuk Yooseef beetoyyonnihe?» yito'o.

²³Yesuus ixxuwwina dabaraa «Qifirinnaahoomanne issittisaa macceensummokaa ka ki gaqqi uullannem isse. Odim ‹Kaa akiincho, ki gaga fayyiixxe› yoo kobi'llishsha iina woccakkamisa an qoossaa la'aammo» yukko.

²⁴ Odim «Hanqinam an ki'nnuwwina kuroommo. Hiraagaanchi ixxi gaqqi uullanne lomba siixxooyyo.

²⁵ Hanqinam an ki'nnuwwina kuroommo; Eeliyaas hee'u doollenne Isra'ee'l uullanne dut busar meenti hee'ukko. Ee doollenne sas hiinchoo kolloo xeen ga'nnubee'i bikkina uulli hundannem kee'mmaalli qaanne'i hee'ukko.

²⁶ Ihukkaarem Eeliyaas Siidoo'n uullanne Saraphphita yakkam gattenne hee'llam hee'llo'i mat busar meentichchi beyyo asse'amukko bagaan Isra'ee'l meenti beyyo mat beyyom asse'amukkoyyo.

²⁷ Odim hiraagaanchi Elsa'i doollennem oddomachchonne firoo baddisoo jabbinne hawwoo dut manni hee'ukko. Ihukkaarem Sooriy uullanne hee'u Ni'imaana yakkam manchiinsi bagaan ee Isra'ee'l mannik matim fayye'ukkoyyo» yukko.

²⁸Eekka macceesso'i ammanenne wixxixxi minenne hee'llo'i manni hundim lobakata nadaddo'o.

²⁹Ee lasage ki'lla'a beero'iinsi tochchonne Yesuusa fissito'o. Ixxuwwim «Baallenne daramboommo» yita'a ixxuwwi beero'i baxamu duu'n ludonne fissito'o.

³⁰Ihukkaarem Yesuus ixxuwwi lambe'inne higaa uraa marukko.

³¹Ee lasage Yesuus Qifirinnaahooma yakkam Galii'l beero'o dillukko. Yesuusim Usheexxaxxi Ayyaamonne manna losisam hee'ukko.

³² Losisam hee'ukkokim lobakat lachchinnette hee'u bikkina ixxi losishshanne maalaltam hee'llo'o.

³³Ee ammane habus amadaakkoo mat manchi Ayihuxxi manni wixxixxi minenne hee'ukko. Oo manchim lobakat sagarinne

³⁴«Naazireexxi Yesuusa! Ni woshshanne keese mah aagisaate? Ka beyyo waattittok neese bi'isseenattennihe? At Waa'i keesammi ikkittisa an la'oommo» yaa laarukko.

³⁵Ihukkaarem Yesuus ee mancho amadu habusina «Sa'itaa ka manchiinsi fire!» yaa ijaajukko. Ee ammanem habus ee mancho manni lambe'enne ubbuusaa hawwodoo'nnim fatakaa firukko.

³⁶Ixxuwwi hundim maalalta'a ixxuwwina'i ixxuwwim «Ku hinkido'i luwwa? Malaayyinnee lachchinnee habusa ijaajoolla. Ixxuwwim ixxena ijaajanta'a fittamuulla» yito'o.

³⁷Yesuusikim sad ee kululleetanne yoo uulli hundannem macceesamukko.

³⁸Yesuus Ayihuxxi manni wixxixxi miniinsi firaa Simi'oon mine aagukko. Ee ammane Simi'oon ballo xissita'a iinse'lla'a hee'llo'i bikkina ise fayyiisona manni Yesuusa uunxukko.

³⁹Ixxim is gadanonne uullaa xissi fatakoo'isina ijaajukkaare xissim fatakukko. Ee ammanem iimita'a ixxuwwina koyyinano issito'o.

⁴⁰Annanni annanni jabbinne jabbito'i keen hundam eelliinchi aagukkisam Yesuus beyyo eebakko'o. Yesuusim annannichchonnem ixxi anga issaa hundam fayyiisukko.

⁴¹Odim habusim «At Waa'i Beeto!» yaa laarukkuuyyi lobakat keeniinsi firukko. Ihukkaarem ixxi Kiristoosatte ihukkisa laqqa'a hee'llo'i bikkina Yesuus ixxi bikkina woccambee'isa hoorukko.

⁴²Uulli soodukkuuyyi ee beyyiinsi ki'aa manni bee'i beyyo marukko. Mannim ixxo hassu'uuyyi ixxi beyyo waatta'a ixxuwwiinsi annanni ihaa maroobee'isa hootto'o.

⁴³Ihukkaarem Yesuus ixxuwwina dabaraa «An asse'amummi mashka'i Waa'i adilla'n mishiraachchi sagara kurimminatte ihu bikkina mulli beero'uwwannem kurimmi hasisookko» yukko.

⁴⁴Ixxim Yihuxxi uullanne[3] yoo wixxixxi minneewwanne Waa'i sagara kuram hee'ukko.