Read Hadiyya Luqaas Mishiraachcha 5 Bible Online

Luqaas Mishiraachcha 5 - Hadiyya bible

Luqaas Mishiraachcha 5

¹ Mat ayyaamo Gensereex Dambalaq[4] gadanonne Yesuus uullaakkoohaannonne manni Waa'i sagara ixxeensi macceeseena gafe'amam hee'ukko.

²Yesuus ee dambalaq gadanonne lam wongilluwwa moo'ukko. Ihukkaarem qurxumme'e qaashoo manni woriinsi firaa ixxuwwi shikka aansham hee'ukko.

³Yesuusim Simi'oonan hee'u wongiranne aagaa Simi'oonina «Huno'o, ka wongira uulliinsi dambalaq woronne hoffokam shiqaa'e» yukko. Yesuusim ee wongiranne afuuraa manna losisukko.

⁴Ixxim wocaa guullaa lasage Simi'oonina «Wongira xilli dambalaq kollonne massitaa qurxumme'e qaashshakkeena ki'nnuwwi shikka dambalaqanne ubbuussehe» yukko.

⁵ Simi'oonim dabaraa «Moollanna, hiim hundoomam badallaa maham amandummoyyo. Ihukkaarem at yitlas shikka ubbuunsoommo» yukko.

⁶ Ixxuwwim Yesuus yukkisa issito'i ammanenne lobakat qurxumme'e amaddo'aare shikki muramimma asheerukko.

⁷Ee bikkina mulli wongiranne hee'llo'i beshshuwwi waatta'a hara'mmitamisina anginne ganto'o. Ixxuwwi beshshuwwim waatto'aare lamem wongilluwwim aad xuuxamoo qaxa qurxumme'e wonshito'o.

⁸Ihukkaarem Pheexiroosa yakkam Simi'oon eekka moo'aa Yesuus lokkonne ubaa «Moollanna, an baaxiilaanchi ihummi bikkina at iinniinsi annanni ihe!» yukko.

⁹Eehid yu mashka'im ixxii ixxenne maqire hee'llo'i keenii hundim amaddo'i qurxumme'i bikkina maalalta'a hee'llo'i bikkinatte.

¹⁰Odim Simi'oon beshshuwwi hee'llo'i Zabdiwoos oos Yaaqoobii Yohaannisii maalalto'o. Yesuusim Simi'oonina «Baddititte! Ka lasage at qurxumme'e qaashshittisam mannam qaashshootto» yukko.

¹¹Ixxuwwim ixxuwwi wongilluwwa dambalaq tochchonne fissita'a lasage luwwi hundam utta'a Yesuusa awwonto'o.

¹²Yesuus mat beero'onne hee'onam oddomachchi hundannem baddisoo jabbi firaakkoo mat manchi waarukko. Ixxim Yesuusa moo'u ammanenne illillaachcha ubaa «Moollanna, iittittaa'lleensi eese fayyiissaa muccussiteena[5] xantootto!» yaa uunxukko.

¹³Yesuusim anga biddiqaa'aa ee mancho nakkaa «Iittoommo, fayye'llaa muccure!» yukkaare ee ammanem oo jabbi fatakukko.

¹⁴ Odim Yesuus ee mancho «Ayyenam kuttitte. Ihukkaarem at fayye'llittisa manni la'oo'isina Muse'e ijaajukkisam mattaa ki gaga qeessichchina moo'issaa ki'llaa kitima hincaa'e» yukko.

¹⁵Ihukkaarem Yesuusik sad eraa'llaanniinsi lophphaa beyyi hundannem afukko. Lobakat mannim macceeseenaa jabbiinsim fayye'eenaa wixxam hee'ukko.

¹⁶Ihukkaarem ixxi manni bee'i beyyo maraa Waa'a uunxam hee'ukko.

¹⁷Mat ayyaamo Yesuus losisonam Galii'llaannonnee Yihuxxi uullannee yoo gatti hundiinsii Yerusaalee'm beero'iinsii waatto'i Farisaawe'uwwii Seera losisaanii eekke'e afuutta'a hee'llo'o. Jabbaano fayyiisoo Waa'i malaayyim Yesuusanne hee'ukko.

¹⁸Oono'o! Mat shiihaakkoo mancho manni hallaqqanne iyyaa Yesuus beyyo eebukko. Ixxuwwim ee mancho mine aagissa'a Yesuus illagenne dissiteena hasso'o.

¹⁹Ihukkaarem manni lophphu bikkina Yesuus beyyo hincaa'lleena googo siiddo'oyyo. Ee bikkina biddiqaa baxamaakkoo mi'n iimane fitta'a gindita'a manchooma hallaqqinne aad dilliissa'a manni lambe'enne Yesuus illagenne dissito'o.

²⁰Yesuusim ee mannika amma'nnato moo'aa «Mancho! Ki baaxiil haafamaakko» yukko.

²¹Seera losisaanii Farisaawe'uwwii «Ku Waa'inne game'llamoollak ayyette? Matem Waa'iinsi bagaan baaxiilo haafeena ayyi xanookko?» yimma asheetto'o.

²²Yesuus ixxuwwi sawwite la'aa «Kaka ki'nnuwwi wodanonne mahina sawwitakkamuulla?

²³‹Ki baaxiil haafamaakko› yimminnii ‹Ki'llaa mare› yimmi sholle'ookko?

²⁴Ihukkaarem Manchi Beetina[6] uullanne baaxiilo haafeena malaayyi yoo'isa laqqehe» yaa shiihu manchina «Kaa mancho! Iimitaa ki hallaqqa iyyitaa mine elle'e» yukko.

²⁵Ixxim ee ammanem ixxuwwi illagenne iimaa iinse'u hallaqqa iyyaa Waa'a galaxxukkuuyyi mine elle'ukko.

²⁶Manni hundim lobakat baddimminnee maalalimminnee «Kaballa maalalsiisoo luwwa moo'nnummo» yaa Waa'a galaxxukko.

²⁷Ee lasage Yesuus ee beyyiinsi firaa maraa mat Leewi'i yakkam qaraxaanchi qaraxo aa'oo beyyonne afuuraakkoo moo'ukko. Yesuusim ixxena «Eese awwone» yukko.

²⁸Ixxim ki'aa hundem luwwam uraa Yesuusa awwonukko.

²⁹Oo Leewi'm ixxi minenne Yesuusina lobakat maadda issukko. Ee maaddannem lobakat qaraxaanii mulli mannii ixxuwwinne maqirem afuutta'a hee'llo'o.

³⁰ Odim Farisaawe'uwwii Seera losisaanii Yesuus losaanina «Qaraxaaninnee baaxiilaaninnee maqire ittakkamokii aggakkamokii mahinatte?» yita'a quunquunto'o.

³¹Yesuus ixxuwwina dabaraa «Qaraa'l manchi hasisookkok jabbaaninatte bagaan fayya'i manninayyo.

³²An waarummok muccur keeno weesheenatte ihoo'n baaxiilaano baaxiiliinsi dabareenatte» yukko.

³³Ixxuwwim Yesuusina «Yohaannis losaanii Farisaawe'i losaanii hundi ammanem soommantamoo Waa'a uunxitamoo. Ihukkaarem ki losaan ittamuullaa aggamuullaa» yito'o.

³⁴Yesuus ixxuwwina dabaraa «Idaayyichchi ixxuwwinne hee'ukkuuyyi bollochcho'i manna soommano amadiissakkeena xantakkamonnihe?

³⁵Idaayyichcho ixxuwwiinsi annanni issakka'a massakkam ayyaam waarookko. Ee ayyaamo ixxuwwim soommantamo» yukko.

³⁶Odim ixxuwwina mulli kobi'llishshinnem haareechchi eddechchiinsi qaafunta dereeraa beeddu eddechchanne edaa gobookkok ayyimbee'e. Ee'isa issuta'nnim haareechcho kora'am dereeraa bi'isookko bagaan oo haareechchi qaafunti ebeer eddechchanne taaphanooyyo.

³⁷Odim haareechchi woyi'n diqaasa ebeer cananne issookkok ayyimbee'e. Issookkokimdu hee'ulas woyi'n diqaas cana xooqisaa dunamookko; canoomim awwaadooyyo.

³⁸Ee bikkina haareechchi woyi'n diqaasa haareechchi cananne issimmi hasisookko.

³⁹Ayyim « ‹Afuuru woyi'n diqaas danaamo›[7] yoo bikkina afuuru woyi'n diqaasa agaa ki'aa haareechchi woyi'n diqaasa heele'ookkok bee'e» yukko.