Read Hadiyya Luqaas Mishiraachcha 6 Bible Online

Luqaas Mishiraachcha 6 - Hadiyya bible

Luqaas Mishiraachcha 6

¹ Yesuus Usheexxaxxi Ayyaamonne hurbaaxxi worinne higonam ixxi losaan hamaamika quxxa'a anginne cukkita'a ittam hee'llo'o.

²Ee bikkina Farisaawe'uwwiinsi mat mat keen Yesuus losaanina «Usheexxaxxi Ayyaamonne issimmina laboobee'i luwwa mahina issitakkamuulla?» yita'a xa'mmito'o.

³ Ihukkaarem Yesuus ixxuwwina «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe?

⁴ Ixxim Keesammi Mine aagaa keesammi qorosho'o oohim xale'i qeessuwwiinsi bagaan mulli manni itimmi hasisoobee'eka aa'aa itukko. Ixxenne maqire hee'llo'i keeninam uwwukko» yaa dabarukko.

⁵Odim Yesuus ixxuwwina «Manchi Beet[8] Usheexxaxxi Ayyaaminam annichchome» yukko.

⁶Odim Yesuus mulli Usheexxaxxi Ayyaamonne Ayihuxxi manni wixxixxi mine aagaa losisam hee'ukko. Ee beyyonnem makki angi shiihaakkoo mat manchi hee'ukko.

⁷Seera losisaanii Farisaawe'uwwii Yesuusa kasassam mashka'a hassam hee'llo'i bikkina Usheexxaxxi Ayyaamonne fayyiisooda'e moo'lleena egetto'o.

⁸Ihukkaarem Yesuus ixxuwwi sawwite la'aa ee angi shiihu manchina «Waattaa ka beyyonne uulle» yukkaare oo manchi ki'aa maraa ee beyyonne uullukko.

⁹Yesuusim «Hino'o an ki'nnuwwa xa'mmoommo. Usheexxaxxi Ayyaamonne erokannii jora issimmi hasisookko? Te'im manni foore gatisimminnii shimmi hasisookko?» yaa xa'mmukko.

¹⁰Yesuusim ixxi kululleetanne hee'llo'i manni hundam moo'aa angi shiihu manchina «Ki anga biddiqaa'e» yukko. Manchim ixxi anga biddiqaa'ukkaare ixxi angi daba'llaa fayye'ukko.

¹¹Ihukkaarem ixxuwwi lobakata nadadda'a Yesuusa maha issitamda'e ixxuwwina'i ixxuwwim a'llanto'o.

¹²Mat ayyaamo Yesuus Waa'a uunxeena duuna firukko. Eekke'em hiimo hundoomam Waa'a uunxukkuuyyi garukko.

¹³Uulli soodu ammanenne ixxi losaano weeshaa ixxuwwiinsim tommoo lam losaanoo doo'llukko. Ixxuwwam «Asse'amaano» yaa weeshukko.

¹⁴Doo'llanto'i keenim Pheexiroosa yaa Yesuus weeshu Simi'oonatte, Simi'oon abbaayyi Indiraasatte, Yaaqoobatte, Yohaannisatte, Filiphphoosatte, Bartoloomoosatte, Maatiwoosatte, Toomaasatte, Ilfiyoos beet Yaaqoobatte, uullina to'achchaanchi Simi'oonatte, Yaaqoob beet Yihudattee Yesuusa lehina higisaa uwwu Asqorotokkichchi Yihudattee.

¹⁵

¹⁶

¹⁷Asse'amaaninne maqirem Yesuus duuniinsi dillaa lete'i beyyonne uullukko. Eekke'em lobakat ixxi losaanii ixxeensi losseenaa ixxuwwanne yoo jabbiinsi fayye'lleenaa Yihuxxi uulli hundiinsi, Yerusaalee'm beero'iinsi, dambalaq tochchonne yoo Xiiroosaanniinsii Siidoo'n beero'iinsii waatto'oo lobakat mannii hee'llo'o.

¹⁸Habus amadaa hawwitam hee'llo'i keenim fayye'llo'o.

¹⁹Ixxeensi malaayyi firaa hundam fayyiisam hee'u bikkina manni hundim ixxo nakkeena hasam hee'ukko.

²⁰Yesuusim ixxi losaano moo'ukkuuyyi «Ki'nnuwwi bux keen Waa'i adillan ki'nnuwwan ihu bikkina maassaammuwwa.

²¹Kaba sibaattakkam keen godditakkam bikkina maassaammuwwa. Odim wi'llitakkam keenim osattakkam bikkina maassaammuwwa.

²² «Manchi Beet bikkina manni ki'nnuwwa saboohaare, yaayyoohaare, game'lloohaaree ki'nnuwwi summam jorinne amadoohaaree ki'nnuwwi maassaammuwwa.

²³ Iimanenne ki'nnuwwik irifo'i lobakat ihu bikkina oo hundim ki'nnuwwanne afoo ammane liirammehe. Liiranchinnem xophxophi'llehe! Mashka'oomim ixxuwwi anno'im hiraagaano eehid issito'ookko.

²⁴«Ihukkaarem ki'nnuwwi goddaan keen danaam heechcha hee'llakko'i bikkina ki'nnuwwina aayye!

²⁵Ki'nnuwwi kaba godditakko'i keen sibaattakkam bikkina aayye! Ki'nnuwwi kaba osattakkam keen kichche'llakkam bikkinaa wi'llitakkam bikkinaa aayye!

²⁶«Manni hundim ki'nnuwwa biroo ammane ki'nnuwwina aayye! Ixxuwwi anno'im ‹Neese hiraagaano› yitam qophphanaano eehid issito'ookko.

²⁷Odim Yesuus «Ihukkaarem an ki'nnuwwina macceessakkam keenina kuroommo; ki'nnuwwi maso'o iittehe. Ki'nnuwwa sabbam keeninam eroomma issehe.

²⁸Ki'nnuwwa duuntam keenom maasse'llehe. Ki'nnuwwa hawwodu keeninam Waa'a uunxehe.

²⁹Kiikka mat xabano aphphisukkaannina la'm xabanom uwwe. Ki gaabe'e masseena hasoohaannina ki qambiisam hoottitte.

³⁰Keese uunxukkaannina hundinam uwwe. Kiinniinsi luwwa massu manchi dabaraa uwwonam xa'mmititte.

³¹ Manni ki'nnuwwina issona hassakkam luwwa ki'nnuwwim mannina issehe.

³²«Ki'nnuwwa iittitam keen xale'e iittitakko'aare maha awwaadookko? Eehid ihukkaa'lleensi baaxiilaammuwwim ixxuwwa iittitam keeno iittitamo.

³³Ki'nnuwwina danaamo issu keenina danaamo issitakko'aa'lleensi ki'nnuwwina maha awwaadookko? Eekka'i baaxiilaammuwwim issitamo.

³⁴Liqaayyo dabatta'a ‹Uwwitamo› yitakka'a neeyyato issitakkam keenina liqaayyissakko'aalleensi maha awwaadookko? Dabatta'a aa'lleena'i baaxiilaammuwwim liqaayyissamo.

³⁵Ki'nnuwwi ihukkaarem ki'nnuwwi maso'o iittehe. Maso'uwwinam eroomma issehe. Dabaraa ‹Uwwookko› yitakka'a egettakkambee'isam liqaayyissehe. Ee'isamdu issitakkolas ki'nnuwwina uwwamoo irifo'i lobakat ihookko. Odim hundam xanoo Waa'inam oos ikkakkamo. Mashka'oomim Waa'i ixxo galaxxitambee'i keeninaa jor keeninam biijaalla.

³⁶Iimanenne yoo ki'nnuwwi anni haafoohan ihukkisam ki'nnuwwim haafitakkam keen ikkehe.

³⁷Odim Yesuus «Ayyi manchonnem oogattakkotte; Waa'im ki'nnuwwanne oogatooyyo. Ayyi manchom ‹Jora issaakkoohane› yitakka'a higissakka'a uwwitakkotte; Waa'im ki'nnuwwa jorina higisaa uwwooyyo. Haafi'llehe; ki'nnuwwinam haafamookko.

³⁸Uwwehe; ki'nnuwwinam uwwamookko. Ki'nnuwwi keentakka'a uwwitakko'i keennaanchonne dabattakka'a a'llitakkam bikkina ki'nnuwwim uwwehe. Ki'nnuwwinam er keennaanchonne xishshaa'akka'ahii xiibakka'ahii keenakka'a keennaanchiinsi higaakkookkoka qaaphphisakkamo» yukko.

³⁹ Odim Yesuus mat kobi'llishsha kurukkuuyyi «Qooq qooqa awwonseena xanoohonnihe? Awwonsulas lamim baallenne ubbamoyyonnihe?

⁴⁰ Losookkok ixxi losisaanchiinsi lophphooyyo. Ihukkaarem ayyim guullaa losaa lasage ixxi losisaanchisam ihookko.

⁴¹Ki illenne yoo gudeera laqqoo'nnim kiyyabbaayyi illenne yoo haccichcho moo'lloottok mahinatte?

⁴²Te'im ki illenne yoo gudeeram siiddoo'n kiyyabbaayyina ‹Huno'o, iyyabbaayyo, ki illenne yoo haccichcho fissoommo› yiteena hinkid xantootto? Kaa labsaancho, gaassitaa ki illenne yoo gudeera fisse. Ee lasage kiyyabbaayyi illenne yoo haccichcho fissiteena qoossitaa moo'llootto.

⁴³Odim Yesuus «Danaam haqqichchi jor misha mishooyyo. Jor haqqichchim danaam misha mishooyyo.

⁴⁴ Haqqi hundim mishoo mishinne la'amookko. Uttiinsi oda'i misha feerakkamoyyo. Seego'iinsi woyi'n misha feerakkamoyyo.

⁴⁵ Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko. Mashka'oomim suum wocookkok wodanonne wo'mmaa gatu luwwa.

⁴⁶Odim Yesuus «An ki'nnuwwa issehe yummi luwwa'i issitakkamoyyo. Eese ‹Moollanna! Moollanna!› yitakkamok mahinatte?

⁴⁷I beyyo waaraa an yummi luwwa macceesaa baxonne hosisookkok hundim maha kobi'llooda'e an ki'nnuwwina kuroommo.

⁴⁸Oo manchi ixxi mine baxeena shooto'o xillisaa hinaa gortanna kinanne uullisu mancho kobi'lloohane. Diris dirisaa ee mine gafe'ukko. Ihukkaarem danaamisa baxamu bikkina heekkeeseena xanukkoyyo.

⁴⁹Ihukkaarem an yummi luwwa macceesaa baxonne hosisoobee'ek shooto'o muroo'nnim mine baxu mancho labookko. Oo min diris gafe'ukkaare ee ammanchom ubukko. Ee mi'nnek ubimmim jorisa» yukko.