Read Hadiyya Luqaas Mishiraachcha 7 Bible Online

Luqaas Mishiraachcha 7 - Hadiyya bible

Luqaas Mishiraachcha 7

¹Yesuus wocam hee'u woshshi hundam mannina wocaa guullaa lasage Qifirinnaahoom beero'o aagukko.

²Mat Oroomekkichchi xibbi halaqichchina lobakata iittoo awwaadaanchi hee'ukko. Oo awwaadaanchim xissaa leheena ihaa hee'ukko.

³Oo xibbi halaqichchi Yesuus bikkina macceesu ammanenne ixxi awwaadaancho waaraa fayyiisoo'isina Ayihuxxi manni lommanna Yesuus beyyo asse'ukko.

⁴Ixxuwwim Yesuus beyyo waatta'a «Ni minaadaba iittookkok niinam wixxixxi mine baxisaakkoo xibbi halaqichchik awwaadaanchi xissu bikkina kaba at ixxo fayyiisimmi hasisookko» yita'a qoxxissa'a uunxito'o.

⁵

⁶Ee bikkina Yesuus ixxuwwinne maqirem marukko. Maraa xibbi halaqichchi minenne hincu ammanenne xibbi halaqichchi Yesuus beyyo manna asse'aa «Moollanna, at i mine aaggeena an laboombee'an ihummi bikkina waatteena hawwititte!

⁷Anim ki beyyo waareena laboomman ihaa i gaga xigoommoyyo. Ee bikkina ki suuminne mat luwwa woce; i awwaadaanchi fayye'ookko.

⁸An i gagim mulli keenina ijaajamoomman ihummuuyyi odim iinniinsi woroon an ijaajoommi gaadaan yo'o. Ixxuwwiinsim mato ‹Mare› yoommaare marookko. Odim mullaanninam ‹Waare› yoommaare waarookko. I awwaadaanchom ‹Kaka isse› yoommaare ixxim issookko» yukko.

⁹Yesuus eekka macceesu ammanenne ee xibbi halaqichchonne maalalaa ixxo awwonu minaadaphphi kollonne daba'llaa «An ki'nnuwwina kuroommo; kido'i qoxxaalli amma'nnat yoo mancho Isra'ee'l minaadabannem siidummoyyo» yukko.

¹⁰Oo asse'anto'i keenim mine daba'llita'a waatto'i ammanenne awwaadaanchi fayye'aakkoo moo'llo'o.

¹¹Hoffi ammaniinsi[9] lasage Naayina yakkam beero'o Yesuus marukko. Ixxenne maqirem losaanii lobakat minaadabii matto'o.

¹²Yesuus ee beero'ika gooca afeena[10] ihaakkoohaannonne leesha iyyaakkoo manni beero'iinsi firukko. Oo lehu manchim amana mexxokkichchom hee'ukko. Isem busar meentichchotte hee'llo'o. Ee beero'ik lobakat minaadab isenne maqire hee'ukko.

¹³Moollanni ee meentichcho moo'u ammanenne isena qishixxaa «Wi'llititte!» yukko.

¹⁴Ee lasage maraa hallaqqa nakkukkaare leesha iyyu manni uullukko. Yesuusim «Kaa woraadichcho, an keese ‹Iimihe› yoommuulla; iimihe!» yukko.

¹⁵Lehu manchim afuuraa wocimma asheerukko. Yesuus ee mancho amana dabaraa uwwukko.

¹⁶Ixxuwwi hundim baa'llo'o. Ixxuwwim «Ni lambe'enne hiraagaanchik malaayyaam ki'aakko. Waa'i ixxi minaadaba gatiseena waaraakko» yitu'uuyyi Waa'a galaxxito'o.

¹⁷Ixxi sadim Yihuxxaannonnee ee kululleetanne yoo uulli hundannee macceesamukko.

¹⁸Yohaannis losaan ee woshsha hundam Yohaannisina kutto'o.

¹⁹Yohaannisim ixxi losaaniinsi lamo weeshaa « ‹Waarookko› yakko'i Kiristoos atettennii te'im mulleka egelloo?» yaa Moollanni beyyo asse'ukko.

²⁰Oo asse'anto'i mannim Yesuus beyyo waatta'a «Xammaqaanchi Yohaannis ‹ «Waarookko» yakko'ok atettennii te'im mulleka egello?› yaa asse'aakko» yito'o.

²¹Yesuus ee ammanchom manna xissiinsii jabbiinsii fayyiisukko. Habusam fissukko. Lobakat qooqquwwam fooqaa'ukko.

²² Ixxim asse'anto'i keenina «Mattakka'a Yohaannisina moo'llakko'okaa macceessakko'i luwwaa oohim ‹Qooqquwwi moo'llamuulla. Shiihuwwim taakke'llamuulla. Oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla. Leto'i keen lehiinsi ki'llamuulla. Bux keenina mishiraachchi sagar kuramoolla.

²³Eesenne malamoobee'ek maasse'amaakkoohane› yaakko yitakka'a kullehe» yaa dabarukko.

²⁴Oo asse'anto'i manni elle'lla'a lasage Yohaannis bikkina Yesuus minaadabina «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe?

²⁵Eehaara'i maha moo'llakkeena mattakko'o? Danaam eddechcha edde'u mancho moo'llakkeenattennihe? Oono'o! Wereeggi eddechcha edde'lla'a heellantu'uuyyi hee'llam keen adilluwwi minenne yo'o.

²⁶Eehaara'i maha moo'llakkeena mattakko'o? Hiraagaanchonnihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte.

²⁷ Keesammi Kitaabanne ‹Oono'o! Kiina googo gudisoo i asse'amaancho ki illagenne asse'oommo› yamamaa kitaabamukkok Yohaannis bikkinatte.

²⁸An ki'nnuwwina kuroommo; qaramu mannanne Yohaannisiinsi lophphookkok matim bee'e. Ihukkaarem hundiinsim hoffe'ookkok Waa'i adillanonne ixxeensi lophphookko» yukko.

²⁹ Yohaannis xammaqam hee'u xammaqanchanne xammaqanta'a hee'llo'i bikkina eekka macceesso'i manni hundim qaraxaanim gattoo'n Waa'i bax hanqo'an ihukkisa qoossito'o.

³⁰Ihukkaarem Farisaawe'uwwii Seera losisaanii Yohaannis xammaqoo xammaqanchanne xammaqantobee'i bikkina Waa'i sawwu sawwite sabbo'o.

³¹Odim Yesuus «Ka doollenne yoo manna mahinne kobi'llisoommo? Ixxuwwi hinkido'i manna?

³²Ixxuwwi kobi'llitamok meeranne afuutta'a ixxuwwina'i ixxuwwim ‹Dibbe'e aphphinsummo, kaddakko'oyyo; sollummo, wi'llitakko'oyyo› yaqqanta'a weeccantam ooso kobi'llitamo.

³³Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Habus amadaakkoohane› yitakko'o.

³⁴Manchi Beeto itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yitakko'o.

³⁵Ihukkaarem Waa'ik qooroom hanqo'isa la'amookkok qoolluwwi beyyonnette» yukko.

³⁶Farisaawe'uwwiinsi mat manchi Yesuus ixxenne hurbaata itoo'isina weeshukkaare Yesuusim ee Farisaawekkichchi mine aagaa maadda iteena afuurukko.

³⁷ Oono'o! Ee beero'onne mat baaxiilaancho meentichcho Farisaawekkichchi minenne Yesuus hurbaata iteena afuurukkisa macceessa'a albaasxiroos bilqaaxanne wo'mmaakkoo shitto'o eebbo'o.

³⁸Isem afaree'n kollinne waatta'a wi'llitu'uuyyi indiiddinne ixxi lokko aashisimma asheetto'o. Ee indiiddam is horoo'l saraatinne shiinshita'a lokko suunqito'o. Ixxi lokkonnem shitto'o labbo'o.

³⁹Hurbaata itiseena Yesuusa massu Farisaawekkichchi ee ammane eekka moo'aa ixxi wodanonne «Tu ixxo nakkitam meentichcho baaxiilaanchotte ikko'i bikkina ku manchi hiraagaanchi ihuta'n ise ayyetda'ee hinkido'i meentichchotda'ee ikko'isa la'am hee'ukko» yaa sawwukko.

⁴⁰Yesuusim ixxena dabaraa «Simi'oona, an kiina kuroommi luwwi yookko» yukko. Simi'oonim dabaraa «Losisaancho! Maruwwa?» yukko.

⁴¹Odim Yesuus «Mat manchiinsi liqaayyo aa'llo'oo lam manchi hee'llo'o. Ixxuwwim aa'llo'ok matii onti xibbi diinaara, la'mmekim ontayyi diinaar hee'ukko.

⁴²Oo liqaayyo aa'llo'i lamem mannim miqimma hooggo'aare liqaayyisu manchi lamikam urukko. Ee lasage ee lamem manniinsim lonsaa iittookkok hinkane?» yukko.

⁴³Simi'oonim «Iina laboo'isina lonsaa iittookkok lobakat badanchi uramukkane» yaa dabarukko. Yesuusim ixxena «Hanqa oogattaatto» yukko.

⁴⁴Yesuusim ee meentichchi kollonne ille dabaraa Simi'oonina «At ka meentichcho moo'lloollannihe? An ki mine aagummaare at i lokkina wo'om uwwittoyyo. Ihukkaarem ise indiiddinne i lokko aashissa'a is horoo'l saraatinne shiinshito'o.

⁴⁵At eese suunqittoyyo. Ihukkaarem ise ka mine aagummaanniinsim ki'issa'a i lokko suunqimma utto'oyyo.

⁴⁶At i horoorenne zaytam labbittoyyo. Ihukkaarem ise i lokkonne shitto'o labbo'ookko.

⁴⁷Ee bikkina an kiina kuroommo; ise eese lobakata iittito'ok isek lobakat baaxiil haafamu bikkinatte. Ihukkaarem hoffi baaxiil haafamukkok hoffokam iittookko» yukko.

⁴⁸Yesuusim ee meentichchona «Ki baaxiil haafamaakko» yukko.

⁴⁹Ee bikkina ixxenne maqire hurbaata itteena afuutto'i keen «Ku ‹Ki baaxiil haafamaakko› yookkok ayyette?» yita'a ixxuwwi wodanonne sawwito'o.

⁵⁰Ihukkaarem Yesuus ee meentichchona dabaraa «Ki amma'nnat keese gatisaakko. Xumminne mare» yukko.