Read Hadiyya Luqaas Mishiraachcha 9 Bible Online

Luqaas Mishiraachcha 9 - Hadiyya bible

Luqaas Mishiraachcha 9

¹Tommoo lamem losaano Yesuus ixxi beyyo mat issaa weeshaa habusa fissitamisinaa jabbi hundiinsim fayyiissamisinaa malaayye uwwukko.

²Ixxuwwim mannina Waa'i adilla'n bikkina alallaattamisinaa jabbaanom fayyiissamisinaa asse'ukko.

³ Ixxim ixxuwwina «Ki'nnuwwi googina bicci ihukko te'im can ihukko te'im hurbaat ihukko te'im diinat ihukko te'im lago'i eddechchi ihukko maham amaddakkotte.

⁴Ayyi minem koyyinano aaggakkolas ee gattiinsi fittakkeebe'e ee minenne afuullehe.

⁵ Ayyi beyyonnem ki'nnuwwa aa'akkobeelas ee beyyo uttakka'a fittakkam ammane ki'nnuwwi lokkiinsi dira giggissehe. Oohim ‹Ki'nnuwwi quuxo› yimmi mare'e» yukko.

⁶Ee bikkina ixxuwwi fitta'a mishiraachchi sagara gatti hundannem kuttu'uuyyii beyyi hundannem jabbaano fayyiissu'uuyyii matto'o.

⁷ Ee iham hee'u luwwa hundam Galii'l uulla gassaanchi hee'u Heeroodis macceesu ammanenne ixxek mal bi'ukko. Mashka'oomim mat mat manni «Yohaannis lehiinsi ki'aakko» yitam hee'llo'o.

⁸Mulli keenim «Eeliyaas waaraakko» yitam hee'llo'o. Odim mulli keenim «Eraa'l hiraagaaniinsi mat ki'aakko» yitam hee'llo'o.

⁹Ee bikkina Heeroodis «Yohaannisika gaanje mussiisummo. Eehaare ku ixxi bikkina wocakku'uuyyi macceesummok ayyette?» yaa Yesuusa moo'eena mixukko.

¹⁰Awwonaanim asse'anto'i beyyiinsi daba'llita'a waatta'a issito'i luwwi hundam Yesuusina kutto'o. Yesuusim ixxuwwa annanni issaa Beetesaayid beero'o amadaa marukko.

¹¹Eekka laqqo'i ammanenne lobakat manni ixxo laseesso'o. Ixxim ixxuwwa aa'aa Waa'i adilla'n bikkina kurukko. Fayye'immi hasisoo keenom fayyiisukko.

¹²Uulli hiimeena ihaa hee'u bikkina tommii lamem losaanim ixxi beyyo waatta'a «Neese yoommine'ek udma'annetti ihu bikkina ku manni ka kululleetanne yoo gattuwwanne matta'a gattamisinaa ittam luwwa siixxitamisinaa geegeese» yito'o.

¹³Ihukkaarem Yesuus ixxuwwina «Ka mannina ittam luwwa ki'nnuwwi uwwehe» yukko. Ixxuwwim dabatta'a «Ka manni hundinam ihoo hurbaata beero'o mallaa bito aa'nnumbeelas niina onti xeffo'i qorosho'iinsii lam qurxumme'iinsii bagaan bee'e» yito'o.

¹⁴Ee beyyonne onti kuma ikkamqax manni hee'llo'o. Yesuusim ixxi losaanina «Ontayyi ontayyi issitakka'a afuussehe» yukko.

¹⁵Ixxuwwim ixxi yukkisa issita'a hundam afuussito'o.

¹⁶Yesuusim ontem xeffo'i qorosho'oo lamem qurxumme'ee aa'aa iimane moo'aa Waa'a galaxxukko. Ee lasage mannina uwwitamisina iiqaa losaanina uwwukko.

¹⁷Manni hundim itaa goddaa gatu giggira tommonnee lam sanfonnee wonshita'a ki'isso'o.

¹⁸Mat ayyaamo Yesuus mullam Waa'a uunxukkuuyyi ixxi losaan ixxi beyyo waatto'o. Yesuus ixxuwwina «Manni eese ayyette yoolla?» yaa xa'mmukko.

¹⁹ Ixxuwwim dabatta'a «Mat mat keen ‹Xammaqaanchi Yohaannisatte› yitamuulla. Odim mulli keen ‹Eeliyaasatte› yitamuulla. Mulli keenim ‹Eraa'l hiraagaaniinsi mat ki'aakko› yitamuulla» yito'o.

²⁰ Yesuusim ixxuwwina «Eehaare ki'nnuwdu eese ayyette yitakkamuulla?» yukkaare Pheexiroos dabaraa «At Kiristoosatte» yukko.

²¹Ihukkaarem Yesuus eekka ayyenam kuttambee'isa qoxxisaa ijaajukko.

²²Odim Yesuus ixxuwwina «Manchi Beet lobakata hawwimmi hasisookko. Ixxom lommanni, qeessa awwonsaanii Seera losisaanii sabbamoo shitamomee. Ihona bagaan saxxi ballanne lehiinsi ki'ookko» yukko.

²³ Odim Yesuus hundinam «Ayyim eese awwoneena hasulas ixxi gaga lagona. Ixxim ballina ballina lehina gudaa eese awwonona.

²⁴ Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok hundim ixxi foore gatisookko.

²⁵Mat manchi ka uulli amaxxa hundam siixxaa ixxeka foore bi'isuta'n ixxena maha awwaadookko?

²⁶Ayyim eesennee i sagarannee tuurulas Manchi Beet ixxi lombinne, Anni lombinnee keesammi asse'amaa'n lombinnee waaroo ammane ixxonnem tuurookko.

²⁷Hanqinam an ki'nnuwwina kuroommo; ka beyyonne yo'i keeniinsi Waa'ika adillano moo'lloo'n gaassita'a letambee'i keen yo'o» yukko.

²⁸ Yesuus eehid yukkaanniinsi sadeenti balla ihooqaxa ihaakkoohaannonne ixxenne maqirem Pheexiroosa, Yohaannisaa Yaaqoobaa amadaa Waa'a uunxeena duuna firukko.

²⁹Waa'a uunxukkuuyyim ixxek illi kolli mulli hagaranne daba'llukko. Ixxi eddechchim belecce'oo qadaalli ihukko.

³⁰Oono'o! Lam manni ixxenne maqire atoorattam hee'llo'o. Ixxuwwim Muse'ettee Eeliyaasattee hee'llo'o.

³¹Oo lombinne moo'anta'a atoorattam hee'llo'i woshshim Yerusaalee'm beero'onne Yesuus lehimminne Waa'ika sawwite hinkid wonshooda'ette hee'ukko.

³²Ihukkaarem Pheexiroosaa Pheexiroosinne maqire hee'llo'i keenoo kee'mmaalli diriichchi amadaa hee'ukko. Ixxuwwim baqito'i ammanenne ixxi lombaa ixxenne maqire uullita'a hee'llo'i lamem manchoo moo'llo'o.

³³Oo mannim Yesuusiinsi annanni ikku'uuyyi Pheexiroos Yesuusina «Moollanna! Ka beyyonne hee'immi niina danaam ihu bikkina sas daasa kiina mato, Muse'ina mato, Eeliyaasina mato banxona» yaa mayyuda'e la'oo'nnim wocukko.

³⁴Pheexiroos eekka woconam umbu'l waaraa ixxuwwa ifiisukko. Ixxuwwim umbu'l ifiisu ammanenne baddito'o.

³⁵ Ee umbu'l woriinsim «An doo'llummi i Beet kane; ixxeensim macceessehe!» yoo sagar waarukko.

³⁶Oo sagar macceesamaa lasage xale'i Yesuusa moo'llo'o. Ee ammane ixxuwwi ee moo'llo'i luwwa ayyenam maham kuttoo'n cawwita'a utto'o.

³⁷La'm balla duuniinsi ixxuwwi dillito'i ammanenne lobakat minaadab Yesuusinne edanto'o.

³⁸Ee minaadaphphi lambe'iinsim mat manchi «Losisaancho! Iina yookkok ka mexxo'i beetichcho. Ixxom habus amadaa dangonnem laassiisookko. Ga'nnansukkuuyyi aqinne himba eebisaa iiqansaa hawwona urookko. Ki losaan fissitamisina uunxummo. Ihukkaarem fissiteena xanto'oyyo. Ee bikkina at ixxo moo'e» yaa uunxukko.

³⁹

⁴⁰

⁴¹Yesuus dabaraa «Ka amma'nnatbee'i boqqi qarancha? An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo?» yaa «Huno'o, ki beeto keyye eebe» yukko.

⁴²Oo beet waaronam habus uullanne ubbuusaa ga'nnansukko. Ihukkaarem Yesuus ee habusa ijaajaa beetooma fayyiisaa ixxi annina dabaraa uwwukko.

⁴³Ixxuwwi hundim Waa'ika lob malaayye moo'lla'a maalalto'o. Yesuus issu luwwi hundannem manni hundim maalaltonam Yesuus ixxi losaanina

⁴⁴«An ki'nnuwwina kuroommoka qoossitakka'a macceessehe. Manchi Beeto manni anganne higisakka'a uwwakkamo» yukko.

⁴⁵Ihukkaarem oo woshshi ixxuwwiinsi daphphaa hee'u bikkina mayyimda'e qoossiteena xanto'oyyo. Ee woshsham ixxo xa'mmiteena baddito'o.

⁴⁶ Losaan «Ni lambe'iinsi lophphookkok ayyette?» yita'a fitancha asheetto'o.

⁴⁷Yesuusim ixxuwwi woda'nneka la'aa ciilichcho massaa ixxi gadanonne uullisukko.

⁴⁸ Uullisaa ixxi losaanina «Ki'nnuwwi lambe'iinsi hundiinsi hoffok hundiinsim lobane. Ee bikkina ayyim ka ciilichcho i summinne aa'ookkok eesem aa'ookko. Odim eese aa'ookkok ayyim eese asse'ukkokam aa'ookko» yukko.

⁴⁹Yohaannis Yesuusina «Moollanna! Mat manchi ki summinne habusa fissukkuuyyi moo'nnaa niinninne maqire keese awwonoobee'i bikkina fisseena hoollummo» yukko.

⁵⁰Ihukkaarem Yesuus ixxena dabaraa «Ki'nnuwwa saboobee'ek ki'nnuwwan ihu bikkina hoottakkotte» yukko.

⁵¹Yesuus iimane maroo amman hincu ammanenne Yerusaaleema mareena murte'aa ki'ukko.

⁵²Ixxim ixxeensi gaassita'a mattamisina asse'amaano asse'ukko. Oo asse'amaanim hundi luwwam gudisseena Samaare'i gatte matta'a aaggo'o.

⁵³Ihukkaarem Yerusaaleema Yesuus maram hee'u bikkina ee beyyi manni ixxo aa'llo'oyyo.

⁵⁴ Ixxi losaan hee'llo'i Yaaqoobii Yohaannisii eekka moo'llo'i ammanenne «Moollanna! Iimaniinsi giir dillaa[13] ixxuwwa itoo'isa issinona hassoohonnihe?» yito'o.

⁵⁵Ihukkaarem Yesuus ixxuwwi kollonne daba'llaa «Manchi Beet waarukkok manni foore gatiseenatte bagaan bi'iseenayyo» yukko. [14]

⁵⁶Ixxuwwim mulli gatte matto'o.

⁵⁷Mattu'uuyyim googonne hee'llonam mat manchi Yesuusina «At mattoo beyyi hundam keese awwonaa maroommo» yukko.

⁵⁸Yesuusim ixxena dabaraa «Wengereellina bar yookko. Iimaninne bararoo cii'inam do'n yookko. Ihukkaarem Manchi Beetina aagaa usheexxoo beyyim bee'e» yukko.

⁵⁹Yesuusim mulli manchina «Eese awwone» yukko. Ihukkaarem oo manchi dabaraa «Moollanna! Gaassaa maraa iyyanna waammoommo» yukko.

⁶⁰Yesuusim ixxena «Lehu keeno lehu keenim waammona; at uttaa mattaa Waa'i adilla'n woshsha alallaate!» yukko.

⁶¹ Odim mullekim «Moollanna! An keese awwonoommo. Ihukkaarem gaassaa maraa i mi'n manna ‹Xumma hee'llehe› yoommo» yukko.

⁶²Yesuusim dabaraa «Ayyim abuulleena kado'o amadaa laso daba'llaa moo'ookkok Waa'i adillanonne hee'eena labooyyo» yukko.