Read Hadiyya See'l Kitaaba 1 Bible Online

See'l Kitaaba 1 - Hadiyya bible

See'l Kitaaba 1

¹Yoordaanoos daajjiinsi eeqidonne Araba'i udma'anne Suufa yakkam beyyi illagenne Faaraa'n beero'ina, Xoofee'l beero'ina, Laabaa'n beero'ina, Haxeeroot beero'inaa Diizaahaab beero'inaa lambe'enne hee'llu'uuyyi Muse'e Isra'ee'l minaadabina kanniinsi woroon yookkoka kurukko.

²9Eedoo'm duu'n[1] googinne Siina'i duuniinsi ki'isaa Qaadees baarne'enne afeebe'e tommoo mat ballaa massookko.

³Gibxiinsi fitto'i sor hiinchonne tommonnee mat aga'n luxxi ballannee Isra'ee'l minaadabina kurona Waa'i ijaaju luwwi hundam Muse'e ixxuwwina kurukko.

⁴Oohim Haseeboo'n beero'onne ihaa gassam hee'u Amoore'i adil Siihoonaa Astaarootannee Edira'i beero'uwwannee ihaa gassam hee'u Baasaa'n adil Oogaa Muse'e kaa'aa lasonnetti hee'ukko.

⁵Yoordaanoosiinsi eelliinchi fi'l kollinne Moo'aaphphi uullanne hee'llu'uuyyi Waa'ika seera Muse'e.

⁶«Siina'i duunanne hee'nnummi ammane ni Moollanni Waa'i ‹Oono'o, ka duunanne lobakat ammane higissakko'ookko.

⁷Kaba ki'nnuwwi ka wiidda'n beyyiinsi dooyyitakka'a duunaam Amoore'i uullaa ee hegeegonne yoo uulluwwaa Araba'i hansawwinnee qaala'innee, Neegeebinnee Meedeteraaniyaa'n dambalaq gammalinnee aa'llakka'a mallehe. Ee'isam Kana'aana, Liibaanoosaa lob Efiraaxiis daajji afeebe'ee mallehe.

⁸Oon'o, uulloom ki'nnuwwi illagennette; an Waa'i ki'nnuwwi lob anno'ina Abrihaamina, Yisaaqinaa Yaaqoobinaa ee'isam ixxuwwi shumo'inaa uwweena sagara aagummi uulla mattakka'a lago aa'llehe› yaakko» yukko.

⁹Muse'e minaadabina «Siina'i duunanne hee'nnummi ammane ‹An ki'nnuwwa mullam awwonseena xanoommoyyo.

¹⁰Moollanni Waa'i ki'nnuwwika xigo iima'n boollaankisa dutisaakko.

¹¹Kabadem ki'nnuwwi lob anno'ina Moollanni Waa'i ki'nnuwwina uwwu neeyyaxxi saga'llisannem kumaa kaakumaa issaa maasse'ona.

¹²Ihukkaarem ki'nnuwwika fitoo atanaachchoo an mullam hinkid issaa iyyeena xanoommo?

¹³Ee bikkina sulliinsi sulliinsi qooroominne, qoossimminnee lachchinnee la'anto'oo manna doo'llehe; anim ixxuwwa ki'nnuwwina awwonsaan issoommo› yaa hee'ummo.

¹⁴Ki'nnuwwim eehannonne iittantakka'a hee'llakko'o.

¹⁵Ee bikkina annannichchi sulliinsim doo'llitakko'i qooroominnee lachchinnee la'anto'oo keeno aa'aa ki'nnuwwi sullina awwonsaano, shaalaqa, xibbi halaqa, ontayyi halaqaa tommi halaqaa issaa doo'llummo.

¹⁶«Ee ammane ixxuwwina ‹Ki'nnuwwi minaadaphphi lambe'enne ki'oo fitoo atanaachchaa daannantakka'a moo'llehe; ki'nnuwwi midaadinne te'im ki'nnuwwinne hee'oo waaraa'n lambe'enne ki'oo fitoo atanaachcham moo'llakka'a hanqo'i oogato oogattehe.

¹⁷Oogattakkam ammanem golo'llakkotte; labaanninam ihukko hoffaannina ayyi manchinam golo'llakkoo'n oogattehe. Oogato'i Waa'an ihu bikkina ayyem badditakkotte; ki'nnuwwina kee'mmoo luwwi hee'ulas i beyyo eebbehe. Anim ee woshsha guulloommo› yummo.

¹⁸Anim Isra'ee'l minaadab issimmi hasisoo luwwi hundi bikkinam ee ammanem kurummo.

¹⁹«Neese ni Moollanni Waa'i ijaajukkisannem Siina'i duuniinsi ki'nnaa ki'nnuwwi moo'llakko'i baddisoo udma'i ihu duunaam Amoore'i uulli googinne taakke'nnaa Qaadees baarne'e amfummo.

²⁰Ee ammane an ‹Waa'i niina lago aa'iseena neeyyaxxi sagara aagu Amoore'i duunaam uulla affakko'ookko.

²¹Moo'llehe, ki'nnuwwi Moollanni Waa'i ka uulla ki'nnuwwina uwwaakko. Ki'nnuwwi anno'ina Moollanni Waa'i yukkisannem aaggakka'a lago aa'llehe; badditakkottee muggitakkottee› yummo.

²²«Ihukkaarem ki'nnuwwi i beyyo waattakka'a ‹Ee uulla shaashshitam manna higinsaa asse'nnona. Ixxuwwim ee uulla neese afisoo xabbee'n googoo hinkido'i beero'uwwim yooda'ee qoossita'a moo'lla'a niina kuteena xantamo› yitakko'o.

²³«Ookki iina eroka labaa moo'amu bikkina annannichchi sulliinsim mat mat mancho doo'llaa tommoo lam manchoo asse'ummo.

²⁴Ixxuwwim ee duunaam uulli afeebe'e matta'a Eshkoo'l cebbi afeebe'e shaashshita'a waatto'o.

²⁵Ee uulli mishiinsim hoffokam amadda'a waatta'a ‹Ni Moollanni Waa'i niina uwweena qoodu uulli lobakata harisha› yita'a kutto'o.

²⁶«Ihukkaarem ki'nnuwwi Waa'ina ijaajancha sabimminne ee uulla mattakkeena hassakko'oyyo.

²⁷Ki'nnuwwim ki'nnuwwi dukkaannuwwi woronnette ikkakka'a ‹Waa'i neese sabaakko; Gibxi uulliinsi fissukkokim ku Amoore'i manni shitona ixxuwwi anganne higisaa uwweena hasaatette.

²⁸Eehidette ihulas eekke'e malloommok mahinate? Niyyabbaayyuwwi niina «Ee uulli manni niinninsi lophphitam malaayyaammuwwaa qeeraa'lluwwaa ixxuwwi beero'uwwim haraaraa kininne girbamaakkoohanee ihukkisaa ee'isam Eenaaq oosoo eekke'enne moo'nnaammo» yita'a baddisoo woshsha kutto'ookko› yitakka'a quunquuntakko'o.

²⁹«Ihukkaarem an ki'nnuwwina ‹Ee minaadaba badditakkotte; hambalaachchantakkottem.

³⁰Ki'nnuwwa awwonsoo Moollanni Waa'i Gibxi uullanne issukkuuyyi moo'llakko'isam ixxi ki'nnuwwi bikkenne oramookko.

³¹Mat manchi ixxi beeto abooyyoo'isam ki'nnuwwi Moollanni Waa'i udma'i uullanne ki'nnuwwa abooyyukkuuyyi ka beyyo xumminne hinkid affakkoda'e moo'llakko'ookko› yummo.

³²Ihukkaarem ki'nnuwwina wiiddantakkam beyyo siiddakkonaa mattakkam googo moo'iseenaa ballaa duuphphi utubinne hiimoo gii'l utubinne awwonsu ki'nnuwwi Moollanni Waa'anne amma'nnantakko'oyyo.

³⁴«Waa'im ki'nnuwwi quunquuntakku'uuyyi laattakko'i laachcha macceesaa quuqukko. Ee bikkina Waa'i

³⁵‹An ki'nnuwwi lob anno'ina uwweena neeyyaxxi sagara agaa hee'ummi ka er uulla ka boqqi qaranchiinsi ayyim aagooyyo.

³⁶Ee er uulla aageena xanookkok xale'i Yaafun beet Kaaleebatte. Ixxi eesenne hanqo'i wodaninne amma'nnamu bikkina ee ixxi do'aa moo'u uulla ixxenaa ixxi shumo'inaa uwwoommo› yaa hide'aakko.

³⁷Ki'nnuwwi mashka'inne Waa'i eesenne quuqaa ‹Muse, atim ee uulla aaggooyyo.

³⁸Ihukkaarem kiina hara'mmaanchi ihu Naawe'i beet Iyyaas ee uulla aagookko; Isra'ee'l oos ee uulla lago aa'llona awwonsoo bikkina ixxo qoxxise› yukko.

³⁹«Ee lasage Waa'i niina hundinam ‹Ni diina'i qeefaddamo› yitakko'i ki'nnuwwi ciilluwwii erokaa joraa annanni issita'a laqqambe'i oosii xale'i ee uulla aaggamo. Ee uullam ixxuwwina uwwoommo; ixxuwwim ee uulla lago aa'llamo.

⁴⁰Ihukkaarem ki'nnuwwi Ertiira'i Dambalaqa moo'oo kollinne yoo googinne udma'i uulla daba'llitakka'a mallehe› yukko.

⁴¹«Ki'nnuwwim ‹Muse, neese Waa'a hawwondaammo; ihukkaarem kaba ni Moollanni Waa'i neese ijaajukkisanne orammoommo› yitakka'a dabattakko'o. Duunaam uulla marakka'a oranchi sholle'aalla labissakka'a ki'nnuwwi annannichchim o'l mu'uta amaddakka'a ki'llakko'o.

⁴²«Ihukkaarem Waa'i ‹An ki'nnuwwinne maqire firoombee'i bikkina orina mattakkotte. Sabbakka'a mattakkolas diina'i anganne kaa'antakkamo› yitaa kure.

⁴³Waa'i kure yukkoka hundam ki'nnuwwina kurummo; ihukkaarem ki'nnuwwi macceesimma sabbakko'o. Ixxenam ijaajancha sabbakka'a bolximminne duunaam uullanne gaaddakko'o.

⁴⁴Ee duunaam uullanne hee'llam Amoore'i gogot hundim diishshisa wixxita'a ki'nnuwwi hanenne waatto'o; Hoorim afeebe'em ki'nnuwwa hollita'a duunaam Eedoo'm uullanne kaa'llo'o.

⁴⁵Ee bikkina ki'nnuwwi Qaadees Barne'e daba'llitakka'a Waa'i kollonne laattakku'uuyyi wi'llitakko'o. Ihukkaarem ki'nnuwwika laachcha macceeseenaa ki'nnuwwina hara'mmeenaa hasukkoyyo.

⁴⁶Ee bikkina Qaadees anne lobakat ammane afuuttakko'o.