Read Hadiyya See'l Kitaaba 10 Bible Online

See'l Kitaaba 10 - Hadiyya bible

See'l Kitaaba 10

¹«Ee lasage Waa'i iina ‹Illaageen iiqamukkaanni'nnoo'i lam ki'n ba'lla cabbattaa gudise; ee ba'lluwwa dissakkam Saaxinam haqqinne baxe. Atim an yoommi duuna fire.

²Anim luxxeka iiqqitti ki'n ba'llanne hee'u ijaajjuwwa la'm korem kitaaboommo. Atim saaxi'n woronne dissitootto› yukko.

³«Anim giraa'l haqqinne Saaxina baxummo; iiqamukkoka laboo lam ki'n ba'llam cabbaraa gudisummo. Ee lamem ki'n ba'llam amadaa duuna firummo.

⁴Waa'im duu'n lugumonne wixxitakka'a hee'llakko'i balla gii'l woronne ihaa ki'nnuwwina kuru tommem ijaajjuwwam luxxeka kitaabukkisam ka ba'lluwwannem kitaabukko. Ee kitaabu ba'lluwwam iina uwwukko.

⁵Anim duuniinsi daba'llaa dillaa Waa'i eese ijaajukkisanne ee ba'lluwwa saaxi'n woronne dissummo. Ee ammaniinsi ki'isaa oono'o, saaxi'n woronne yookko.

⁶Isra'ee'l oos Been Yaa'iqaa'n manni wo'i ba'l beyyiinsi ki'lla'a Mooseera matto'o. Aaroonim ee beyyonne lehaa eekke'em waammamukko; ixxi beyyonnem ixxi beet Ali'aazar qeessichchi ihukko.

⁷Ee beyyiinsi ki'lla'a Gudgooda yakkam beyyo matto'o. Ee lasage daadoo wo'i hee'oo Yoxbaata yakkam beyyo matto'o.

⁸Ee ammane Waa'ika Hidi'l Saga'l Saaxina iyyitona, ixxi illagennem uullita'a awwaadonaa Waa'i summinne minaadaba maasse'llonaa Leewi'i shumo'o annanni issaa doo'llukko. Kaballi afeebe'em Leewi'i shumo'ik awwaad eehane.

⁹Leewi'i shumo'ina mulli abbaayyuwwisa uulli sharad uwwamubee'ek ee bikknatte. Ki'nnuwwi Moollanni Waa'i gaassaa wocukkisam qeessuwwi ikka'a awwaaddam bikkina Waa'i ixxi gagim Leewi'i oosina gulumma.

¹⁰«Anim kanniinsi illageen issummisam duunanne odim sor ballaa sor hiimoo Waa'a uunxummo. Odim Waa'i i uunxato macceesaa keese bi'isimma urukko.

¹¹Ee lasage ‹Kaba mare. Ixxuwwi gaassi anno'ina uwwummi neeyyaxxi saga'llisanne ee uulla ixxuwwi gagina gulummi issita'a lago aa'llona minaadaba awwonse› yukko.

¹²«Ee bikkina Isra'eela, ki Moollanni Waa'a badditona, ixxi googonne mattona, iittitona, kihaanninne wo'm wodaninnee tiirinnee otossitona ki gatimmi bikkina an kaballa keese ijaajoommi ki Moollanni Waa'i ijaajoo Seeraa egettonatte bagaan ixxi kiinniinsi hasoo mulli luwwi mah hee'aate?

¹⁴Iimanii iimaniinsi hanaan yoo iimannuwwii uullii uullanne yoo luwwi hundimii Waa'ane.

¹⁵Waa'i gaassi kiyyanno'o lobakata iittam hee'u bikkina keesem kaballa lobakat minaadaphphi lambe'iinsi doo'llaakko. Atim kaballi afeebe'e doo'llantaattoo ixxi minaadaba.

¹⁶Ee bikkina ka lasage ki'nnuwwika wodano duudisimmaa xiiqqanchaa uttakka'a Waa'ina ijaajammehe.

¹⁷Ki'nnuwwi Moollanni Waa'i qophpha'n waa'uwwiinsi hundiinsimii malaayyuwwiinsi hundiinsimii hanaan lobanee malaayyaamoo ihu bikkina baachchinne lonsimmi hasisoohane. Ixxi oogato boqqisoobee'ane; maqanxam aa'oobee'ane.

¹⁸Ixxi annii amaa bee'i adaraar oosinaa aro'i lehu meentinaa hanqo'isa oogatoohane. Ni minaadaphphi lambe'enne hee'llam waaraanom iittoo bikkina ittam hurbaataa eddechchaa uwwoohane.

¹⁹Ee bikkina ki'nnuwwim ee waaraanina ki'nnuwwi iitto moo'isimmi hasisookko. Ki'nnuwwim Gibxi uullanne waaraan hee'llakko'o.

²⁰Ki Moollanni Waa'a baddimminne ixxena ijaajame; xale'i ixxenam otossihe. Ixxena amma'nnantaattoohan ikkaa xale'i ixxi summinne hide'e.

²¹Ixxi kiina Waa'a. Ixxi kiina issu lob maalalsiisoo luwwi hundam ki illinne moo'llitti bikkina hundi ammanem galaxxe.

²²Gaassi kiyyanno'i Gibxi uulla matto'i ammane xale'i lamarayyi manchi hee'llo'o. Ihukkaarem kaba ki Moollanni Waa'i keese iima'n boollaanki qaxa fikkaannisaakko.