Read Hadiyya See'l Kitaaba 11 Bible Online

See'l Kitaaba 11 - Hadiyya bible

See'l Kitaaba 11

¹«Ee bikkina ki Moollanni Waa'a iitte; ixxi kiinniinsi hasoo seera, ogoraa ijaajoo hundi ammanem egere.

²Ki'nnuwwi oos moo'llobee'anee laqqambee'anee ihuta'nnimii ki'nnuwwi Waa'ika axeellano, lobaannooma, malaayyee daannoomaa moo'llakko'an ihukkisa kaballa sawwi'llehe.

³Ixxi Gibxi uulli adilannee ee uullannee issu maalalsiisoo baxoo agannaa hundam moo'llakko'ookko.

⁴Gibxi uulli gogot ki'nnuwwa hollito'i ammane ixxuwwa faradinnee faraxxi gaarre'innee maqirem Ertiira'i Dambalaqanne xuuxantamisa issaa Waa'i guullukkisa moo'llakko'ookko.

⁵Ki'nnuwwi keyye affakkeena illageen Waa'i ee udma'i uullanne maha issuda'e laqqakkamo.

⁶Roobeel sulliinsi Eeli'aabina oos ikko'i Daataanannee Aberoonannee issukkoka sawwi'llehe. Isra'ee'l oos hundim ixxuwwi illinne moo'llu'uuyyim uulli fooqaa ixxuwwa, ixxuwwi abaroosa, ixxuwwi dukkaannuwwaa ixxuwwan ihu foor yoo luwwi hundamii xuuxukko.

⁷Waa'i issu ka lob baxo hundam ki'nnuwwi illinnem moo'llakko'oko.

⁸«Ki'nnuwwan issitakka'a lago aa'llakkam uulla Yoordaanoos daajje fittakka'a amaddakkeena malaayye siidimmina an kaballa ki'nnuwwa ijaajoommi ijaaj hundam egellehe.

⁹Ee ijaajjuwwam egettakkolas Waa'i gaassi ki'nnuwwi anno'inaa ixxuwwi shumo'inaa uwweena sagara aagu adii marabii wo'mmaakkoo ee harish uullanne lobakat doolle hee'llakkamo.

¹⁰Ku lago aa'llakkam uulli kanniinsi illageen hee'llakko'i Gibxi uulli'nnoohaneyyo. Gibxanne hurbaata wixxakka'a lasage duubbi kaashshisa wixamu hurbaatanne wo'o agissakkeena boohe'e lokkinne fissitakkam hee'llakko'o.

¹¹Ihukkaarem Yoordaanoos daajje fittakka'a lago aa'llakkam uulli duunnuwwii cebbuwwii yoohan ihaa xeen ga'nnaa aashisoohane.

¹²Ki Moollanni Waa'i ka uulla hiinchi hundoomam abooyyoohanee egeroohanee.

¹³«Ee bikkina an kaballa ki'nnuwwa ijaajoommi seer hundam egellehe; ki'nnuwwi Moollanni Waa'am iittehe; ki'nnuwwi wo'm wodaninnem ixxena awwaaddehe.

¹⁴Eehamdu issitakkolas Waa'i ki'nnuwwina qaraax amma'nnekaa hagayyikaa xeena ammaninne ga'nnisookko. Ee'isinne ichchina ihoo hurbaata, woyi'n diqaasa, wee'l zaytaa

¹⁵ki'nnuwwi diinatina ihoo hixee lonsaa uwwookko; hasisoo hurbaata hundam siiddakkamo.

¹⁶Waa'iinsi qee'llitakka'a mulli waa'uwwina awwaaddakkeenaa otossitakkeenaa laso daba'llitakkambee'isa ege'llehe.

¹⁷Eehamdu issitakkolas Waa'i ki'nnuwwanne quuqookko. Iimane xufaa xeen ga'nnoobee'isaa uullanne hurbaat mishoobee'isaa issookko. Waa'im ki'nnuwwina uwwoo uulliinsi qaqqissakka'a bi'llakkamo.

¹⁸«Ka ijaajjuwwa hundi ammanem ki'nnuwwi wodanonnee ki'nnuwwi tiironne dissehe; ki'nnuwwi angannee miinennee mare'i issitakka'a kallehe.

¹⁹Ki'nnuwwi oosina losissehe; minenne afuuttakkam ammane te'im goog taakke'llakku'uuyyii usheexxitakkam ammanem ihukko baxxakkam amman hundamii ee bikkina woccehe.

²⁰Ki mi'nnaannonnee ooxxaannonnee goocanne kitaabe.

²¹Eehamdu issitakkolas ki'nnuwwi Moollanni Waa'i ki'nnuwwi gaassi anno'ina uwweena hide'aa sagara aagu uullanne ki'nnuwwikii ki'nnuwwi oosikii umur uulliinsi hanaan yoo iima'nnisa qeeraa'llookko.

²²«Ee bikkina an ki'nnuwwina uwwummi ijaajjuwwa qoxxitakka'a egellehe; ki'nnuwwi Moollanni Waa'a iittehe; ixxi googonnem mattakka'a ixxena amma'nnantakko'oo keen ikkehe.

²³Eehamdu issitakkolas Waa'i ka ki'nnuwwiinsi xigonne dutaa malaayyaammuwwaa ikko'i minaadaphphi uulla lago aa'llakkamo; illagenne hee'llam minaadaba hundam fissookko. Ki'nnuwwim malaayyinnee wodinnee ki'nnuwwiinsi hore'em lophphitam minaadaphphi uulla lago aa'llakkamo.

²⁴Ki'nnuwwi higgakku'uuyyi ki'nnuwwi lokkinne hancaaccakkam uulli hundim ki'nnuwwan ihookko. Ki'nnuwwi gaassi uullim woroo'n qarinne hee'oo udma'i uulliinsi ki'isaa hanaa'n qarinne hee'oo Liibaanoos uulli duunnuwwa, ee'isam eelliinchi firinne hee'oo Efiraaxiis daajjiinsi ki'isaa eelliinchi aagginne hee'oo Meedeteraaniyaa'n dambalaq afeebe'e haraarookko.

²⁵Ee uullanne ki'nnuwwi mattakkam beyyi hundannem Moollanni Waa'i ki'nnuwwina uwwu neeyyaxxisanne minaadab hundim ki'nnuwwa baddoo'isa issookko. Ki'nnuwwinne uullixxameena xanookkokim hore'em hee'ooyyo.

²⁶«Oono'o, an kaballa ki'nnuwwi illagenne maassoo duunchaa lamom dissoommo.

²⁷Kaballa an ki'nnuwwina uwwoommi ki'nnuwwi Moollanni Waa'i ijaajjuwwa hundam egettakkolas maasso siiddakkamo.

²⁸Ihukkaarem kanniinsi illageen laqqakkambee'i mulli waa'uwwa awwontakka'a ka ijaajjuwwa egettakkambee'an ihulas duunchi ki'nnuwwanne ihookko.

²⁹Waa'i at lago aa'lloo uulla aagisoo ammane at maassoo Garzaa'n duunanne, duunchaa odim Eebaa'l duunanne alallaattootto.

³⁰Ku duunnuwwim Yoordaanoosiinsi eeqidonne eelliinchi aagginne Arabanne hee'llam Kana'aa'n manni uullanne Gelge'l illagenne hee'oo Moore'i haqqi gadanonne hee'oo keeno.

³¹Ki'nnuwwi Moollanni Waa'i hee'llakkona ki'nnuwwina uwwu uulla lago aa'llakkeena Yoordaanoosa higgakka'ahii ki'nnuwwi gulummi issitakka'ahii hee'llakkam ammane

³²kaballa an ki'nnuwwina uwwoommi Seeraa ogoraa hundam erisa egellehe.