Read Hadiyya See'l Kitaaba 12 Bible Online

See'l Kitaaba 12 - Hadiyya bible

See'l Kitaaba 12

¹«Gaassi ki'nnuwwi anno'ina Moollanni Waa'i ki'nnuwwina uwwoo uullanne hee'llakkam doollenne hundannem qoxxitakka'a egettakkam seerii gatti ogorii,

²ki'nnuwwi lago aa'llakkam uullanne hee'oo minaadab duunnuwwaannonnee hujuphphi haqqi lugummuwwannee ixxuwwi waa'uwwina otossitam beyyuwwa hundam bi'issehe.

³Kitima hincaa'llam beyyuwwam gindansehe; otossakkam beyyi utubbuwwa xaansehe. Asheera yakkam qophpha'n waa'i misilluwwa hundam giirinne shokkiissehe; cabbarakka'a axisakko'i waa'uwwam iiqansehe; ixxuwwi summim od tiiramoobee'isa issehe.

⁴Moollanni Waa'ina ki'nnuwwi otossitakkamis hanqo'i Waa'a laqqambee'i minaadab ixxuwwi waa'uwwina otossitamis ihimmi hasisooyyo.

⁵Moollanni Waa'i hundem sulli lambe'iinsim ixxena heechchi beyyi ihoo'isinaa ixxi summim weeshamoo'isinaa doo'lloo beyyo hassakka'a mallehe.

⁶Eekke'em shokkiisakka'a hincaa'akkam kitimaa mulli kitimaa, tommiinsi matoo Waa'ina annannisinne uwwitakkam luwwaa, uga'aa gaqqi doo'llinne uwwitakkam luwwaa, la'llekaa gereebbikaa wona hincaa'llakkamo.

⁷Eekke'em maasse'u ki'nnuwwi Moollanni Waa'i illagenne ki'nnuwwii ki'nnuwwi abaroos wixxitakka'a ittakkamo. Badattakka'a siiddakkam er luwwi hundannem liirantakkamo.

⁸Oo amman afoohaare kabe'e afeebe'e issitakkamisa issitakkamoyyo. Oono'o, kaballi afeebe'e hassakko'oka issitakkam hee'llakko'o.

⁹Moollanni Waa'i xumminne ki'nnuwwi usheexxitakka'a hee'llakkona uwwoo uulla aaggakko'oyyome.

¹⁰Moollanni Waa'i ki'nnuwwina uwwoo uullanne hee'llakkeena Yoordaanoos daajje fittakka'a mattakkamo; xumminne hee'llakkonam ki'nnuwwi kululleetanne hee'oo diina'i hundiinsim ki'nnuwwa usheexxisookko.

¹¹Ee lasage an ijaajummi luwwi hundam eebbakkamok ki'nnuwwi Moollanni Waa'i ixxi summina doo'llu beyyonnetti ihookko. Oohim shokkiisakka'a hincaa'akkam kitimaa mulli kitimaa hundam, tommiinsi matoo Waa'ina annannisinne uwwitakkam luwwa, uga'aa gaqqi doo'llinne uwwitakkam luwwaa eebbakkamo.

¹²Ki'nnuwwi oosinne, ki'nnuwwina awwaaddam awwaadaaninnee ee'isam ki'nnuwwinne maqire ixxuwwina uulli sharad bee'i ki'nnuwwi beero'uwwanne hee'llam Leewi'i oosinnee ki'nnuwwi Moollanni Waa'i illagenne liirantakkamo.

¹³Shokkiisakka'a hincaa'akkam kitima hannonnem hincaa'llakkambee'isa ege'llehe.

¹⁴Ihukkaarem shokkiissakka'a hincaa'llakkam kitimii an ijaajoommok hundimii ki'nnuwwi sulli lambe'iinsi Waa'i doo'lloo xale'i mat beyyonnetti ihimmi hasisookko.

¹⁵Ihukkaarem hassakko'i amman hundam Moollanni Waa'i ki'nnuwwa maasse'ukkisinne ki'nnuwwi beero'uwwanne ayyi beyyonnem duttakka'a ittakkeena xantakkamo. Saaro'ikaa kukkussikaa maara itoo'isam muccuram ihukko muccur ihubee'i ayyi manchim ee maaram iteena xanookko.

¹⁶Ihukkaarem wo'isa uullanne dunnehe bagaan xiiga ittakkotte.

¹⁷Waa'ina kitim issitaa hincaa'lloo luwwa at hee'lloo ayyi beyyonnem ittitte. Oohim wixxoo hurbaaxxeka, woyi'n diqaasika, wee'l zaytiinsi uwwitakkam tommiinsi mato te'im lariinsii gereebbiinsii uwwakkam wona, uga'aa gaqqi doo'llinne uwwitakkam luwwaa ki'nnuwwi hee'llakkam ayyi beyyonnem ittakkotte.

¹⁸Ee keeno ki'nnuwwi Moollanni Waa'i doo'lloo beyyonne oosinne, ki'nnuwwina awwaaddam awwaadaaninnee ki'nnuwwinne beero'uwwanne hee'llam Leewi'i oosinnee maqirem ittehe. Eekke'em baxxakka'a siiddakkam er luwwi hundannem liirantakkamo.

¹⁹Ki uullanne hee'lloo doollenne hundannem Leewi'i ooso xaddoobee'isa ege'llehe.

²⁰«Waa'i ki'nnuwwina uwwu neeyyaxxisanne hee'llakkam uulla haraassoo ammane ki'nnuwwina heele'isu amman hundam maara ittakkeena xantakkamo.

²¹Ihukkaarem Waa'i doo'llu oo mat beyyi qee'l ihulas maara ittakkeena hassakkam ammane Waa'i ki'nnuwwina uwwu lariinsi te'im gereebbiinsi doo'llitakka'a ki'nnuwwi minenne an ijaajummisanne duttakka'a ittakkeena xantakkamo.

²²See'llisinne muccurukkanem ihukko muccurubee'i ayyi manchim saaro'ika te'im kukkussika maara itoo'isam ee maaram itona.

²³Ihukkaarem foor hee'ookkok xiigannette ihu bikkina xiig yoo maara itimmiinsi ege'llehe. Ee bikkina foore maarinne maqire ittakkotte.

²⁴Xiiga ittakkotte; ihukkaarem ixxo uullanne wo'isa dunnehe.

²⁵Kiinaa ki shumo'inaa er luwwi ihona hassakkolas xiiga ittakkotte; ki'nnuwwi eekka issimmannem Waa'i ki'nnuwwanne liiramookko.

²⁶Ee bikkina keesamaakkoo kitimaa uga'aa doo'llamu xale'e ee beyyo massehe.

²⁷Shokkiissakka'a Waa'ina hincaa'llakkam kitima, oohim maaraa xiigaa hundam ki'nnuwwi Moollanni Waa'ina kitima hincaa'akkam beyyi hanenne hincaa'llehe. Mulli kiti'mmek xiig ee kiti'm beyyi gadanonne dunamona; ihukkaarem maarooma ittakkeena xantakkamo.

²⁸Ki'nnuwwinaa ki'nnuwwi shumo'inaa heer heerina er luwwi ihona an kaballa ijaajoommi ijaajo hundam erisa egellehe. Ee'isa issitakkam ammane ki'nnuwwi Moollanni Waa'i illagenne erokaa xabbeen luwwaa issitakko'aannisa.

²⁹«Ki'nnuwwi mulli minaadaphphi uullanne orantakkam ammane ki'nnuwwi Moollanni Waa'i ki'nnuwwinne oramoo minaadaba bi'isookko. Ki'nnuwwim ee minaadaphphi uulla lago aa'llakkamo.

³⁰Oo minaadab bi'aa lasage ixxuwwi baxo baxxakka'a qaashanne aaggakkotte. ‹Neesem ixxuwwisam issinoommo› yimminne ‹Ku minaadab ixxuwwi waa'uwwina otossam hee'ukkok hinkidette?› yitakka'a xa'mmitakkotte.

³¹Ki'nnuwwi Moollanni Waa'ina otossitakkamok ku minaadab ixxuwwi waa'uwwina otossitamaannisa ihimmi hasisooyyo. Ixxuwwi ee waa'uwwina otossitam ammane issitam luwwi hundim lobakata shigigaa'oohanee Waa'i illagenne sabamaakkoohanee. Mullek gataa ixxuwwi gaqqi oosom kitima hincaa'llam beyyonne ixxuwwi waa'uwwina giirinne shokkiissamane.

³²«Ee bikkina an ki'nnuwwa ijaajummoka hundam issehe. Ixxonnem maham eddakkotte te'im ixxeensi ma'llichchom xa'issakkotte.