Read Hadiyya See'l Kitaaba 13 Bible Online

See'l Kitaaba 13 - Hadiyya bible

See'l Kitaaba 13

¹«Ki'nnuwwi lambe'iinsi hiraagaanchi te'im kaalta moo'oo manchi ki'aa ‹Aganna te'im maalalsiisoo mare'e issoommo› yeena xanookko.

²‹Issoommo› yukkisam aganna te'im maalalsiisoo luwwa issuta'nnii ki'nnuwwam laqqakkambee'i mulli waa'uwwina awwaandonaa otossinonaa yuta'nnii

³ki'nnuwwi Moollanni Waa'i wo'm wodaninne ixxo iittitakkamda'e la'eena hasaa asse'aakkoohan iheena xanoo bikkina ee hiraagaancho te'im kaalta moo'oo mancho macceessakkotte.

⁴Ki'nnuwwi Moollanni Waa'a awwonnehe; xale'i ixxom baddehe; ixxi ijaajjuwwam egellehe; ixxi sagaram macceessehe. Ixxenam otossi'llehe; ixxenne maqire yoo mateeyyoomam qoxxissehe.

⁵Agiddanonne hee'llakko'i Gibxiinsi wolabbanonne fissaa gatisu Waa'anne boqqitakkammisa issoo kaalta moo'oo te'im hiraagoo mancho shi'llehe. Eehido'i manchi qoxxitakka'a hee'llakkona Moollanni Waa'i ijaaju googiinsi annanni isseena qoodaakkoohane. Ee bikkina eehido'i jor luwwa ki'nnuwwi lambe'iinsi bi'issehe.

⁶«Abbisonnem ihukko qee'llonne te'im uulli tochchiinsi tochchi afeebe'e hee'oo hanqo'i Waa'a la'oobee'i minaadaphphi waa'uwwiinsi matina ‹Mallaa otossinona› yaa kiyyabbaayyi, ki beet te'im ki landichcho, at iittitoo ki are te'im kiina hincixxi beshichchi maaxaqqanne keese gafe'anseena xanookko.

⁸Ihukkaarem eehido'i manchi ki'nnuwwa qawwiisona ha'yyitakkotte. Ixxi wocoo woshsham macceessakkotte. Ixxena qishixxitakka'a te'im urato issitakka'a ixxi foore gatissakkeena yakitakkotte.

⁹Maham mallantakkoo'n lehoo'isa issehe; hore'oomam ixxonne kina huushshakkeena luxxan ikkehe. Mulli manni ayyim hara'mmamaa kininne aphphisaa shihona.

¹⁰Agidda'n uullanne Gibxanne hee'llakko'i beyyiinsi wolabbanonne fissu ki'nnuwwi Moollanni Waa'iinsi qeesseena hasaakkoohan ihu bikkina leheebe'i afeebe'e kininne aphphissehe.

¹¹Ee lasage Isra'ee'l minaadab hundim ee woshsha macceessa'a badditamo. Ee bikkina eehido'i jor luwwa isseena sawwookkok od hee'ooyyo.

¹²«Ki'nnuwwi Moollanni Waa'i ki'nnuwwi hee'llakkona uwwu beero'uwwiinsi matonne jor manni ki'nnuwwi lambe'iinsi ki'aa ee beero'i manna ki'nnuwwi laqqakkambee'i mulli waa'uwwina ‹Mallaa otossinona› yita'a bichchi googonne awwonsita'a massito'isa macceessakkeena xantakkamo.

¹⁴Ki'nnuwwi ee woshsha macceessakka'a lasage ee bikkina xa'mmitakka'a erisa saarayyehe. Ku jor luwwi ki'nnuwwi lambe'enne ihukkisa qoossitakka'a laqqakkolas,

¹⁵Ee beero'onne hee'oo mannaa ixxuwwi fooraam diinatee hundam shi'llehe; ee beero'om hore'oomam bi'issehe.

¹⁶Ee beero'i manni amaxxa hundam wixxaa'llaakka'a wottakka'a ee beero'i wixxixxi beyyonne naallehe. Ee lasage ee beero'oo ee beero'i amaxxi hundamii ki'nnuwwi Moollanni Waa'ina kitim issitakka'a giirinne shokkiissehe. Oo beero'im od daba'llaa baxamoobee'isa heer heerinam gindamaakkoohan ihona.

¹⁷Waa'i baddisoo quunqiinsi daba'llaa ki'nnuwwina qishixxato issoo'isinaa iittoo'isinaa ee beero'i amaxxiinsi maham ki'nnuwwi gagina gatissakkotte. Eekka issitakkolas gaassi ki'nnuwwi anno'ina aagu hidi'l saga'llisanne ki'nnuwwika xigo lonsookko.

¹⁸Kaballa an ki'nnuwwina uwwummi Waa'i ijaajjuwwa egettakkolasii ixxi ki'nnuwwiinsi hasoo luwwi hundam issitakkolasii ku neeyyat hanqo'isam wo'mmookko.