Read Hadiyya See'l Kitaaba 15 Bible Online

See'l Kitaaba 15 - Hadiyya bible

See'l Kitaaba 15

¹«Diinate liqaayyissakko'i manni hundikam lama'l hiinchi lama'l hiinchi lasaanchonne badano miqisimma ullehe.

²Eekka urimmi seerim Isra'ee'l moollina diinate liqaayyisukkok ayyim ee liqaayye urona. Waa'i ‹Badano urimmi hiincho› yaa alallaataakkoo hiinchi ihu bikkina ixxena moolli ihu Isra'ee'l manchiinsi badano miqisoone.

³Mulli uulli mannina liqaayyissakko'i diinate xa'mmitakka'a miqissakkeena xantakkamo. Ihukkaarem ki'nnuwwi moolli ihu Isra'eelina liqaayyissakko'oka dabarona xa'mmitakkotte.

⁴«An kaballa ki'nnuwwa ijaajoommi ijaaccisinne ki'nnuwwi Moollanni Waa'ina ijaajantakkolas ixxi ki'nnuwwa lonsaa maasse'oo bikkina gulummi issaa uwwoo uullanne ki'nnuwwanne buxichchi hee'ooyyo.

⁶Waa'i ki'nnuwwina uwwu neeyyaxxi saga'llisanne maasse'ookko. Ki'nnuwwi lobakat minaadabina liqaayyissakkamo; ihukkaarem ki'nnuwwi ixxuwwiinsi matiinsim liqaayye aa'llakkamoyyo. Lobakat minaadabiinsi hanaanette ikkakkamo; ihukkaarem ki'nnuwwiinsi ayyim hanaan ihooyyo.

⁷«Moollanni Waa'i ki'nnuwwina uwwoo uullanne hee'llakkam beero'uwwi hundannem Isra'ee'l oosiinsi mat hawwaa moo'llakkolas ixxi ki'nnuwwina abbaayyi ihu bikkina ixxena moggakkotte; diinatem hoottakkotte.

⁸Ixxena hasisoo luwwi hundam biijoominne liqaayyissehe.

⁹‹Badano urakkam lama'l hiinchi afaakko› yitakka'a ixxena liqaayye hoottakkotte. Eehido'i jor sawwitim ki'nnuwwi wodanonne hee'oone. Ki'nnuwwi ixxena liqaayye hoottakka'a lasage oo manchi Waa'i kollonne laaruta'n oo woshshi ki'nnuwwanne hawwojjisa xigamookko.

¹⁰Ee bikkina ki'nnuwwi ixxena biijoominne uwwehe. Eehid issitakkolas Moollanni Waa'i ki'nnuwwa baxxakkam luwwi hundannem maasse'ookko.

¹¹Hinki ammanem uullanne hawwaanchii buxichchii bee'oobee'i bikkina ki'nnuwwi uullanne hee'oo buxinaa hawwaaninaa biijoominne uwwitakkona ijaajoommo.

¹²«Isra'ee'l oosiinsi mat manchi goonam ihukko meenti ixxi gaga agishshi issaa kiina biteesuta'n loh hiincho kiina awwaadaa lasage lama'l hiinchina fatakihe.

¹³Ixxo fatakitoo ammane kora'i angam geegeessitte.

¹⁴Waa'i kiina uwwu maassiinsi lariinsi, hurbaatiinsii woyi'n mishiinsii biijoominne uwwe.

¹⁵Ki'nnuwwim Gibxi uullanne agid ikkakka'a hee'llakko'isaa ki'nnuwwi Moollanni Waa'i agiddaniinsi fissukkisaa sawwi'llehe. Anim kaballa ki'nnuwwa ijaajoommok ee bikkinatte.

¹⁶«Ihukkaarem ki agishshi keesee ki abaroosaa iittaahii kiinninnem shiinnaatamaahii mareena hasubeelas

¹⁷ixxo ki'nnuwwi mi'n goocanne bakkiissakka'a ixxi macce mutinne luffehe. Ee lasage ixxi umu'l doolli hundannem ki'nnuwwina agishshi ihookko. Meenti agidom eehid issehe.

¹⁸Ixxo wolabbano firona fatakitoo ammane lam suume kiina loh hiincho hundam awwaadu bikkina kichche'llitte. Eehid issitlas Waa'i baxxoo bax hundannem keese maasse'ookko.

¹⁹«Ki'nnuwwi lariinsi te'im gereebbi allaachchiinsi won ihu ambula te'im labeena Moollanni Waa'ina annanni ihaakkoohan issehe. Won ihu mirgo'uwwa hundam mahinam awwaaxxitakkotte; ee'isam gereebbi allaachchi woniinsi odda muttakkotte.

²⁰Ee keeno Waa'i doo'lloo beyyonne hiincho hiinchonne ki'nnuwwi Moollanni Waa'i illagenne ki'nnuwwi abaroosinne maqirem ittehe.

²¹Ihukkaarem oo diinat miiqakkam luwwi yoohan ihaa oohim shiih te'im qooq ihaa te'im lophphaakkoo haashaarammi luwwi ihulas ixxuwwa ki'nnuwwi Moollanni Waa'ina kitim issitakka'a hincaa'llakkotte.

²²Eehido'i diinate ki'nnuwwi minenne ittakkeena xantakkamo. See'llisinne muccuttakko'oo te'im muccuttakkobee'an ihuta'nnim gaallichchoo gibbichchoo ittakkamisa ee keenom ittehe.

²³Ihukkaarem xiiga hurbaaxxisa issitakka'a ittakkotte; wo'isa uullanne dunnehe.