Read Hadiyya See'l Kitaaba 19 Bible Online

See'l Kitaaba 19 - Hadiyya bible

See'l Kitaaba 19

¹«Moollanni Waa'i ki'nnuwwina uwwoo uullanne hee'llam minaadaba guulloohaare ki'nnuwwi ee minaadaphpheka beero'uwwaa minneewwaa lago aa'llakka'a ee uullanne hee'imma ashsheettakkam ammane

²Moollanni Waa'i ki'nnuwwina uwwoo uulla sas beyyonne baxxansitakka'a ee sasem baxxanchi woronnem lambe'i ihoo beyyonne mat mat beero'o doo'llitakka'a annanni issehe. Ee beero'uwwa marakkam googguwwam baxxakka'a axissehe. Ee lasage manna shu manchi ixxi gaga xossiixxeena ee beero'uwwiinsi mat kollo gibona.

⁴Illageen wocanchi hee'ubee'i mat mancho shukkok la'aatetti ihoo'n dangonnette ihulas gibaa ee beero'uwwiinsi matonne aagaa ixxi gaga gatixxona.

⁵Kobi'llishshina lam manchi haqqa muttu'uuyyi haqqiinsi heed firaa dangonnem mulli mancho shuta'n, oo shu manchi ee sasem beero'uwwiinsim matonne gibaa ixxi gaga gatixxona.

⁶Gibakka'a magannaato aagakkam beero'imdu qee'l ihulas xiiga miqiseena xanoo lehu manchina hincixxi qarmanchi hollaa amadaa ee mancho nadajjinne sheena xanookko. Ihukkaarem ixxenne wocanchi bee'i ee mancho shukkok la'oo'nnim dangonnette hee'ukko.

⁷An sas beero'uwwa doo'llitakka'a annanni issitakkona ki'nnuwwa ijaajoommok ee bikkinatte.

⁸«Ki'nnuwwi Moollanni Waa'i gaassi ki'nnuwwi anno'ina hide'aa aagu neeyyaxxi saga'llisanne ki'nnuwwika uulla haaraassookko.

⁹An kaballa ijaajoommi ijaajo hundam egettakka'a ki'nnuwwi Moollanni Waa'a iittitakkolasii ixxi googonnem mattakkolasii ee uulla ki'nnuwwina uwwoo bikkina gibbakka'a magannaato aaggakkam mulli beero'uwwika saso eddakka'a baxxehe.

¹⁰Eeham issitakkamok ki'nnuwwi Moollanni Waa'i hee'llakkona sharad issaa uwwoo uullanne muccur xiig dunamoobee'isinattee ki'nnuwwim ee xiigina xa'mmantakkambee'isinattee.

¹¹«Ihukkaarem mat manchi diina'oominne mulli mancho dugaa egeraa monginne shaa lasage ixxi gaga gatixxeena ka beero'uwwiinsi mat kolli gibulas

¹²oo manchi hee'oo beero'i awwonsaan manna asse'lla'a wossiissa'a lasage lehu manchika xiiga miqiseena xanoo hincixxi qarmanchina higissa'a uwwitona.

¹³Ixxena maham qishixxitakkotte; ki'nnuwwina hundi luwwannem er luwwi ihona manna shu mancho Isra'ee'l oos lambe'iinsi bi'issehe.

¹⁴«Ki Moollanni Waa'i gulummi issaa lago aa'llona uwwoo uullanne kihaannonnee ki ollakkichchi gabalannee gaassi anno'i kaasso'i gaba'l mare'e gindititte.

¹⁵«Mat manchika bi'ishsha la'immina xale'i mat naqaash ihooyyo. Mat manchika bi'ishsha la'immina lam te'im sas naqaash hasisookko.

¹⁶Mat jor manchi mulli mancho qophphaninne kasasuta'n

¹⁷lamem kollim Waa'ina otossakkam beyyonne ee ammane qeessuwwaa daannuwwaa ikka'a hee'llam manni illagenne hincitona.

¹⁸Daannuwwim ee woshsha erisa saarayyitona; oo manchim ixxena abbaayyi ihu Isra'ee'l mancho qophphaninne kasasaa siidamulas

¹⁹kasasamu manchi guzumo'amoo guzumo'o ixxi guzumo'amona. Ki'nnuwwim eehido'i jor luwwa hundam ee'isinne bi'issehe.

²⁰Manni hundim eekka macceesoo bikkina eehido'i jor bax ki'nnuwwi lambe'enne od hee'ooyyo.

²¹Eehido'i jor luwwa baxu manchina qishixxitakkotte. Manna shukkoka ixxom shi'llehe; ille qooqisukkaannika illem qooqissehe; inqe iiqukkaannika inqem iiqqehe; anga murukkaannika angam mullehe; lokko iiqukkaannika lokkom iiqqehe.