Read Hadiyya See'l Kitaaba 2 Bible Online

See'l Kitaaba 2 - Hadiyya bible

See'l Kitaaba 2

¹«Ee lasage Waa'i eese ijaajukkisannem Ertiira'i Dambalaqa marakkam googinne aa'nnaa udma'i uulla daba'llinaa mallummo; Eedoo'm duunaam uullannem lobakat ammane do'nnummuuyyi karkaandummo.

²Ee lasage Waa'i iina

³‹Ka duunaam uullanne lobakat ammane karkaaddakko'ookko; ihukkaarem kaba hanaa'n qaranne mallehe.

⁴Minaadabam «Ki'nnuwwi qarmanni ikko'i Eesa'i shumo'i hee'llam duunaam Eedoo'm uullinne higgona kure› yitaa ijaaje» yukko. Ixxuwwi ki'nnuwwa badditamo; ihukkaarem lobakata ege'llehe.

⁵Eedoo'm duunaam uulla Eesa'i shumo'ina gulummi issaa uwwaammo. An ki'nnuwwina ee uulliinsi mat lokki oobbi qaxam uwwoombee'i bikkina ixxuwwinne wocantakkotte; nakkitakkotte.

⁶Ki'nnuwwina hasisoo hurbaataa wo'oo ixxuwwiinsi diinatinne bitaa'llehe» yitaa ijaaje› yukko.

⁷«Moollanni Waa'i ki'nnuwwika anginne baxxakko'i luwwi hundam maasse'aakko. Ka haraar udma'i uullanne karkaaddakko'i amman hundam abooyyukkuuyyi ki'nnuwwa egeraakko. Ee sorem hiinchonnem Waa'i ki'nnuwwinne maqire hee'u bikkina ma'lluchchim ki'nnuwwina xa'ukkoyyo.

⁸Ee bikkina niyyabbaayyuwwi ikko'i Eesa'i shumo'i hee'llam Eedoo'm uulla hingaa Eelaataa Eexiyoongaabiir beero'uwwaa massoo googo ullaa Araba'inne Moo'aaphphi udma'i uulli kolli daba'llinummo.

⁹Waa'i ‹Loox shumo'i ikko'i Moo'aaphphi minaadaba hawwissakkotte; ixxuwwinne wocantakkotte. Eer beero'o ixxuwwi gulummi issaa uwwaammo. Ee bikkina ixxuwwi uulliinsi ki'nnuwwina maham uwwoommoyyo› yaakko» yukko.

¹⁰Eeranne Eenaaq oosi'nnoo'i geejjuwwa, qeera'lluwwaa malaayyaammuwwaa ikko'i Eemiim minaadab hee'llam hee'llo'o.

¹¹Ixxuwwi Eenaaq oosisam Raafaayi'm minaadaba yamantam hee'llo'o. Ihukkaarem Moo'aaphphi minaadab ixxuwwa Eemiim minaadaba yita'a weeshsham hee'llo'o.

¹²Hoor minaadab Eedoommanne hee'llam hee'llo'o. Ihukkaarem Eesa'i shumo'i ixxuwwa ee beyyiinsi hollita'a beyyonne ixxuwwi afuutto'o. Oohim Isra'ee'l minaadab hofqax ammaniinsi lasage Waa'i ixxuwwina lago aa'isu uulliinsi ixxuwwi diina'a hollito'aannisa.

¹³«Ee lasage Waa'i niina kurukkisanne Zareed daajje fillummo.

¹⁴Oohim Qaadees baarne'iinsi ki'nnummi sadiinsii sadeenti hiinchiinsii lasonnetti hee'ukko; Waa'i ixxuwwi bikkina hide'ukkisannem orina afaa hee'u ee amma'n qaranchiinsi goo'n oos hundim beeddaa hee'ukko.

¹⁵Waa'i ixxuwwa hundam guulleebe'i afeebe'e Waa'i angi ixxuwwannetti hee'ukko.

¹⁶Ixxuwwi hundim beeddita'a lasage,

¹⁷Waa'i, iina

¹⁸Moo'aaphphi uullanne yoo Eer beero'inne aa'llakka'a kaballa higimmi hasisookko.

¹⁹Ee lasage Loox shumo'i hee'llam Amoo'n uullanne hincitakkamo; ixxuwwa wocissakkotte; ixxuwwinnem orantakkotte. Mashka'oomim ixxuwwina uwwummi uulliinsi ki'nnuwwina maham uwwoommoyyo› yaakko» yukko.

²⁰Oo uullim ee beyyonne hee'llam hee'llo'i Raafaayi'm minaadaphphi summinne weeshamam hee'ukko. Amoo'n minaadab ixxuwwa «Zamzumiima»[2] yita'a weeshsham hee'llo'o.

²¹Ixxuwwim Eenaaq oosisam qeeraa'lluwwa, malaayyaammuwwaa dut minaadabaa hee'llo'o. Ihukkaarem Waa'i ixxuwwa guullaa bi'isu bikkina Amoo'n minaadab ixxuwwi uulla lago aa'lla'a ee beyyonne afuutta'a hee'llo'o.

²²Waa'i duunaam Eedoo'm uullanne hee'llam Eesa'i shumo'inam ee'isam issaa hee'ukko; oohim gaassi ee beyyonne hee'llo'i Hoor minaadaba guullaa Eedoo'm minaadab kabad afeebe'e hee'llam uulla lago aa'llamisa issaakko.

²³Qarxeesa yakkam wo'inne kibbamaakkoo uulliinsi waatto'i minaadab Gaaza'i hegeegonne hee'llo'i Eewe'i manna guullita'a ee uullanne afuutto'o.

²⁴«Moo'aaphphi uullinne hingaa lasage Waa'i niina ‹Kaba ki'llakka'a Arnoo'n daajji eeqidonne fillehe. Haseeboonanne afuuraa gassoo Amoore'i adil Siihoonaa ixxi uullaa ki'nnuwwina higisaa uwwaammo. Ixxo qassakka'a uullooma lago aa'llehe.

²⁵Hannonnem hee'oo uulli minaadab hundim kaballiinsi ki'isaa ki'nnuwwa baddoo'isa issoommo. Ki'nnuwwi bikkina macceesso'i amman hundam baachchinne huxe'llamo› yukko.

²⁶«Xummika asso amaddo'oo asse'amaano Qidemoot udma'i uulliinsi Haseeboo'n adil Siihoon beyyo

²⁷‹Ki'nnuwwi uullinne hingaa malloomisina googo uwwe. Googiinsi makkannem qeddannem filloo'n xabbinaa malloommo.

²⁸Intoommi hurbaatinaa angoommi wo'inaa bito minqoommo. Neese hansoommok ki uullinne hingona xale'i googo uwwitonatte.

²⁹Eedoomanne hee'llam Eesa'i shumo'ii Eeranne hee'llam Moo'aaphphi shumo'ii ixxuwwi uullinne hingoommisina uwwito'isam Yoordaanoos daajje hingaa Waa'i niina lago aa'isoo uulla aangeembe'i afeebe'e eeheen hingona googo uwwe› yaa asse'ummo.

³⁰«Ihukkaarem Haaseeboo'n adil Siihoon ixxi uullinne hingaa malloomisina googo uwwubee'i bikkina kaba issukkisam ki'nnuwwi Moollanni Waa'i ixxo ki'nnuwwina higisaa uwweena hasaa Siihoon bolxoo'isa issaa ixxeka wodano duudisukko.

³¹Ee lasage Waa'i iina ‹Oono'o, adil Siihoonaa ixxi uullaa ki anganne higisaa uwwaammo; ee uulla lago aa'llaa ee beyyonne afuure› yukko.

³²Adil Siihoon, ixxena yoo manni hundam wixxaa'aa Yaahaxxi beero'i gadanonne niinninne orameena firukko.

³³Ihukkaarem ni Moollanni Waa'i ni anganne higisaa uwwu bikkina ixxoo ixxi oosoo ixxenne maqire hee'llo'i mannaa hundam kaa'nnummo.

³⁴Ee ammanem hundem beero'om amandaa shokkiinsummo; ee beero'uwwanne hee'llo'i manna, goona, meentoo ciilluwwaa hundam shinaa guullinummo.

³⁵Ixxuwwika fooraam diinatee beero'uwwanne yoo awwaadoo luwwaa bongummo.

³⁶Ni Moollanni Waa'i Arnoo'n cebbina tochchonne yoo Aaro'eer beero'iinsi ki'isaa Gala'aad afeebe'e ee cebbanne yoo beero'uwwi hundam niina higisaa uwwukko.

³⁷Ihukkaarem Amoo'n uullanne te'im Yaabooq daajjenne te'im duunam uulli beero'uwwanne te'im Waa'i hincinoombee'isa ijaaju uulluwwanne matonnem hincinummoyyo.