Read Hadiyya See'l Kitaaba 20 Bible Online

See'l Kitaaba 20 - Hadiyya bible

See'l Kitaaba 20

¹«Gibxi uulliinsi fissu Waa'i ki'nnuwwinne maqiretti ihu bikkina diina'inne orantakkeena gaaddakkam ammane farado, faraxxi gaarre'ee ki'nnuwwiinsi lophphoo o'l gogotaa moo'llakka'a badditakkotte.

²Orancha asheerimmiinsi gaassaa qeessichchi ki'nnuwwi gogoxxi kolli hincaa

³‹Isra'eela, macceessehe. Oono'o, kaballa ki'nnuwwi orina mattakkamuulla. Ki'nnuwwi diina'a moo'llakkam ammane ki'nnuwwik wodan baa'oone; badditakkotte; muggitakkotteme.

⁴Ki'nnuwwi Moollanni Waa'i ki'nnuwwinne maqire maroo bikkina ki'nnuwwina kaachcha uwwookko› yihona.

⁵«Ee lasage gaaxxi awwonsaan gaadaanina ‹Ki'nnuwwiinsi haareechchi mine baxaa maassiisaa aagubee'i manchi yoohonnihe? Yoolas oo manchi ixxi mine daba'llona. Oo manchimdu oranne lehuta'n mulli manchi ixxi mine maassiisaa aagookko.

⁶Te'im haareechchi woyi'n kaashshika luxxi misha itaa liiramubee'i manchi yoohonnihe? Eehido'i manchi yoolas oo manchi ixxi mine daba'llona. Mashka'oomim oo manchimdu oranne lehuta'n ixxi woyi'n diqaas mulli mannina liiranchi ihookko.

⁷Odim landa eebeena xeehu manchi hee'oonnihe? Eehan ihulas oo manchi mine daba'llona. Eebeelas ixxi oranne lehoo ammane ixxi xeehu landichcho mulli manchina arette ikkamo› yitona.

⁸«Oo gassaan odim ‹Baachchaanchi manchi yoohonnihe? Eehido'i manchi ixxi mine daba'llona. Mashka'oomim ixxi mulli keenim baa'llamisa issookko› yita'a xa'mmitona.

⁹O'l awwonsaan gogotina eekka wocca'a guullita'a lasonne baxxanchi baxxanchinne ijaajjam ijaajaano doo'llitona.

¹⁰«Mat beero'o orina gaaddakkam ammane gaassitakka'a ee beero'i manni ki'nnuwwina gibittona iittinne xa'mmehe.

¹¹Ixxuwwimdu beero'i ooxxi gooccuwwa fooqaa'lla'a ki'nnuwwina gibitteena iittantolas kee'mmaalli baxo baxxu'uuyyi ki'nnuwwina awwaadaan ikkona.

¹²Ihukkaarem ee beero'i manni gibirimma sabba'a ki'nnuwwinne oramimma doo'llitolas ee beero'o kibbehe.

¹³Ki'nnuwwi Moollanni Waa'i ee beero'o ki'nnuwwina higisaa uwwoo ammane ee beero'onne hee'oo goona hundam shi'llehe.

¹⁴Ihukkaarem meentoo oosoo, fooraam diinatee, ee beero'onne hee'oo amaxxa hundamii qeefaddakka'a massehe. Ki'nnuwwina diina'an ihu luwwa hundam ki'nnuwwi awwaaxxitakkeena xantakkamo. Ki'nnuwwi Moollanni Waa'i eekka ki'nnuwwina higisaa uwwaakko.

¹⁵Ki'nnuwwiinsi qee'llonnee abbisonnee hee'oo beero'uwwanne hundannem ee'isa issehe.

¹⁶«Moollanni Waa'i ki'nnuwwina gulummi issaa uwwoo uullanne hee'oo beero'uwwa orinne kaa'llakka'a amaddakkam ammane ee beero'uwwi manna hundam shi'llehe.

¹⁷Ee bikkina Hiite'i manna, Amoore'i manna, Kana'aa'n manna, Farze'i manna, Hiiwe'i mannaa Iyyaabuus mannaa Waa'i ijaajukkisinne guullitakka'a bi'issehe.

¹⁸Mashka'oomim ixxuwwi qophpha'n waa'uwwina otossimmi bikkina shigigaa'oo luwwi hundam ki'nnuwwina losisamaa Waa'i saboo baaxiilo baxxakkamisa issitambee'isinatte.

¹⁹«Mat beero'o qeefaddakkeena guddakkam ammane kibbitakko'aanniinsi lobakat ammane massulas haqqi misha ittakkaman ihu bikkinaa haqqa mannisa kibbitakkeena xanakkambee'an ihu bikkinaa haqqa muttakkotte. Kibbitakkeena haqqi mannannihe?

²⁰Ihukkaarem misha mishoobee'i mulli haqqa muttakku'uuyyi ee beero'o qeefaddakkeebe'i afeebe'e girba baxxakka'a kibbitakkam duuha'ina awwaaxxitakkeena xantakkamo.