Read Hadiyya See'l Kitaaba 21 Bible Online

See'l Kitaaba 21 - Hadiyya bible

See'l Kitaaba 21

¹«Waa'i ki'nnuwwi gulummi issaa uwwoo uullanne ayyi shuda'e la'amubee'i leesh siidamulas

²ki'nnuwwik awwonsaanii daannuwwii matta'a oo leesh ubu beyyina abbisoo beero'i hinkanda'e keenta'a laqqona.

³Ee lasage oo leesh ubaa hee'u beyyina lobakata hincoo beero'i awwonsaan baxina afubee'ekaa axonnem gaanjaqqa issakkobee'ekaa mat addichcho doo'llitona.

⁴Ee addichchom abuullakkoo'n, haqqa kaasakkoo'nnii wo'im xoo'oo'nni hee'oo cebba amadda'a mattona. Eekke'em ee addichchika gaanje booqaaqqa'a iiqqona.

⁵Ixxena awwaaddona, ixxi summinne maasse'llonaa fitikaa annanni annanni hawwikaa woshsha moo'llonaa ki'nnuwwi Moollanni Waa'i doo'llu bikkina qeessuwwi ikko'i Leewi'i oos ee leesh kolli hincitona.

⁶Ee lasage leesh ubaa siidamu beyyina hincoo beero'i awwonsaan ee addichchi hanenne ixxuwwi anga aanshaqqitona.

⁷Ixxuwwim ‹Neese ka mancho shinummoyyo; ayyi shuda'em lanqummoyyo.

⁸Waa'a! At Gibxiinsi fissitaa gatissitti Isra'ee'l minaadabina haafihe; niinam at haafihe. Ka dunamu muccur xiigina hawwondummaannisa issitaa xa'mmititte› yitona.

⁹Waa'i illagenne hanqi ihaakkoo luwwa issitakkam bikkina ee muccur manchi leh bikkina xa'mmantakkamoyyo.

¹⁰«Ki'nnuwwi diina'inne orantakkeena fittakka'a ki'nnuwwi Moollanni Waa'i ixxuwwa ki'nnuwwina higisaa uwwoo ammanee qeefaddakkam ammanee

¹¹ki'nnuwwiinsi ayyim ee qeefadamu meentiinsi danaamo moo'aa heele'ulas ixxi gagina eebaqqeena xanookko.

¹²Oohim ise mine massaa lasonne horoore hogossita'ahii xuranqa mu'llita'ahii lasage

¹³eddechcha mulleka edde'llona. Isem ee manchinne maqire ixxi minenne afuutta'a oranne lehu is qarmannina mat agan afeebe'e wi'llitona. Ee lasage arette issona.

¹⁴Ihukkaarem ee lasage hasubeelas holleena xanookko. Ise malaayyinne arette issu bikkina agishshotte issaa biteeseena xanooyyo.

¹⁵«Mat manchi lam meento eebaa lasonne mate iitaa mate sabuta'nnii lamem goo'n ooso ixxena qattota'nnii ayyi la'ukko luxxi beet qaramukkok iittoobee'i meentichchoonsette ihulas

¹⁶oo manchi ixxeka amaxxaa horaa ixxi oosina baxxansoo ammane ixxi won beetina uwwimmi hasisoo sharada golo'aa ixxi iittoohaanti beetina uwwimminne won beetika hanqa bi'isimmi hasisooyyo.

¹⁷Ixxi iittoobee'i meentichchoonsi qaramaakkoohan ihuta'nnim won beetik sharad mulli keenina annannichchinam afoo sharadiinsi lam suume lophphimmi hasisookko. Ee bikkina anni won beetina wonoomma'n sharada la'aa uwwimmi hasisookko.

¹⁸«Mat manchina guzumo'akko'aarem daba'lloobee'i xiiqqaamoo boqqaa ihaa anninaa amanaa ijaajamoobe'i beet hee'ulas

¹⁹ee beeto annii amaa ixxuwwi beero'i wixxixxi beyyonne oogattam awwonsaa'n beyyo massitona.

²⁰Ee lommanninam ‹Oono'o, ku ni beet boqqaa xiiqqaamoo; niina ijaajancha sabaa dimboohanee diinate bi'isoohanee ihaakko› yitona.

²¹Ee beero'i manni hundim kininne aphphissa'a shitona. Ki'nnuwwim ee'isinne eehido'i jor luwwa bi'issakkamo. Isra'eel hundim eekka macceesaa baddookko.

²²«Mat manchi baxu kee'mmaalli damiqqi mashka'inne haqqanne saqaltakka'a shitakko'an ihulas

²³haqqanne saqalamookkok Waa'i illagenne duumamaakkoohan ihu bikkina oo leesh haqqanne saqalamukkisam garoone. Ki'nnuwwi Moollanni Waa'i ki'nnuwwina gulummi issaa uwwoo uulli haashaaramoobee'isa ee leesha ee ballam waammehe.