Read Hadiyya See'l Kitaaba 22 Bible Online

See'l Kitaaba 22 - Hadiyya bible

See'l Kitaaba 22

¹«Ki'nnuwwina abbaayyi ihu Isra'ee'llek mirgo'i te'im gereechchi bi'u beyyonne siiddakkolas caawwitakka'a higgakkotte. Annichchinam massitakka'a uwwehe.

²Ihukkaarem ee diinaxxeka annichcho laqqakkobeelas te'im hee'oo beyyi qee'l ihulas ki'nnuwwi mine massehe; annichchi hasukkuuyyi waaroo ammanem dabattakka'a uwwehe.

³Ee'isam hallichcho te'im eddechcha te'im mulli ayyi luwwam ki'nnuwwina abbaayyi ihu Isra'eeliinsi bi'aa siiddakkolas dabattakka'a uwwehe bagaan cawwitakkotte.

⁴«Ki'nnuwwina abbaayyi ihu Isra'ee'llek hallichchi te'im baar googonne ubaa moo'llakkolas ki'issakka'a hara'mmehe bagaan uttakka'a higgakkotte.

⁵«Ki'nnuwwi Moollanni Waa'i shigigoohan ihu bikkina goon meentika, meentim goo'n eddechcha edde'immi hasisooyyo.

⁶«Mat cii'ichchi mat haqqichchonne te'im uullanne ciicoolla te'im quunqa qaaphphaa afuuru beyyo affakka'a siiddakkolas ama ciicoollinne maqirem massitakkotte.

⁷Ciicoollam massitakkeena xantakkamo; ihukkaarem am marona fataki'llehe. Ee'isamdu issitakkolas goddaan ikkakka'a lobakat doolle hee'llakkamo.

⁸«Haareechchi mine baxxakkam ammane mi'n fenganne dimdima kallehe. Ee beelas mat manchi mi'n iimaniinsi ubaa lehulas ee xiigina xa'mmantakkamo.

⁹«Woyi'n kaashshi woronne mulli luwwa wixxakkotte. Eehamdu issitakkolas woyi'n misham ihukko mulli hurbaata awwaaxxitakkeena xantakkamoyyo.

¹⁰«Mirgo'oo hallichchoo mat gaanjaqqanne qaashshakka'a harqoottakkotte.

¹¹«Suufikaa talbi hoba'llekaa fatira hamaarakka'a dadakko'i eddechcha edde'llakkotte.

¹²«Ki'nnuwwi eddechchi soorem kasannem shoga axissehe.

¹³«Mat beet mat landichcho eebaa lasage ise sabulasii

¹⁴‹Isenne baajoomma'n mare'i bee'etane› yaa qophphaninne summa bisulasii

¹⁵ee lasage ee landichchok annii amaa landichcho baajaamotte ikko'isa moo'isoo mare'uwwa eebba'a beero'i manni wixxixxi beyyonne oogattam awwonsaanina moo'issona.

¹⁶Is annim ‹An i landichcho ka beetina ladiisaa hee'ummo. Oono'o, kaba ixxi ise sabukkisa la'isaakko.

¹⁷‹Ki landichchonne baajoommano moo'isoo mare'e siidummoyyo› yaa i landichchoka summa bi'isaakko. I landichchonne baajoomman hee'ukkisa moo'isoo mare'i kuno'o!› yaa ee awwonsaa'n illagenne hirfana biddiqaa'ona.

¹⁸Ee beero'i awwonsaanim ee beeto ganitona.

¹⁹Odim mat xibbi kin bira miqissa'a ee landichchi annina uwwitona. Oo beet Isra'ee'l mat baajaam landichchoka summa bi'isaakko. Eehanniinsim mulleka ise ee beetina mi'n amatte ikka'a hee'llona; ixxi hee'oo umu'l doollenne hundannem ise holleena xanooyyo.

²⁰«Ihukkaarem ee beetik woshshi hanqi ihaa siidamulasii landichcho baajaamotte ikko'isa moo'isoo mare'i hee'ubeelasii

²¹anni minenne hee'llu'uuyyim saa'lla'a Isra'ee'l minaadaphphi lambe'enne tuussiisoo baxo baxxo'i bikkina is anni mi'n goocanne massita'a ise hee'llam beero'i manni kininne aphphissa'a shitona. Ki'nnuwwim ee'isinne eehido'i jor luwwa ki'nnuwwi lambe'iinsi bi'issehe.

²²«Mat manchi mulli manchi meentichchonne iinse'aa siidamulas lamom shakkona. Ee'isinne eehido'i jor luwwa Isra'ee'l lambe'iinsi bi'issehe.

²³«Mat manchi mat beero'onne mulli manchina xee'anto'oo landichchonne iinse'aa siidamulas

²⁴ixxuwwa lamom beero'iinsi haxonne fissitakka'a kininne aphphissakka'a shi'llehe. Ise lehimmi hasisoo mashka'i manni macceeseena xanoo beero'i lambe'enne hee'llu'uuyyi manni hara'mmona laattobee'i bikkinatte. Manchim lehimmi hasisoo mashka'i mulli manchina xeehanto'oo baajaam landichchonne iinse'u bikkinatte. Ki'nnuwwim ee'isinne eehido'i jor luwwa ki'nnuwwi lambe'iinsi bi'issehe.

²⁵«Mat manchi mulli manchina xeehanto'oo mat baajaam landichcho beero'iinsi haxonne mullam yo'i beyyonne siidaa malaayyinne iseka baajoommano bi'isulas ixxi xale'i lehona.

²⁶Oo landichcho lehina afisoo hawwojja maham issitobee'i bikkina isenne maham issitakkotte. Eehido'i woshshi mat manchi mulli mancho dugaa egeraa shoohaannisa.

²⁷Ookki ihoo mashka'im oo manchi ee xeehanto'oo landichcho beero'iinsi haxonne yo'i beyyonne siidu bikkinaa laattota'nnim hara'mmato siiddeena xantambee'isa la'u bikkinattee.

²⁸«Mat manchi mulli manchina xeehantobee'i landichcho massaa sha'ixxi edancha edamukkuuyyi amadamulas

²⁹ee landichchi annina ontayyi kin bira miqona. Isem ee manchina mi'n amatte ikka'a ixxenne hee'llona; malaayyisaa isenne sha'ixxi edancha edamu bikkina ixxi heechchi doollenne hundannem ise holleena xanooyyo.

³⁰«Ayyi manchim ixxi annarenne edamaa ixxi anna sholliisoone.