Read Hadiyya See'l Kitaaba 23 Bible Online

See'l Kitaaba 23 - Hadiyya bible

See'l Kitaaba 23

¹«Laaro qoccammi te'im abaajjammi manchi Waa'i minaadaphphi dummichchanne exxoone.

²«Quumaantii tommi qaranchi afeebe'e yoo ixxi shumo'ii hundim Waa'i minaadaphphi dummichchanne exxaa xigamoone.

³«Amoo'n mannam ihukko Moo'aaphphek te'im ixxuwwi shumo'iinsette ihoo ayyim tommi qaranchi afeebe'e Waa'i minaadaphphi dummichchinne exxoone.

⁴Ki'nnuwwi Gibxiinsi fittakka'a googonne hee'llakko'i ammane ki'nnuwwina wo'oo waasaa hootto'ok xadamooyyo. Ee'isam Masphexoome'enne Phaatoora yakkam beero'onne hee'am hee'u Bii'oor beet Baala'aam ki'nnuwwa duumona bitaa'lla'a hee'llo'o.

⁵Ihukkaarem ki'nnuwwi Moollanni Waa'i ixxeka macceesukkoyyo. Waa'i ki'nnuwwa iittoo bikkina ixxeka duuncha hore'em maassonne dabarukko.

⁶Ki'nnuwwi hee'llakkam doolli hundannem oo minaadab makkixxita'a xumminne hee'llona cawwitakkotte.

⁷«Eedoo'm uulli manni ki'nnuwwina qar ikko'i bikkina shigigitakkotte; ixxuwwi uullanne waaraan ikkakka'a hee'llakko'oo bikkina Gibxi mannam shigigitakkotte.

⁸Sas qaranchiinsi lasage ixxuwwi shumo'im Waa'i minaadaphphi dummichchanne exxitona.

⁹«Orantakkam ammane orina wiiddantakko'i beyyiinsi haashaarammi luwwa hundam bi'issehe.

¹⁰Mat manchi hii'm haqaawwonne daadu ixxi qansik aash ixxi orachchonne hee'ulas wiidda'n beyyiinsi haxonne firaa afuurona.

¹¹Uulli hiimeena ihoohaare orachcho aanshaqqona; eelliinchi aagaa lasonnem wiidda'n beyyo daba'llona.

¹²«Shume'llakkam beyyo wiidda'n beyyiinsi haxonne gudissehe.

¹³Shumina afuuttakkam ammane shume'llakko'oka dabattakka'a waammitakkeena bare hintakkam shoodira o'l mu'utinnem amaddehe.

¹⁴Ki'nnuwwi Moollanni Waa'i ki'nnuwwa egereenaa diina'am ki'nnuwwi anganne higisaa uwweenaa wiidda'n beyyonne hee'oo bikkina ki'nnuwwi lambe'enne shigigaa'oo luwwa moo'aa afare dabaroobee'isa ki'nnuwwik wiidda'n beyyi keesamakkoohan ihona.

¹⁵«Mat agishshi ixxi moollanniinsi gibaa keesenne yabo aaguta'n ixxo dabattaa ixxi moollannina higissaa uwwititte.

¹⁶Ki'nnuwwi beero'uwwiinsi matonne hasu beyyonne ki'nnuwwinne hee'ona bagaan ixxo u'nnissakkotte.

¹⁷«Isra'ee'llek goon te'im meenti ayyim qophpha'n waa'ina otossitam kee'nnisam saa'aanchi ihoone.

¹⁸Waa'i saa'imma shigigoohan ihu bikkina saa'imminne siidamoo diinat hinka'i uga'inam irifo'i ihaa ki'nnuwwi Moollanni Keesammi Mine aagoone.

¹⁹«Ki'nnuwwina abbaayyuwwi ihu Isra'ee'l oosina diinate liqaayyissakkam ammane te'im hurbaataa ayyi luwwamii uwwitakka'a lasonne qaro'o xa'mmitakkotte.

²⁰Waaraaniinsi qaro'inne miqissakkeena xantakkamo. Ihukkaarem ki'nnuwwi gulummi issitakka'a a'llitakkam uullanne ki'nnuwwi angi tafoo ayyi luwwannem Moollanni Waa'i ki'nnuwwa maasse'ona Isra'eel ihu ki'nnuwwi abbaayyina qaro'inne liqaayyissakkotte.

²¹«Ki'nnuwwi Moollanni Waa'ina uga'a aaggakkam ammane ee aaggakko'i uga'a dasissakkotte. Waa'i ki'nnuwwi aaggakko'i sagara qoxxisaa hasoohane. Eekkamdu wonshitakkobeelas ki'nnuwwina baaxiil ihookko.

²²Waa'ina uga'a aagakkobeelas odim baaxiil ihooyyo.

²³Ihukkaarem ki'nnuwwi Moollanni Waa'ina sawwitakka'a aaggakko'i uga'isinne ki'nnuwwi suuminne woccakko'oka ege'llimminne wonshimmi hasisookko.

²⁴«Mat manchi woyi'n kaashshi beyyinne higgakku'uuyyi mishiinsi hassakko'i qaxa ittehe. Ihukkaarem mah mu'utannem ee mishiinsi ki'nnuwwi gagina massitakkotte.

²⁵Mat manchi hurbaaxxi worinne higgakkam ammane anginne muttakka'a hamaam ittakkeena xantakkamo. Ihukkaarem jajjarinne muttakka'a massitakkotte.