Read Hadiyya See'l Kitaaba 25 Bible Online

See'l Kitaaba 25 - Hadiyya bible

See'l Kitaaba 25

¹«Lam manchi wocanta'a fitanteena oogaxxi beyyo waattolas daannuwwi ee woshsha saarayyita'a hawwodamu mancho fatakita'a hawwodu manchonne oogattona.

²Hawwodu manchomdu ganimminne guzumo'akkaman ihulas biqinne uullanne iinse'oohaare afa'l kollo ganakkona daanni ijaajona. Ganimmi hasisoohim daanni illagennette; aphphisanchi hasisoo xig hawwodu hawwojjisannettee ihimmi hasisookko.

³Sor afeebe'e ganimmi xansiisookko; ihukkaarem soriinsi lophphimmi hasisooyyo. Eehanniinsi lophphulas ki'nnuwwina abbaayyi ki'nnuwwi illagenne sholle'aakkoohan ihookko.

⁴«Hurbaata gantakkam ammane ganoo baa'lleka suume kattakkotte.

⁵«Abbaayyuwwi ixxuwwi uullanne hee'llu'uuyyi ixxuwwiinsi mat abbaayyi qachcho qaroo'n lehuta'n ee le'u manchi meentichcho ee abaroosiinsetti ihubee'i manchi gassimmi hasisooyyo. Is manchina abbaayyi ise gissimmi hasisookko.

⁶Ee lasage ise gaassita'a qattam ciilika summa le'u is manchi shumo'i Isra'ee'l oos lambe'iinsi bi'oobee'isa ixxi summanne fissitona.

⁷Ihukkaarem le'u is manchina abbaayyi ise gasseena hasubeelas ise hee'llam beero'i gassaa'n beyyo matta'a ‹I heereechchi iina issimmi hasisoo luwwa isseena hasukkoyyo. Ixxi abbaayyika summa Isra'ee'l oos lambe'enne weeshiseena hasukkoyyo› yita'a kuttona.

⁸Ee lasage ee beero'i gassaan ee mancho weeshsha'a atoorassitona. Ixxim ise gasseena iittubeelas

⁹le'u manchi meentichchom beero'i awwonsaa'n illagenne is heereechchi kolli hincitona. Ixxi lokki caamma'iinsim mato fissita'a anja ee is heereechchi illagenne tufita'a ixxi abbaayyina shumo'o uullisimma hasoobee'i manchina kido'i sholle'n hasisookko› yitona.

¹⁰Ee manchi abaroosim Isra'ee'l oos lambe'enne ‹Caamma'a tirakko'oo manchi shumo'o› yaa gadukkuuyyi hee'ookko.

¹¹«Lam manchi wocanta'a ganantu'uuyyi mataanni are is aro'ina agaagga'a mullaannika foo'l beyyo amadda'a hixixaa'llolas

¹²isena maham qishixxitakkoo'n anga mullehe.

¹³«Ki'nnuwwi minenne hoffokaa lobokaa lam hagar keennaancho dissitakka'a manna qawwiissakkotte.

¹⁵Moollanni Waa'i ki'nnuwwina uwwoo uullanne lobakat doolle hee'llakkeena hanqo'anee amma'nnamaakkoohanee ihaakkoo keennaanchii qunnii xale'i hee'ona.

¹⁶Moollanni Waa'i eehido'i luwwa issukkuuyyi aphphisansoo manchoo shigigookko.

¹⁷«Ki'nnuwwi Gibxi uulliinsi fittakko'i ammane Amaaleeq uulli manni ki'nnuwwanne afisso'i hawwojja xaddakkotte.

¹⁸Ixxuwwi Waa'a badditam keenoyyo; ki'nnuwwi taakkinne hooggakka'a hee'llakko'i ammane lasinne waatta'a ki'nnuwwa qasso'o. Hoogga'a lasonne taakke'llam keeno hundam shito'o.

¹⁹Ee bikkina ki'nnuwwi Moollanni Waa'i uullooma ki'nnuwwina lago aa'isaa ki'nnuwwi kululleetanne hee'llam diina'i hundiinsim usheexxisoo ammane ka uullanne ixxuwwa od ayyim tiireena xanoobee'i qax afeebe'e Amaaleeq minaadaba hundam guullehe! Ki'nnuwwim kaka hore'em xaddakkotte!