Read Hadiyya See'l Kitaaba 26 Bible Online

See'l Kitaaba 26 - Hadiyya bible

See'l Kitaaba 26

¹«Moollanni Waa'i ki'nnuwwina uwwoo uulla aaggakka'a lago aa'llakka'a makkixxitakka'a hee'llakkam ammane

²ee uulliinsi baxxakka'a siiddakkam hurbaatiinsi wona sanannanne issitakka'a ki'nnuwwi Moollanni Waa'i ixxi summi weeshamona doo'llu beyyo massehe.

³Ee ammane awwaadonne yoo qeessichchi beyyo mattakka'a ‹Waa'i niina uwweena gaassi niyyanno'ina hide'aa sagara aagu uulla aangummisa kaballa ki Moollanni Waa'i illagenne la'insoommo› yi'llehe.

⁴«Qeessichchim ee sananna aa'aa ki'nnuwwi Moollanni Waa'ina kitima hincaa'akkam beyyi illagenne dissona.

⁵Ki'nnuwwim Moollanni Waa'i illagenne ‹Niyyanni beyyiinsi beyyo darba'ukkuuyyi hee'oo Sooriy uulli manchi hee'ukko. Ixxim hofqax abaroosam amadaa Gibxa dillaa ee beyyonne waaraanchi ihaa hee'ukko. Ixxim lobakata malaayyaamoo dut minaadabaa ihukko.

⁶Ihukkaarem Gibxi uulli manni neese hawwisso'o; sholliissa'a agid inkaa awwaandoommisam issito'o.

⁷Neesem niyyanno'i Moollanni Waa'i kolli laallummo. Ixxim ni laachcha macceesaa niikka hawwo, neesenne issakko'i barche'ee wor amadanchaa moo'ukko.

⁸Waa'i ixxi lob malaayyinnee daannoominnee, jorisa baa'isimminne, maalalsiisoo aganninnee mare'innee Gibxiinsi fissukko.

⁹Neesem marabii adii daadoo ka harish uulla woraa niina uwwukko.

¹⁰Ee bikkina oono'o, niina Waa'i uwwukkaanniinsi wona ixxena eembaammo› yi'llehe. «Ee lasage sananna Waa'i illagenne dissitakka'a ixxena otossi'llehe.

¹¹Ki'nnuwwinaa ki'nnuwwi abaroosinaa Waa'i issu er luwwi hundinam liirantakka'a ixxo galaxxehe. Leewi'i oosii ki'nnuwwinne maqire hee'llam waaraanii ee galaxximmi seeranne edanta'a hee'llona.

¹²«Tommiinsi mato annanni issakka'a uwwakkam saxxi hiinchonne eekka wixxaa'llakka'a lasage ki'nnuwwi beero'onne hee'llam Leewi'i oosina, waaraanina, adaraar oosinaa busar meentinaa goddita'a ittona uwwehe.

¹³Ee lasage ki'nnuwwi Moollanni Waa'ina ‹Ni miniinsi keesammi sharada annanni issinaa neese ijaajjittisanne Leewi'i oosina, waaraanina, adaraarinaa busar meentinaa uwwinaammo. Ki ijaajom gindinummoyyo; xandummi luwwim bee'e.

¹⁴Lehonnem ixxeensi intummoyyo; muccur inkumbee'i ammane ixxo nakkinummoyyo; lehu manchina uwwakkam halinam nakkinummoyyo. At neese ijaajjittisanne kiikka ni Moollanni Waa'ika ijaajo egellaammo.

¹⁵Iimanenne hee'oo ki Keesammi Minennette ikkaa ni kolli aad moo'e. Kiina minaadab ihu Isra'eelam maasse'e. Gaassi anno'ina aaggitti hidi'llisanne niina uwwittisanne marabii adii daadoo ka harish uullam maasse'e› yi'llehe.

¹⁶«Oono'o, Moollanni Waa'i ixxeka seeraa ijaajoo egettakkona kaballa ki'nnuwwa ijaajoolla. Ee bikkina wo'm wodaninnee wo'm tiirinnee ege'llimminne ijaajammehe.

¹⁷Waa'i ki'nnuwwina Moollanni ihukkisaa ixxi googonnem taakke'llakkaman ihukkisaa kaballa la'issakko'ookko. Ixxeka ijaajo, seeraa ogoraa egettakkeenaa ijaajantakkeenaa sagara aaggakko'ookko.

¹⁸Ee bikkina oono'o, Waa'i ki'nnuwwina uwwu neeyyaxxisanne kaballa ixxena annanni ikkakko'oo xee'aalli minaadab issaa aa'aakko. Ixxi ijaajo hundam egettakkona ijaajaakko.

¹⁹Eehamdu issitakkolas ixxi qooccu ka uulli minaadab hundiinsim galatinne, summinnee lombinnee ki'nnuwwa lonsoo'isaa uwwu neeyyaxxisannem ixxena annanni ikkakko'oo minaadab issoo'isaa ki'nnuwwina kuraakko» yukko.