Read Hadiyya See'l Kitaaba 27 Bible Online

See'l Kitaaba 27 - Hadiyya bible

See'l Kitaaba 27

¹Ee lasage Muse'e Isra'ee'l Minaadaphphi awwonsaaninne maqirem minaadabina «An kaballa ki'nnuwwina uwwoommi ijaajo hundam egellehe.

²Yoordaanoos daajje higgakka'a Moollanni Waa'i ki'nnuwwina uwwoo uulla aaggakkam ammane geejji geejji ki'nneka hofqaxam uullissakka'a boorjo'inne nannehe.

³Ki'nnuwwi gaassi anno'ina Waa'i aagu neeyyaxxisanne adii marabii daadoo uulla aaggakkeena Yoordaanoos daajje higgakkam ammane ka seera ee kinneewwanne kitaabbehe.

⁴Yoordaanoosa higgakkam ammane an kaballa ki'nnuwwa ijaajummisanne ka kinneewwa Eebaa'l duunanne uullissakka'a boorjo'inne nannehe.

⁵Eekke'ennem xaar nakkubee'i kininne ki'nnuwwi Moollanni Waa'ina kiti'm beyyo baxxehe.

⁶Ki'nnuwwi Moollanni Waa'ina baxxakkam ayyi kiti'm beyyim cabbaramubee'i kininnette ihimmi hasisookko. Eehe'em shokkiisakka'a Waa'ina hincaa'akkam kitimo hincaa'llehe.

⁷Mateeyyoo'm kitimam hincaa'llakka'a eekke'enne liirantakku'uuyyi ki'nnuwwi Moollanni Waa'i illagenne ittehe.

⁸Ee kinneewwannem Waa'i Seera hundam danaamisa moo'amoo'isa issitakka'a kitaabbehe» yukko.

⁹Muse'e odim qeessuwwi ikko'i Leewi'i oosinne maqirem Isra'ee'l minaadab hundinam «Isra'ee'l minaadaba, ki'nnuwwi wodaninne macceessehe. Oono'o, kaballa Moollanni Waa'ina minaadab ikkakko'ookko.

¹⁰Ee bikkina Moollanni Waa'ina ijaajammehe; anim kaballa ki'nnuwwina uwwoommi ijaajoo seeraa egellehe» yukko.

¹¹Ee ballam Muse'e Isra'ee'l minaadabina

¹²«Yoordaanoos daajje fittakka'a lasage minaadaba maasse'lleena Gariizaa'n duunanne uullimmi hasisookkok sulli xale'i Simi'oonane, Leewe'ane, Yihudane, Yisaakoorane, Yooseefanee Biiniyaam sulloo ihona.

¹³Odim duunchina Eebaa'l duunanne uullimmi hasisookkok Roobeelane, Gaadane, Aseerane, Zaabiloonane, Daananee Niftaaleem sulloo ihona.

¹⁴Leewi'i oos sagara iimaa'lla'a Isra'ee'l minaadab hundinam.

¹⁵« ‹Waa'i illagenne shigigaa'oohan ihu angi lachchi manni baxoo misila te'im Waa'i bikkenne otossakkam luwwa baxaa maaxaa uullisoo manchi duumamaakkoohan ihona› yitona. «Minaadab hundim dabaraa ‹Aameen› yihona.

¹⁶« ‹Anna te'im ama sholliisookkok duumamaakkoohan ihona› yitona. «Minaadab hundim ‹Aameen!› yihona.

¹⁷« ‹Ixxi ollakkichchi gabala gindookkok hundim duumamaakkoohan ihona› yitona. «Minaadabim ‹Ameen› yihona.

¹⁸« ‹Qooq mancho huushanchi googonne awwonsookkok hundim duumamaakkoohan ihona› yitona. «Minaadab hundim ‹Aameen!› yihona.

¹⁹« ‹Waaraa'nneka, adaraa'llekaa busar meentikaa hanqa bi'isookkok duumamaakkoohan ihona› yitona. «Minaadab hundim ‹Aameen!› yihona.

²⁰« ‹Anni meentiinsi matinne iinse'aa annika lombe sholliisoo ayyim duumamaakkoohan ihona› yitona. «Minaadab hundim ‹Aameen!› yihona.

²¹« ‹Ayyi fooraam diinatinnem saa'oo manchi duumamaakkoohan ihona› yitona. «Minaadab hundim ‹Aameen!› yihona.

²²« ‹Aayyanne saa'ookkok duumamaakkoohan ihona› yitona. «Minaadab hundim ‹Aameen!› yihona.

²³« ‹Ixxi ballonne saa'oo hundim duumamaakkoohan ihona› yitona. «Minaadab hundim ‹Aameen!› yihona.

²⁴« ‹Dugaa egeraa manna shoo manchi hundim duumamaakkoohan ihona› yitona. «Minaadab hundim ‹Aameen!› yihona.

²⁵« ‹Diinatinne bitaa'amaa muccur mancho shoo hundim duumamaakkoohan ihona› yitona. «Minaadab hundim ‹Aameen!› yihona.

²⁶« ‹Ka seerina ijaajamoobee'ek ayyim duumamaakkoohan ihona› yitona. «Minaadab hundim ‹Aameen› yihona.