Read Hadiyya See'l Kitaaba 28 Bible Online

See'l Kitaaba 28 - Hadiyya bible

See'l Kitaaba 28

¹«Ki'nnuwwi Moollanni Waa'ina ijaajantakkolasii anim kaballa ki'nnuwwina uwwoommi ixxi ijaajo hundam amma'nnanchinne egettakkolasii uullanne hee'oo minaadab hundiinsim hanaan ki'nnuwwa iimiimaa'ookko.

²Moollanni Waa'inamdu ijaajantakkolas kanniinsi woroon yoo maassuwwi hundim ki'nnuwwan ihookko.

³«Waa'i ki'nnuwwa beero'onnee hax uullannee maasse'ookko.

⁴«Ki'nnuwwi ooso, uulli mish hundam, laro, gereebbaa fella'aa maasse'ookko.

⁵«Sechchoo gabataa maasse'ookko.

⁶«Ki'nnuwwika firimmaa aagimmaa maasse'ookko.

⁷«Ki'nnuwwanne ki'oo ki'nnuwwi diina'a ki'nnuwwi anganne higisaa uwwookko. Mexxo'i mat googinne waattamo; ihukkaarem lamar googinne gibbamo.

⁸«Ixxi ki'nnuwwika gootaraa ki'nnuwwi angi baxoo luwwi hundamii maasse'ookko. Ee'isam ki'nnuwwina uwwoo uullanne ki'nnuwwa maasse'ookko.

⁹«Ki'nnuwwi Moollanni Waa'ina ijaajantakkolasii ixxi ijaaj hundam egettakkolasii ixxi aagu saga'llisanne ixxi gagina doo'llaakkoo annanni minaadab issookko.

¹⁰Ee lasage uullanne hee'oo minaadab hundim Waa'ina annanni ikkakko'oo minaadab ikkakko'isa moo'aa baddookko.

¹¹Waa'i ki'nnuwwina uwweena gaassi ki'nnuwwi anno'ina sagara aagu uullanne lobakat ooso, fooraam diinatee hurbaaxxi atootaa ki'nnuwwina uwwookko.

¹²Ixxi odim ki'nnuwwi uullina xeena ammaninne uwweenaa ki'nnuwwi angi baxu luwwi hundam maasse'eenaa ixxeka er doona iimane fooqaa'ookko. Atim dut minaadabina liqaayyissoottoo bagaan ayyeensim liqaayye aa'llooyyo.

¹³Moollanni Waa'i lobakat minaadaphphi lambe'enne horoor issookko bagaan sheerim issooyyo. Kaballa an ki'nnuwwina uwwoommi Waa'i Seera hundam amma'nnanchinne egettakkolas maham ubbakkoo'n illage mattakkamo bagaan laso gattakkamoyyo.

¹⁴Ayyisinnem ka see'llisiinsi biiranne qophpha'n waa'uwwina otossimmii ixxuwwina awwaadimmii hasisooyyo.

¹⁵«Ihukkaarem ki'nnuwwi Moollanni Waa'ina ijaajantakkobeelasii anim kaballa ki'nnuwwina uwwoommi ixxi seeraa ijaajoo amma'nnanchinne egettakkobeelasii kanniinsi woroon yoo duunchi hundim ki'nnuwwanne afookko.

¹⁶«Beero'uwwannem ihukko hax uullanne duumantakko'oohan ikkakkamo.

¹⁷«Ki'nnuwwik sechchii gabatii duumamaakkoohan ihookko.

¹⁸«Ki'nnuwwi oos, uulli mish, lar, gereebbii fella'ii duumamaakkoohan ihookko.

¹⁹«Aaggakku'uuyyii fittakku'uuyyii duumantakko'oohan ikkakkamo.

²⁰«Jor luwwa issitakka'a Waa'a uttakko'i bikkina issitakkam luwwi hundannem guullitakka'a bi'llakkeebe'i afeebe'e ki'nnuwwanne duunchi, hambalaachchanchii sholle'nnii afookko.

²¹Lago aa'llakkeena aaggakkam uulliinsi guullaa bi'iseebe'i afeebe'e fatakoobee'i shoo jabbo ki'nnuwwanne eebookko.

²²Waa'i ki'nnuwwa ciissoo jabbinne, iibbinne, dashshinne, hafuroo iibbinnee xeen bee'aa uulla gogoo'isa issimminnee bi'llakkeebe'i afeebe'e aphphisookko. Ki'nnuwwi hurbaatam lasho'innee waagginnee bi'isookko.

²³Ki'nnuwwiinsi hanaan yoo iimane xeen ga'nnoobee'isa naas xaa'llisa gokkisoommo; lokkiinsi woroon yoo uullam xaa'llisa gokkisoommo.

²⁴Bi'llakkeebe'i afeebe'e xee'n bikkenne hambu'llaminne binnoo diraa shashsharaa asse'ookko.

²⁵«Ki'nnuwwam diina'i anganne higisaa uwwookko. Ki'nnuwwi mat googinne diina'i kolli waattakkamo; ihukkaarem lamar kollinne gibbakkamo. Uullanne hee'oo minaadab hundim ki'nnuwwanne afoo luwwi hundam moo'aa baachchinne dambaqookko.

²⁶Ki'nnuwwi leesham iima'n ammarii haqqo'l moochchii itookko bagaan ixxuwwa hollookkok hee'ooyyo.

²⁷Waa'i odim fayye'llakkeena xantakkambee'i Gibxi uulli dashshinne, satti jabbinne, madinnee hankarattinnee aphphisookko.

²⁸Odim machchaallinne, qooqimminnee tiir bi'oo'isa issimminnee u'nnisookko.

²⁹Samgud ballanne qooqisa timtimitakkamo; mattakkam googom laqqakkeena xantakkamoyyo. Baxxakko'i luwwi ki'nnuwwina danooyyo. Hundi ammanem wor amadanchii boganchii afookko; hara'mmooham siiddakkamoyyo.

³⁰«Landa xeekkakkamo; ihukkaarem mulli manni malaayyisaa edamookko. Mine baxxakkamo; ihukkaarem hee'llakkamoyyo. Woyi'n haqqa kaassakkamo; ihukkaarem mish ittakkamoyyo.

³¹Ki'nnuwwi diinat moo'llakko'uuyyim duramookko; ihukkaarem maariinsi suumennem amaddakkamoyyo. Ki'nnuwwi halla moo'llakku'uuyyim massakkamo; ihukkaarem daba'llooyyo. Gereebba diina'i massookko; ihukkaarem hara'mmaa hoorookkok hee'ooyyo.

³²Ki'nnuwwi illi moo'ukkuuyyim ki'nnuwwika ooso mulli minaadab manni agid issaa massookko. Ki'nnuwwi illim ki'nnuwwi oosika daba'llimma egerukkuuyyi qulunxinne hee'ookko; ihukkaarem maham issitakkeena xantakkamoyyo.

³³Kee'mmaallisa orba'llakko'i ki'nnuwwi hurbaaxxeka atoota laqqakkambee'i manni itookko. Ihukkaarem doolli hundichchonnem hawwodanchiinsii wor amadanchiinsii bagaan ki'nnuwwi siiddakkam luwwi hee'ooyyo.

³⁴Moo'llakkam luwwi hundim machchaassoohan ihookko.

³⁵Waa'i ki'nnuwwika xumxuumee gubeedoo fayye'oobee'isa omassookko; lokki xuranqiinsi horoo'l saraat afeebe'em kee'mmaalli omarinnee jabbinnee aphphisookko.

³⁶«Waa'i ki'nnuwwa ki'nnuwwi adilinne maqirem gaassi anno'ii ki'nnuwwii hee'llakka'a laqqakkambee'i mulli minaadab manni uulla xoqoolaa massookko. Eehe'em haqqinnee kininnee baxamaakkoo qophpha'n waa'uwwina otossitakkamo.

³⁷Waa'i ki'nnuwwa binnaa'oo uullanne hee'llam minaadab hundim ki'nnuwwanne afu luwwa moo'lla'a muggitamo; ki'nnuwwannem naacakkamo; gadantakkamome.

³⁸«Lobakat hurbaata wixxakkamo; ihukkaarem qawwaawwi itoo bikkina gootto'i atoota wixxaa'llakkamo.

³⁹Woyi'n kaashsha kaassakka'a danaamisa axissakkamo; ihukkaarem daquur itoo bikkina misha wixxaa'llakkamoyyo te'im ixxi mishika diqaasa aggakkamoyyo.

⁴⁰Weer ki'nnuwwi uullanne beyyi hundannem mutookko; ihukkaarem wee'l mish amman bee'em giggiroo bikkina wee'l zayti hee'ooyyo.

⁴¹Ooso goonaa landaa qattakkamo; ihukkaarem qeefadamaa maroo bikkina ee ooso od siiddakkamoyyo.

⁴²Ki'nnuwwika haqqaa hurbaataa hundam qawwaawwi itookko.

⁴³«Ki'nnuwwik malaayyi hoogukkuuyyi marookko; ihukkaarem ki'nnuwwi uullanne hee'llam waaraan malaayyitu'uuyyi mattamo.

⁴⁴Waaraan ki'nnuwwina liqaayyissamo; ihukkaarem ki'nnuwwi ixxuwwina liqaayyissakkam diinat hee'ooyyo. Lasaanchonne ixxuwwi horoor ikkamo; ihukkaarem ki'nnuwwi sheerim ikkakkamo.

⁴⁵«Ki'nnuwwi Moollanni Waa'ina ijaajantakkobee'i bikkinaa ki'nnuwwina ixxi uwwu gatti seeraa ijaajoo egettakkobee'i bikkinaa ku booban hundim ki'nnuwwane afookko. Hore'em beedditakkeebe'i afeebe'e ki'nnuwwiinsi qee'llooyyo.

⁴⁶Oohim Waa'i ki'nnuwwaa ki'nnuwwi shumo'oo guzumo'ukkisa heer heerina tiissiisoo mare'i ihookko.

⁴⁷Ki'nnuwwi Moollanni Waa'i ki'nnuwwa lobakat googinne maasse'aa hee'ukko; ihukkaarem ki'nnuwwi lobakat liiranchinne ixxo awwaaddakko'oyyo.

⁴⁸Ee bikkina Waa'i asse'oo ki'n diina'ina awwaadaan ikkakkamo; hundem luwwannem hawwitakku'uuyyi sibaattakkamo, xeebe'llakkamoo leexa'llakkamoo. Hore'em bi'llakkeebe'i afeebe'e ki'nnuwwi diina'i anganne xaa'llisa qoxxaakkoo gassi gaanjaqqanne wor amadantakka'a hee'llakkamo.

⁴⁹Ki'nnuwwi suume laqqakkambee'i minaadaphphi gogota Waa'i qee'l uulliinsi ki'nnuwwi hanenne eebookko. Ixxuwwim hishshi ammachchisa ki'nnuwwi hanenne dillitamo.

⁵⁰Ixxuwwim ki'nnuwwika lommanna lonsitambee'i keeno, ciilluwwinam qishixxitambee'i mogaalluwwaa baddissam keenoo ikkamo.

⁵¹Ixxuwwi ki'nnuwwika fooraam diinatee hurbaataa hundam fii'lla'a ittam bikkina sibaarinne hawwitakkamo. Bi'llakkeebe'i afeebe'e hurbaata, woyi'n diqaasa, wee'l zayta, wo'lla, gereebbikaa fella'i wotallaa matim gatoo'n guullitamo.

⁵²Odim Moollanni Waa'i ki'nnuwwina uwwoo uullanne hee'oo ki'nnuwwi beero'uwwa hundam kibbitamo; amma'nnantakkam lob oottuwwi yoo girbuwwa hundam ginditamo.

⁵³«Diina'i ki'nnuwwi beero'uwwa kibbaa ki'nnuwwa u'nnisoo ammane ittakkam luwwa hoogimminne mal bi'oohaare ki'nnuwwi Moollanni Waa'i ki'nnuwwina uwwu oosika maara ittakkamo.

⁵⁴Ki'nnuwwi lambe'enne makkixxaa, heellamaahii ee qaranchannem bakke'aahii hee'oo manchom ihuta'n ee oos maariinsi ixxi abbaayyina, qaaphphaa iinse'oo ixxi arenaa gatu ixxi oosinaa uwweena qishixxookko.

⁵⁵Neeyyato mussiisoo ki'nnuwwi beero'uwwi hundannem ihoo diina'inne kibbanchi ammane ittakkam luchchi mullek mahim hee'oobee'i bikkina ittakkam ki'nnuwwi oos maariinsi ayyenam uwwitakkamoyyo.

⁵⁶Makkixxita'a, hee'llantahii ee qaranchannem bakke'lla'ahii ki'nnuwwi lambe'enne hee'llam cenqellimmi lophphimmiinsi ki'ukkok lokki uullam hance'aa la'oobee'etem maqire iinse'llam is manchinaa qatto'i oosinaa uwwiteena qishixxitamo.

⁵⁷Ki'nnuwwi beero'uwwanne neeyyato mussiisoo diina'inne kibbanchi ihoo ammane ittam luchcho mulleka maham siiddambee'i bikkina maaxanta'a ittam is godabiinsi firu oosiinsii godaphphi amiinsii ayyenam uwwitamoyyo.

⁵⁸«Ka kitaabanne kitaabamu Waa'i See'l sagara hundam qoxxitakka'a egettakkobeelasii maalalsiisoohanee baddisoohanee ihu ki'nnuwwi Moollanni Waa'i summa lonsitakkobeelasii

⁵⁹Waa'i ki'nnuwwannee ki'nnuwwi oosonnee baddisookkokaa lobakat ammanina hee'oo boobanaa qaqqiso fayye'oobee'i kee'mmaalli jabboo eebookko.

⁶⁰Gibxi uullanne dillu ammane moo'llakka'a badditakkam hee'llakko'i ee kee'mmaalli jabbo hundam odim ki'nnuwwi hanennem asse'ookko; ee jabbiinsim fayye'llakkamoyyo.

⁶¹Waa'i Seer kitaabamu ka kitaabanne kitaabamubee'i jabboo boobanaa hundam beedditakkona ki'nnuwwanne eebookko.

⁶²Ki'nnuwwik xig maham iima'n boollaankisa ihukkaarem ki'nnuwwi Moollanni Waa'ina ijaajantakkobee'i bikkina ki'nnuwwiinsi xale'i hofqax manni gattakkamo.

⁶³Waa'i ki'nnuwwina amaxxa uwweenaa ki'nnuwwam fikkaanniseenaa iittukkisam ee'isam ki'nnuwwa guullaa bi'isimmanne liiramookko; lago aa'llakkam uulliinsi xoqolantakka'a bi'llakkamo.

⁶⁴«Waa'i heer uullanne hee'oo minaadaphphi lambe'enne mat tochchiinsi mulli tochchi afeebe'e uulli hundannem bi'nnaa'ookko. Eehe'em ki'nnuwwii gaassi ki'nnuwwi anno'ii otossitakka'a laqqakkambee'i haqqinnee kininnee baxamaakkoo qophpha'n waa'uwwina otossitakkamo.

⁶⁵Ee minaadaphphi lambe'ennem ki'nnuwwina usheexxatii ki'nnuwwi lokkom usheexxissakkam beyyii hee'ooyyo. Waa'i ki'nnuwwina baachchaanchi tiiro, mixaninne jaliilaakkoo illee neeyyato muraakkoo sawwitee uwwookko.

⁶⁶Hundi ammanem u'nnanchinne hee'llakkamo. Ki'nnuwwi heechchi lubbat bee'an ihu bikkinam ballaa hiimoo baachchinne hee'llakkamo.

⁶⁷Woda'n baachchinnee illinne moo'llakkam muggisoo luwwi mashka'innee hiimoohaare ‹Hinki ammandu soodookko? Soodoohaare odim hinki ammandu hiimookko?› yitakkamo.

⁶⁸Waa'i ‹La'mmaagge ee beyyo mattakkamoyyo› yukkaarem markabanne aaggakka'a Gibxa mattakkamisa issookko. Ee beyyonnem ki'nnuwwi gaga diina'ina agid issitakka'a biteessakkeena hassakkamo; ihukkaarem agiddanina aa'ookkokam siiddakkamoyyo» yukko.