Read Hadiyya See'l Kitaaba 29 Bible Online

See'l Kitaaba 29 - Hadiyya bible

See'l Kitaaba 29

¹Waa'i Siina'i duunanne aagu hidi'l sagariinsi mulleka Moo'aabanne Isra'ee'l oosinne hidi'l sagara aagona Muse'e ijaaju sagar kanniinsi woroon yoohane.

²Muse'em Isra'ee'l minaadaba weeshaa «Waa'i Gibxi uulli adilanne, gassaanonnee ee uullanne hundoomannemii issu luwwi hundam,

³baddisoo boobana, issu agannaa maalalsiisoo mare'ee hundam ki'nnuwwi illinnem moo'llakko'ookko.

⁴Ihukkaarem Waa'i kaballi afeebe'e ki'nnuwwina issu luwwi hundam moo'llakkam ille, macceessakkam maccee qoossitakkam tiiroo uwwukkoyyo.

⁵An ki'nnuwwa sor hiincho hundam udma'i uullanne awwonsummuuyyi ki'nnuwwik eddechchii issaqqitakko'i kobe'ii beeddukkoyyo.

⁶Ittakkeena qorosho'i te'im aggakkeena woyi'n diqaas te'im mulli aggi hee'ukkoyyo. Ihukkaarem Moollanni Waa'i ixxi ki'nnuwwina Waa'i ihukkisa laqqakkamisina eekka issukko.

⁷Neese keyye amfummi ammane Haseeboo'n uulli adil Siihoonii Baasaa'n uulli adil Oogii neese qasseena waatta'a hee'llo'o. Ihukkaarem neese ixxuwwa kaa'nnummo.

⁸Ixxuwwi uullam lago aa'nnaa Roobeel sullina, Gaad sullinaa ee'isam Minaas sullaannina kollinaa gulummi ihoo'isina baxxansinaa uwwinummo.

⁹Ee bikkina baxxakkam luwwi hundim ki'nnuwwina taaphanona ka hidi'l saga'l ijaajo hundam erisa egellehe.

¹⁰Oono'o, kaballa ki'nnuwwi sulli awwonsaan, lommanni, daannuwwi, Isra'ee'l goon hundim, oosii meentii ki'nnuwwina haqqa antu'uuyyii wo'o eebbu'uuyyii ki'nnuwwi gattenne hee'llam waaraanii hundim ki'nnuwwi Moollanni Waa'i illagenne uullitakko'ookko.

¹²Uullitakko'ohim ki'nnuwwi Moollanni Waa'inne hidi'l sagara aaggakkeenatte. Ku hidi'l sagarim ki'nnuwwi Moollanni Waa'i ki'nnuwwina kaballa hide'aa la'isaakkoohane.

¹³Waa'i kaka issukkok ixxi ki'nnuwwina uwwu neeyyaxxisannee gaassi ki'nnuwwi anno'i hee'llo'i Abrihaamina, Yisaaqinaa Yaaqoobinaa uwwu Hidi'l Saga'llisannee ki'nnuwwa ixxi gaqqi minaadab issaa uulliseenatte.

¹⁴Waa'i ka hundem hiditaninne wo'mmaakkoo sagara aagookkok xale'i ki'nnuwwinneyyo.

¹⁵Ixxi ka hidi'l sagara aagookkok kaballa ka beyyonne ixxi illagenne uullinummi keeninnee kaballa ka beyyonne niinninne maqire bee'i keeninnee hundinneteme.

¹⁶Gibxi uullanne hinkid hee'nnumda'ee mulli minaadaphphi lambe'innem hinkid hingaa waallumda'ee ki'nnuwwi laqqakkamo.

¹⁷Ee minaadaphphi lambe'enne haqqinne, kininne, birinnee worqinnee baxakko'oo shigigaa'oo ixxuwwi waa'uwwa moo'llakko'ookko.

¹⁸Ka beyyonne uullitakko'i keeniinsi goonam ihukko meenti, mat abaroos te'im sulli, ni Moollanni Waa'iinsi qee'llaa mulli minaadaphphi waa'uwwa awwonoobee'isa ege'llona. Ki'nnuwwi lambe'enne eehido'i shoo qaraaraalli luwwa baxoo manchi hee'oone.

¹⁹Eehido'i manchi ka duunchi sagara macceesaa ‹I tii'llisa hee'ummaarem an xummaa› yaa ixxi tiironne sawwulas er manninaa jor manninaa hundinam bichcha eebookko.

²⁰Waa'i eehido'i manchina haafooyyo; hore'oomam Waa'ik quunqii to'achchii ee manchonne gii'llisa aphphookko. Waa'i ee mancho bi'iseena ka kitaabanne kitaabamu booban hundam ixxonne dilliisookko.

²¹Waa'i eehido'i mancho ka See'l kitaabanne kitaabamu duunchi saga'llisinne Isra'ee'l sulluwwi lambe'iinsi fissaa bi'isookko.

²²Waaroo qaranchuwwanne ki'nnuwwi shumo'ii qee'l uulliinsi waatto'i waaraanii Waa'i ki'nnuwwi uullanne eebu jabboo bichchaa moo'llamo.

²³Uulloomim diininnee sooqidinnee ifiisamookko. Ixxonne mah luwwim kaasamooyyo; mah luwwim mutooyyo; Waa'i ixxi kee'mmaalli quunqinne bi'isu Soddomisaa Gamorisaa, Adaamisaa Xibaayisaa ihookko.

²⁴Ee ammane heer uulli minaadab hundim ‹Waa'i ka uullanne ka luwwa hundam mahina issukko? Ka kee'mmaalli ixxi quunqindu mashka'i maruchcho?› yitu'uuyyi xa'mmitamo.

²⁵Dabachchoom ‹Ixxuwwi gaassi anno'o Moollanni Waa'i Gibxi uulliinsi fissu ammane ixxuwwinne aagu hidi'l sagara gindito'i bikkinatte.

²⁶Oohim illageen otossita'a laqqambee'aaninaa Waa'im otossitambee'isa ijaajaa hee'u qophpha'n waa'uwwinaa otossito'o.

²⁷Ee bikkina Waa'i ee minaadabanne quuqaa ka kitaabanne kitaabamu ka boobbannuwwa hundam ixxuwwi uullanne dilliisukko.

²⁸Waa'i kee'mmaallisa quuqaa ee uulliinsi xoqolanta'a mulli minaadaphphi uulla mattamisa issukko. Ee bikkina oono'o, kaballam ee uullannem yo'o› yoohane.

²⁹Ni Moollanni Waa'i daphphaa'aakkoo lobakat luwwi yookko; ihukkaarem la'amu See'l sagar hundim neesee ni oosii heer heerina egerimmi hasisookko.