Read Hadiyya See'l Kitaaba 30 Bible Online

See'l Kitaaba 30 - Hadiyya bible

See'l Kitaaba 30

¹«An kaballa ki'nnuwwi illagenne maassoo duunchaa dissaammo; Waa'i ki'nnuwwa binnaa'u minaadaphphi lambe'enne hundannem ikkakka'a sawwitakkolas,

²ki'nnuwwi shumo'inne maqirem Waa'i kolli daba'llitakkolasii kaballa an ki'nnuwwina uwwoommi Waa'i Seerina wodaninne ijaajantakolasii

³Moollanni Waa'i ki'nnuwwina qishixxookko. Mulli minaadaphphi lambe'enne ki'nnuwwa binnaa'u beyyi hundiinsim dabaraa woraa wixxaa'ookko.

⁴Uulli tochchi afeebe'e binnitakka'a hee'llakkaman ihuta'nnim Waa'i mateeyyoominne wixxaa'aa worookko.

⁵Ee'isinne gaassi ki'nnuwwi anno'i hee'llo'i uulla odim lago aa'llakkamo; ixxim gaassi ki'nnuwwi anno'iinsi loboka godditakka'a fikkaantakkamisa issookko.

⁶Moollanni Waa'i ki'nnuwwii ki'nnuwwi shumo'ii ixxena ijaajantakkam wodano uwwookko. Ee bikkina ki'nnuwwi ixxo wo'm wodaninne iittitakkamo. Ee uullannem hee'llakkamo.

⁷Ee duuncha hundam ki'nnuwwa saboohaannonnee wor amadoo diina'annee dabarookko.

⁸Odim ki'nnuwwi ixxena ijaajantakkamo; kaballa an ki'nnuwwina uwwoommi ixxi ijaajjuwwam egettakkamo.

⁹Baxxakkam luwwi hundannem Waa'i anceeta uwwookko; qachchinne, horinnee atootinnee hundinnem maasse'ookko. Waa'i gaassi ki'nnuwwi anno'ina godda uwwaa liiramam hee'ukkisam ki'nnuwwinam anceeta uwwaa liiramookko.

¹⁰Eeham issookkok ka See'l kitaabanne xafamu ijaajoo Seeraa egerimminne wo'm tiirinnee wodaninnee ki'nnuwwi Moollanni Waa'i kollonne daba'llitakko'aarette.

¹¹«Kaballa an ki'nnuwwa ijaajoommi ijaaj kee'mmaallayyo te'im laqqakkeena xantakkambee'aneyyo.

¹²Ki'nnuwwim ‹Macceensaa ijaajammona ayyi iimane firaa niina eebookko› yitakkambee'isa ku Seer hee'ookkok iimanenneyyo.

¹³Ee'isam ‹Macceensaa ijaajammona dambalaqa eeqidiinsi niina ayyi eebookko?› yitakkambee'isa seer hee'ookkok dambalaq eeqidonneyyo.

¹⁴Sagaroom ki'nnuwwina hore'em abbisonnette; egettakkamisinam ki'nnuwwi suumennettee wodanonnettee.

¹⁵An kaballa ki'nnuwwina heechchaa maassoo te'im lehoo jollee doo'llitakkona uwwaammo.

¹⁶Hee'llakkamisina, fikkaannitakkamisina, Waa'i ki'nnuwwina uwwoo uullanne aaggakka'a maasse'antakkamisina, Moollanni Waa'a iittitakkamisina, ixxi googonnem taakke'llakkamisinaa seeraa ijaajoo heechchi ogoraa egettakkamisinaa an kaballa ki'nnuwwa ijaajoommo.

¹⁷Ihukkaarem wodano Waa'iinsi qeessitakka'a sagara macceesimma sabbakkolasii mulli waa'uwwinam otossitakkolasii

¹⁸bi'llakkaman ihukkisa oono'o, an kaballa ki'nnuwwina qoxxisaa kuroommo. Yoordaanoos eeqiddonne fittakka'a lago aa'llakkam uullanne qeeraa'l doolle hee'llakkamoyyo.

¹⁹Oono'o, ki'nnuwwi illagenne heechchaa lehoo, Waa'ika maassoo duunchaa doo'llitakkona kaballa dissummisina uullaa iimanee ki'nnuwwanne naqaash issaammo. Ki'nnuwwii ki'nnuwwi shumo'ii foorinne hee'llakkamisina heechcha doo'llehe.

²⁰Ki'nnuwwi Moollanni Waa'a iittehe; ixxenam ijaajammehe; ixxonnem amma'nnehe. Oohim ki'nnuwwina heechchi ihimmiinsi loboka gaassi ki'nnuwwi anno'i ikko'i Abrihaamina, Yisaaqinaa Yaaqoobinaa hide'aa neeyyato uwwukkisinnem ki'nnuwwi aaggakkam uullanne lobakat doolle hee'llakkamo» yukko.