Read Hadiyya See'l Kitaaba 31 Bible Online

See'l Kitaaba 31 - Hadiyya bible

See'l Kitaaba 31

¹Odim Muse'e Isra'ee'l minaadabina

²«Oono'o, i umur mat xibbee lamiyyee ihu bikkina ka lasage an ki'nnuwwa awwonseena xanoommoyyo. Waa'im ‹Yoordaanoos daajji eeqido fittooyyo› yaa kuraakko.

³Ki'nnuwwina Moollanni Waa'i ki'nnuwwi illagenne ihaa awwonsookko; mulli minaadaba bi'isaa ixxuwwi uulla ki'nnuwwina uwwookko. Iyyaasim Waa'i yukkisanne ki'nnuwwa awwonsookko.

⁴Waa'i Amoore'i uulli adilluwwa Siihoonaa Oogaa bi'isukkisam ixxuwwam eehid bi'issookko.

⁵Waa'i ki'nnuwwi ixxuwwa kaa'llakkamisa issookko. Ee bikkina an ijaajummi ijaajo hundam ixxuwwannem issitakkamo.

⁶Ki'nnuwwi Murte'aalluwwaa iggaalluwwaa ikkehe; ixxuwwam badditakkotte; te'im muggitakkotte; Moollanni Waa'i ki'nnuwwinne maqir ihookko. Ixxi ki'nnuwwa uunjooyyo; urooyyome» yukko.

⁷Ee lasage Muse'e Iyyaaso weeshaa hundem Isra'ee'l minaadaphphi illagenne «Qoxxe, murte'e. Waa'i gaassi ixxuwwi anno'ina hide'aa neeyyato uwwukkisanne ka uulla ka minaadaba awwonsitaa amadiissoottok atette.

⁸Waa'i ixxi gagim kiinninnetti ihaa keese awwonsookko. Ixxi keese uunjooyyoo hore'em urooyyoo. Ee bikkina baddititte; neeyyatom muttitte» yukko.

⁹Ee lasage Muse'e Waa'ika Seera kitaabaa Hidi'l Saga'l Saaxina iyyitam hee'llo'i Leewi'i oosina, qeessuwwinaa Isra'ee'l minaadaphphi awwonsaaninaa uwwukko.

¹⁰Ixxuwwinam «Hundem badanim shiinshamoo lama'l hiinchi lasaanchonne lonsakkam Daas Ugudanne

¹¹Isra'ee'l oos hundim Moollanni Waa'i illagenne ixxi doo'lloo beyyonne wixxitam ammane ka Seera ixxuwwi illagenne qananaa'e.

¹²Hundim macceessa'a Moollanni Waa'a baddimma lossonaa ka See'l sagara erisa egettonaa goona, landa, oosoo ki'nnuwwi beero'uwwanne hee'llam waaraanoo mateeyyoomanne wixxaa'llehe.

¹³Yoordaanoos daajje fittakka'a amaddakkam uullanne hee'llakkam doollenne hundannem ka Seera macceessa'a laqqambee'i ki'nnuwwi shumo'i Waa'i Seera macceessa'a ki'nnuwwi Moollanni Waa'ina ijaajancha lossona» yaa ijaajukko.

¹⁴Ee lasage Waa'i Muse'ena «Kaba at letoo amman afaakko. Minaadaba awwonsoo Seera an uwwona Iyyaaso weeshshaa atii ixxii lamim keesamaakkoo dukkaana waallehe» yukko. Ixxuwwim keesammi dukkaa'n beyyo waatto'o.

¹⁵Waa'im keesamaakkoo dukkaa'n goocanne uullu duuphphi utuphphi worinnette ihaa caakkaa moo'amukko.

¹⁶Waa'i Muse'ena «At abbis ammanenne gaassi ki lob anno'isam letootto. Ee lasage an ixxuwwinne aagummi hidi'l sagara ku minaadab gindookko. Eesem uraa lago aa'oo uullanne hee'oo qophpha'n waa'uwwina otossookko.

¹⁷Ee ammane an ixxuwwanne quuqaa ixxuwwiinsi annanni ihoommo. I illem ixxuwwiinsi daphphaa'oommo. Ixxuwwim beedditamo; ixxuwwannem lobakata baddisoo booban dillookko. Ixxuwwim ee ammanenne ‹Ku hawwi neesenne afukkok ni Moollanni ni lambe'enne bee'i bikkinayyonnihe?› yitamo.

¹⁸Allaggi waa'uwwina otossimminne baxxo'i baaxii'l bikkina ee ammane an ixxuwwina hore'em hara'mmoommoyyo.

¹⁹At ka mazmuura kitaabbaa Isra'ee'l oosina losissaa zammattamisa isse. Ku mazmuurim iina naqaash ihookko.

²⁰An gaassi ixxuwwi anno'ina hide'aa uwwummi neeyyaxxisanne adii marabii daadoo uulla aaggamisa issoommo. Eehe'em itta'a godditahii geejjita'ahii lasage eese uttamo; i Hidi'l Sagaram gindita'a mulli waa'uwwina otossitamo.

²¹Ixxuwwanne dut kee'mmaalli hawwi afoo amman hundam ka xadamoobee'i mazmuura ixxuwwi oos zammattam ammane ixxuwwina naqaash ihookko. Anim ixxuwwina uwweena neeyyato uwwummi uulla aaggeena illageenim ixxuwwi maha sawwitamda'e la'oommo» yukko.

²²Ee ballam Muse'e ee mazmuura kitaabaa Isra'ee'l oosina losisukko.

²³Ee lasage Waa'i Naawe'i beet Iyyaasina «Qoxxe, murte'aallam ihe. An ixxuwwina uwweena neeyyatummi uulla Isra'ee'l ooso awwonsitaa aagissootto. Anim kiinninnette ihoommo» yaa ijaajukko.

²⁴Muse'em ka See'l Sagara lasaanchi afeebe'e kitaabanne kitaabaa guullaa lasage

²⁵Waa'ika Hidi'l Saga'l Saaxina iyyitam Leewi'i oosina

²⁶«Waa'i Seer kitaabamu ka kitaaba massitakka'a ki'nnuwwi Moollanni Waa'i Hidi'l Saga'l Saaxi'n gadanonne dissehe. Oohim minaadabanne naqaash ihookko.

²⁷Isra'ee'l minaadab hinkaa'nna boqquwwaa wodan duudaakkoo keenoo ikko'isa la'oommo. An awwonsam hee'ummi doollennem ihuta'n ixxuwwi Waa'anne boqqitu'uuyyi hee'llo'o. An lehaa lasaga'i hore'em boqqitamo.

²⁸Ee bikkina ka hundam an ixxuwwina kurona minaadaphphi awwonsaanoo sulli awwonsaanoo wixxaa'llehe. An uullaa iimanee ixxuwwanne naqaash issaa weeshoommo.

²⁹An lehaa lasage an ijaajummi ijaajiinsi haxonne aa'lla'a haashaarammi baxo baxxamisa la'oommo. Ixxuwwi Waa'i illagenne jor luwwa baxxa'a ixxo quuqissam bikkina ixxuwwanne boobana dilliisookko» yaa kurukko.

³⁰Ee lasage Muse'e hundem Isra'ee'l dummichchi illagennem ka mazmuura luxxaanniinsi ki'isaa lasaanchi afeebe'e qananaa'ukko.