Read Hadiyya See'l Kitaaba 32 Bible Online

See'l Kitaaba 32 - Hadiyya bible

See'l Kitaaba 32

¹Ixxim «Iimane, an wocoommi sagara macceese; uullim i suumiinsi firoo sagara macceesona.

²I losan xee'nnisa ga'nnona; I woshshim hoffi qiibaxxisa taktakihona; hixenne hee'oo qiibaxxisa mutanne yiroo xee'nnisa

³an Waa'i summa alallaatoommo. Ni Waa'i hundiinsi loban ihukkisa kullehe.

⁴«Ixxi niina girba ixxek bax hundim muccura; ixxek googim xabbeena. Ixxi huushamoobee'i amma'nnamaakkoo Waa'a; ixxi hanqo'anee xabbeenaa.

⁵Ixxuwwi ixxi illagenne haashaaramaakkoo haalata moo'isso'ookko. Eehanninne ixxi oos ikkakkobee'isa la'isso'ookko; ixxuwwim kolbanto'oo boqqi qarancha.

⁶Ki'nnuwwi qawwuwwaa qoossitakkabee'i keenoo, Waa'ina anga dabattakkamok ka'isinnettennihe? Ixxi ki'nnuwwa qooccu annayyonnihe? Baxukkokii qoxxisukkokdu ixxotteyyonnihe?

⁷«Huno'o gaassi doolle sawwi'llehe; lobakat doolliinsi illageen hee'u ammanem sawwi'llehe. Huno'o, ki'nnuwwi anna xa'mmehe; ixxim kurookko. Lommannam xa'mmehe; ixxuwwim aganna kuttamo.

⁸Hundam xanoo Waa'i ixxi minaadabina sharada baxxansu ammane manni ooso annanni issu ammane Isra'ee'l oosina xiqqisinne ixxi minaadabina gabala kaasukko.

⁹Isra'eel Waa'ina sharada; Yaaqoobim annanni ixxi amaxxa.

¹⁰«Hafachchaam mat luwwim bee'i uulli udma'anne siidukko. Agiram ihaa dakkukko; illi beetichchisam egerukko.

¹¹Ciicoolli hanenne do'oo do'nna egeroo hishshammachchisa ixxo qaaphpheena lada biddiqaa'ookko; ixxi ladannem iyyookko.

¹²Waa'i mullam awwonsukko; mulli waa'uwwi ayyim ixxenne hee'ukkoyyo.

¹³«Duunanne hee'isukko; uullikam hurbaata itisukko. Ki'n farqaqiinsi marabo kinaam uullanne mutu wee'llekam zayta itisukko.

¹⁴La'llekaa gereebbikaa adoo buuroo di'ir gereebbaa fella'aa Baasaa'nneka doo'l gereebbi ambulluwwa, doo'llammi aras daabbo'inne itisukko. Ixxi minaadab ki'nnuwwim kashar woyininne lubamaakkoo diqaasa aggakko'o.

¹⁵«Isra'ee'l oosim geejjito'o; boqqito'ome; lobakata itta'a geejjito'o; di'itto'ome. Ixxuwwa qooccu Waa'am utto'o; daphphaa'aa gatisookkoka sholliisso'o.

¹⁶Waa'am mulli waa'ina otossimminne to'achchisso'o; baxxam jor luwwi hundinnem quuqisso'o.

¹⁷Kanniinsi illageen laqqambee'i haareechcho waatto'oo keenina, Waa'inatte ihoo'n habusinaa ixxuwwi gaassi anno'i otossitobee'i waa'uwwinaa kitimto'o.

¹⁸Ixxuwwa qooccu waa'a utto'o; ixxuwwa li'isukkokam xaddo'o.

¹⁹«Waa'i eekka moo'aa qannaxukko; goo'n oosonnee landannem quuqukko.

²⁰Ixxim ‹I ille ixxuwwiinsi daphphaa'oommo; ixxuwwikam lasaanchi mah ihooda'e moo'oommo; ixxuwwim boqqi qaranchaa amma'nnantambee'i oosoo.

²¹Qophpha'n waa'uwwinne eese to'achchisso'ookko; awwaad bee'i waa'uwwina otossimminne quuqisso'ookko. Anim ixxuwwa gadamaakkoo minaadabinne to'achchisoommo; qoossoobee'i minaadabinnem quuqisoommo.

²²I quunqi aphphoo gii'llisa xanqookko; Si'oo'l xillaalloom afeebe'em aphphookko; uullaa uullanne yoo luwwaa hundam itookko; duu'n lugum afeebe'em shokkiisookko.

²³« ‹Ixxuwwi hawwonnem hawwo edoommo; i xiyyuwwam ixxuwwanne guulloommo.

²⁴Guulloo sibaaro ixxuwwanne asse'oommo. Ixxuwwim kee'mmaalli jabbinnee boobaninnee beedditamo. Odim itoo moochchaa qubaam hamashshaa asse'oommo.

²⁵Goog hundannem ixxuwwa bisa'i guullookko; min hundannem baachchi hee'ookko. Woraad, landi, oosii lommannii hundim beeddookko.

²⁶An ixxuwwa guullaa bi'isoommo. Ee lasage od ixxuwwa tiiroo hee'ooyyo.

²⁷Ihukkaarem ixxuwwi diina'i «Kaa'nnummok neesette bagaan Waa'ayyo» yita'a amaadimminne eese quuqissamda'e› yaa sawwoommo.

²⁸«Isra'eel tiir bee'i minaadaba; hore'em qoossitambee'i keeno.

²⁹Qoolluwwi ikka'a kaka laqqota'n lasaancho hindihitakkeena xantam hee'llo'o.

³⁰Qooccaanchi higisaa uwwubeelasii Waa'i uunjubeelasii hinkid mat manchi kuma te'im lam manchi tommi kuma holleena xanookko?

³¹Ni diina'im laqqamisam ixxuwwi waa'i ni Waa'isayyo.

³²Ni diina'i Soddo'mmisaa Gomo'llisaa haashaaranto'oo keeno. Ixxuwwi qaraaraallaa qubaam mishaa mishoo woyi'n kaashshisa.

³³Ixxuwwik woyi'n diqaas hamashshi qubisaa jor woraqaallichchi qubisaa.

³⁴«Ni diina'i hawwoddo'i hawwojji Waa'i doonanne kitaabamaakko.

³⁵Baado miqisoommok anette; ayyenam ixxi gaqqi baxisam miqoommo. Ixxuwwi bi'llam balli afu bikkina qo'llantamo; qaqqisonnem bi'llamo.

³⁶Hooggo'isa moo'aa Waa'i ixxi minaadabina qishixxookko; agishshoo wolabichchoo annanni issoo'n Waa'i ixxi minaadabina oogatookko.

³⁷Waa'im ixxi minaadaba ‹Amma'nnantam ixxuwwi waa'uwwi hannonne yo'o? Bakke'llam sifo'i kiinni'nno'i waa'uwdu hannonne yo'o?

³⁸Ixxuwwika di'ir kitima itto'i woyi'n diqaasam aggo'i waa'uwwi ki'lla'a hara'mmitona; girbuwwam ikkona.

³⁹« ‹Waa'i xale'e anette ihummisa laqqehe; iinniinsi bagaan mulli Waa'i bee'e. Shoommokii gatisoommokii anette; an omassoommo; dabaraahim fayyiisoommo. I angiinsi ayyim gatiseena xanooyyo.

⁴⁰I anga iima'n kolli biddiqaa'aa an heer heerinam hee'oomman ihummisa kuroommo.

⁴¹Belelle'oo bisa'a qareesoommo; oogatom oogatoommo. I diina'ikam baado miqisoommo; eese sabbam keeniinsim bito miqoommo.

⁴²Shakko'i kee'n xiiginne, qeefadakko'i kee'n xiiginnee diina'i awwonsaa'n xiiginnee i xiyya dimbisoommo; i bisa'im diina'i maara muransookko› yukko.

⁴³«Minaadaba, Waa'i ixxi minaadaphpheka xiiga miqisookko; diina'am bi'isookko; ixxo sabbam keeno guzumo'aa ixxi minaadaphphi baaxiilo shiinshookko; uulliinsi jolle bi'isookko. Ee bikkina ixxi minaadabinne maqire liirammehe» yaa qananaa'ukko.

⁴⁴Muse'e Naawe'i beet Iyyaasinnem maraa minaadabina ka mazmuura qananaa'ukko'o.

⁴⁵Muse'e ka mazmuura hundam minaadabina macceesisaa lasage

⁴⁶«Ka seera ki'nnuwwi oos erisa egettamisina ijaajjakkona an kaballa naqaash ihona ki'nnuwwina wocoommi sagara hundam qoossaqqehe.

⁴⁷Ku Seer kora'i saga'l woshshayyo; ixxi ki'nnuwwi foorina shooho'o. Ee bikkina ka Sagarina ijaajantakkolas Yoordaanoos daajji eeqidonne lago aa'llakkam uullanne lobakat doolle hee'llakkamo» yukko.

⁴⁸Waa'i ee ballam Muse'ena

⁴⁹«Moo'aaphphi uullanne Iyyaarko'i beero'i illagenne yoo Abaarii'm duunnuwwi koolli mare. Atim Naabo'i duunanne fittaa Isra'ee'l minaadabina uwwoommi Kana'aa'n uulla asi'mmitaa moo'e.

⁵⁰Kiyyabbaayyi Aaroon Hoo'l duunanne lehaa ixxi moollonne exxukkisam atim ee Naabo'i duunanne letootaa ki moollonne exxitootto.

⁵¹Ki'nnuwwi lamim Isra'ee'l minaadaphphi illagenne iina amma'nnantakko'oyyo. Xii'n udma'i uullanne Qaadees beero'i gadanonne yoo Mariiphphi bu'uwwi gadanonne hee'llakko'i ammane an Isra'ee'l minaadaphphi illagenne lombaam ihoommisa issitakko'ookko.

⁵²Ee bikkina an Isra'ee'l minaadabina uwwoommi uulla asi'mmitaa moo'llootto bagaan aaggooyyo» yukko.