Read Hadiyya See'l Kitaaba 33 Bible Online

See'l Kitaaba 33 - Hadiyya bible

See'l Kitaaba 33

¹Waa'i manchi Muse'e leheen illageen Isra'ee'l minaadaba kanniinsi woroon yoo'isanne maasse'ukko.

²Muse'em «Waa'i Siina'i duuniinsi waarukko; Eedoo'm uulliinsi soodaraa'l laaqqisa caakkisukko; Faaraa'n duuniinsim belecceesukko; ixxi makki anganne gii'l laban hee'ukko; ixxenne maqirem xigiinsi hanaan ihaakkoo asse'amaan hee'ukko.

³Waa'i hanqinam ixxi minaadaba iittookko; ixxi minaadaba hundam egerookko. Ixxuwwim ixxi lokkiinsi woroon ixxena otossitamo; ixxenam ijaajantamo.

⁴Isra'ee'l minaadabina amaxxi ihu an uwwummi Seera egettamo.

⁵Isra'ee'l sulluwwii minaadaphphi awwonsaanii wixxito'i ammane Waa'i Isra'ee'l minaadabanne adil ihukko» yukko.

⁶Muse'em Roobeel sulli bikkina «Moollanna, Roobeel sullik xig hoffan ihukkaarem hee'ona bagaan bi'oone» yukko.

⁷Yihuxxi sullinam «Waa'a! Yihuxxi sullika laachcha macceese; mulli sullinnem mat ikkamisa isse; ixxuwwika malaayye qoxxise; diina'inne orantam ammanem ixxuwwina hara'mme» yukko.

⁸Leewi'i sullinam «Moollanna, Tumiiminnee Uriiminnee [6] Maasa'annee Mariiba'i wo'i beyyonnee fitantaa keentitti ki awwaadaanina Leewi'i oosina ki doo'lla la'ise.

⁹‹Ixxuwwi kiina› yitu'uuyyi anno'oo amo'oo xaddo'ookko; qarmanniinsim annanni ikko'ookko; ooso utto'ookko; ki sagara lonsito'ookko; hidi'l sagaram egetto'ookko.

¹⁰Ixxuwwi kiikka ogora Yaaqoobina, Seeram Isra'eelina losissamuulla; ki illagennem aduruusa wiriissitamuulla; shokkiisakka'a hincaa'akkam kitimam kiina kitima hincaa'akkam beyyonne hincaa'llamuulla.

¹¹Moollanna, ixxuwwika amaxxa at maasse'e; ixxuwwi baxxam er bax keese liiransona; ixxuwwi diina'ika malaayye hoogise; ixxuwwa sabbam keen la'mmeka ki'llambee'isa isse» yukko.

¹²Biiniyaam sullinam «Waa'i iittookkok ixxonne amma'nnamaa hee'ookko; malaayyaam Waa'i balla hundoomam ixxo egerookko; Waa'i egechchi woronnem hee'ookko» yukko.

¹³Yooseef sullina «Waa'i iimaniinsi ga'nnoo xeeninnee xilli uulliinsi firoo wo'innee ixxuwwi uulla maasse'ona.

¹⁴Ixxuwwi uullim eelliinchinne mishaa doo'llammi mishinne wo'mmaakkoohan ihona; amman hundam lobakat atoota uwwona.

¹⁵Ee'isam hinaxxi doolliinsim hee'u duunnuwwiinsii hoffi duunnuwwiinsii lobakata doo'llamaakkoo atootinne goddaan ikkona.

¹⁶Ixxuwwi uulli doo'llamaakkoo luwwi hundinnem wo'mmaakkoohan ihona; aphphoo shif worinne moo'amu Waa'iinsi anceet lophphona; ixxi abbaayyuwwiinsi awwonsaanchi ihu Yooseefina adilla'n mare'e issakkona.

¹⁷Yooseefek hibbi lob moo'llisa baddisoohane; buudim boobi'l buuxxisa qoxxaalluwwa. Ee buudduwwinnem mulli minaadaba qasookko; uulli tochchi afeebe'em hollookko. Efireem sullik tommi kum Minaas sullikim kummuwwi ee'isame» yukko.

¹⁸Zaabiloo'n sullinaa Yisaakoor sullinaa «Zaabiloon markabinne daba'llamukkuuyyi liiramona; Yisaakoorim ixxi minenne ihaa liiramona.

¹⁹Ixxuwwim Minaadaba duuna weeshsha'a hanqo'i kitima duunanne hincaa'llamo; dambalaqiinsi amaxxa shashsha'l woriinsim maaxamaakkoo amaxxa siiddamo» yukko.

²⁰Gaad sullina «Gaad sullikka gabala haraassu Waa'i galaxxamona; Gaad woda te'im miine iiqeena hobbichchisa dugoolla.

²¹Awwonsimmi ixxena sharad ihu bikkina ixxi gagina er uulla doo'llukko; minaadaphphi awwonsaan wixxito'i ammane Waa'ika Seeraa ogoraa Isra'eelina issukko» yukko.

²²Daan sullina «Daan sulli hobbichchi geexisa calalaa Baasaa'n uulliinsi firookko» yukko.

²³Niftaaleem sullina «Niftaaleem Waa'i illagenne nuura siidaakkoohane; Waa'i maassinnem wo'mmaakkoohane; ixxi uullim Galii'l Dambalaq afeebe'ee woroo'n qar afeebe'ee biddiqaakkoohane» yukko.

²⁴Aseer sullinam «Aseer mulli sulli hundiinsim lophphaa maasse'amaakkoohan ihona; ixxom abbaayyuwwi iittoohan ihona; ixxi uullim wee'l haqqinne wo'mmaakkoohan ihona.

²⁵Beero'i ooxxi gooccuwwim xaarinnee naas xaarinnee qoxxaakkoohan ihona; ixxim doolli hundannem malaayyaam ihona» yukko.

²⁶Isra'ee'l minaadaba, iima'n hibbinne ki'nnuwwina hara'mmeena duubinnee iimaninnee marookkok ni Moollanni Waa'i'nnookkok ayyim bee'e.

²⁷Heer heerina hee'oo Waa'i ki'nnuwwina girba; ixxek heer heerina hee'oo wod bakkiisoohane; ki'nnuwwika diina'a ki'nnuwwi illagiinsi hollookko; guullitakka'a bi'issakkamisam issookko.

²⁸Ee bikkina Yaaqoob shumo'i iimaniinsi ga'nnoo xeen, hurbaatii woyi'n diqaasii wo'mmaakkoo uullanne lubbat yoo xummaanchi heechcha hee'ookko.

²⁹Isra'eela, at hinkido'i maassaamo; ki'isa Waa'i gatisu minaadab hinkane? Ixxi kiina hara'mmoo agira; ki kaachchinam bisa'a. Ki diina'i uunxitu'uuyyi ki beyyo waattamaare afare hancaaccootto.