Read Hadiyya See'l Kitaaba 34 Bible Online

See'l Kitaaba 34 - Hadiyya bible

See'l Kitaaba 34

¹Muse'em Moo'aaphphi biir beyyiinsi ki'aa Naabo'i duunanne firukko. Iyyaarko'iinsi eelliinchi firinne hee'oo Phisga'i duu'n ludonnem firukko. Ee lasage Waa'i ee uulla hundam daaphphaa moo'oo'isa issukko. Oohim Gala'aaxxi uulliinsi ki'isaa hanaa'n qarinne hee'oo Daan beero'i afeebe'e

²Niftaaleem uulla hundam, Efireemikaa Minaas uullaa, eelliinchi aagginne Meedeteraaniyaa'n Dambalaq tochchi afeebe'e yoo Yihuxxi uulla,

³Neegeebaa biir uullaa, Iyyaarko'i cebbanne yoo dimbaaphphi beero'o yakkam Iyyaarko'oo, Xoo'aar afeebe'e moo'isukko.

⁴Ee lasage Waa'i Muse'ena «An ixxuwwi shumo'ina lago aa'llakkeena Abrihaamina, Yisaaqinaa Yaaqoobinaa hide'aa neeyyato uwwummi uulli kane. Oono'o, at ee uulla illinne moo'llootto bagaan aaggooyyo» yukko.

⁵Ee bikkina Waa'i awwaadaanchi Muse'e Waa'i wocukkisinnem ee Moo'aaphphi uullanne lehukko.

⁶Waa'im Beetipha'oor beero'i illagenne hee'oo Moo'aaphphi uulli cebbanne waammukko. Ihukkaarem kaballi afeebe'em Muse'e waammamu beyyo la'oo manchi bee'e.

⁷Muse'e lehoo ammane ixxek umur xibbee lamiyyi hiinchoo hee'ukko. Ihukkaarem ixxek illi jaamukkoyyo; malaayyim hoogubee'i qoxxaalli manchi hee'ukko.

⁸Isra'ee'l minaadabim Muse'e lehonne kichche'lla'a sad balla hundam Moo'aaphphi biir uullanne afuutta'a wi'llito'o.

⁹Ixxi bikkenne minaadaba awwonsona Muse'e anga horoorenne issaa doo'llaa hee'u Naawe'i beet Iyyaas qooroominne wo'mmaakkoohan ihukko. Isra'ee'l minaadabim ixxena ijaajamukko. Waa'i Muse'ennette ihaa uwwu ijaajom egerukko.

¹⁰Waa'i moo'amaa atoorassu Muse'e'nnoo'i hiraagaanchi Isra'eelanne hore'em ki'aa la'ooyyo.

¹¹Waa'i Muse'e Gibxi uulli adi'l beyyo, gassaa'n beyyoo ee'isam ee uulli hundannem asse'aa ixxenne ihaa issu agannaa maalalsiisoo baxoo hundam moo'isu mulli hiraagaanchi hore'em bee'e.

¹²Muse'e hundem Isra'ee'l oos illagennem issukkaanni'nnoo'i lophphaakkoo malaayyaam baddisoo agannaa hundam moo'isu mulli hiraagaanchi hore'em bee'e.