Read Hadiyya See'l Kitaaba 5 Bible Online

See'l Kitaaba 5 - Hadiyya bible

See'l Kitaaba 5

¹Muse'e Isra'ee'l minaadaba hundam weeshaa «Isra'ee'l minaadaba, an kaballa ki'nnuwwina kuroommi seeraa gatti ogoraa hundam macceessehe. Ka ijaajo hundam erisa lossakka'a egellehe.

²Ni Moollanni Waa'i niinninne maqire Siina'i duunanne hidi'l sagara aagukko.

³Waa'i Hidi'l Sagara aagukkok xale'i niyyanno'innette ihoo'n kaballa foorinne yoommine'i niinninnetteme.

⁴Ee duunannem ihaa aphphoo gii'l woronne ki'nnuwwa atoorassukko.

⁵An ee ammane ixxi yoo luwwa ki'nnuwwina kureena ki'nnuwwi lambe'ennee Waa'i lambe'ennee uullummo. Mashka'oomim giira badditakka'a duunanne fittakkobee'i bikkinatte. «Waa'im

⁶‹Gibxanne agiddanonne hee'llitti beyyiinsi keese fissummi ki Moollanni Waa'i anette.

⁷«Iinniinsi bagaan mulli waa'uwwina otossititte.

⁸« ‹Iimanenne, te'im uullanne te'im wo'onne hee'oo ayyi luwwi kobi'llannem misila baxxaa otossitiitte.

⁹Eese sabba'a mulli waa'uwwina otossitam anno'i baaxiilo ixxuwwi oosonne sasiinsi soor qaranchi afeebe'e baado miqisoommi to'achchaanchi Waa'i ihummi bikkina ee waa'uwwina otossititte te'im awwaadditte.

¹⁰Ihukkaarem eese iittoo keeninaa i ijaajom egeroo keeninaa kum qaranchi afeebe'e heer heerina hee'oo i iitto moo'isommo.

¹¹« ‹Ixxi summa kora'am weeshoo mancho Waa'i guzumo'oo'n uroobee'i bikkina iikka ki Moollanni Waa'ika summa awwaad bee'i beyyonne weeshshitte.

¹²« ‹Ki Moollanni Waa'i An keese ijaajummisannem Usheexxaxxi Ayyaam keesammi ihu bikkina egere.

¹³Bax hundam baxxoo loh balli kiina yookko.

¹⁴Ihukkaarem lama'l balli iina ki Moollanni Waa'ina keesamaakkoo Usheexxaxxi Balla. Ee bikkina ee ballanne mah baxom baxxitte. At, ki oos, ki awwaadaan, fooraam diinatii ki hegeegonne hee'oo waaraanii mah baxom baxxakkotte. Ki awwaadaanim ki'isam usheexxona.

¹⁵Gibxanne agiddanonne hee'llitti beyyiinsi an ki Moollanni Waa'i malaayyinnee wodinnee fissummisa sawwihe. Usheexxaxxi Ayyaamo egettona ijaajummok eehanninatte.

¹⁶« ‹An ki Moollanni Waa'i ijaajummisannem kiyyannaa kiyyummaa lonse. Eekka issittilas luwwi hundim kiina makkookko; an kiina uwwoommi uullannem ki umur qeeraa'llookko.

¹⁷« ‹Shititte.

¹⁸« ‹Saa'llitte.

¹⁹« ‹Game'llitte.

²⁰« ‹Ayyi manchonnem qophphano naqqassitte.

²¹« ‹Mulli mannika meentichcho, mine, uulla, awwaadaano, laro, hallaa ixxena yoo amaxxa mahamii mixxitte› yukko.

²²«Duunanne Waa'i gii'l woronne, duuphphi worinnee gambabbi tuunsi worinnee ihaa ki'nnuwwina hundinam wixxitakko'i beyyonne kee'mmaalli sagarinne ka ijaajjuwwa ijaajukko bagaan mullaneyyo. Ka ijaajjuwwam cabbaramaa axisamaakkoo lam kinanne xafaa iina uwwukko.

²³«Duunanne giir aphpham hee'u ammane tuunsi woronne sagara macceessakka'a ki'nnuwwik sulli awwonsaanii lommannii i beyyo waattakka'a

²⁴‹Ni Moollanni Waa'i gii'l worinne wocukkuuyyi macceensummi ammane ixxi malaayyaamoo lombaamoo ihukkisa moo'isaakko. Waa'i atoorassaa lasage manchi foorinne hee'eena xanoo'isa kaballa moo'nnaammo.

²⁵Ihukkaarem oo malaayyaam giir neese bi'iseena xanookko. Eehidette ihulas lehimma hansoommok mahinatte? Ni Moollanni niina edaa woculas hanqo'isam lenoommo.

²⁶Gii'l lambe'ennetti ihaa ixxi wocukkaare neese macceensummisa hee'oo Waa'ika sagar macceesaa foorinne hee'eena xanukkok maara edde'u keeniinsi ayyette?

²⁷Muse, at hincitaa ni Moollanni Waa'i wocookkoka hundam macceessaa niina kure. Neesem eekka macceensaa ijaajammoommo› yitakko'o.

²⁸Waa'im eekka iina yitakku'uuyyi macceesu ammane ‹Ku minaadab kiina kutto'oka hundam macceesammo; wocco'ok hundim hanqa.

²⁹Hundi ammanem ka'isinne sawwitota'n hinkaa'n eran hee'ukko. Hundi ammanem eese lonsito'aaree i ijaaj hundam egetto'aaree hundem luwwim ixxuwwinaa ixxuwwi shumo'inaa hundi ammanem ixxuwwina taaphanookko.

³⁰Kabadem mataa ixxuwwi dukkaanam daba'llita'a ee'lle'llona kure.

³¹Ihukkaarem at ka beyyonnem egere. Anim i Seera, ijaajoo gatti ogoraa hundam kiina uwwoommo. An ixxuwwina uwwoommi uullanne ka Seera, ijaajoo gatti ogoraa egettona minaadabina losise› yukko.

³²«Isra'ee'l minaadaba, ki'nnuwwi Moollanni Waa'i ijaajo hundam egellehe. Ee ijaajjuwwiinsim makkannem qeddannem daba'llitakkotte.

³³Hundem luwwim ki'nnuwwina makkonaa lago aa'llakkam uullannem ki'nnuwwik umur qeeraa'llonaa ki'nnuwwi Moollanni Waa'i ijaajo hundam egellehe.