Read Hadiyya See'l Kitaaba 6 Bible Online

See'l Kitaaba 6 - Hadiyya bible

See'l Kitaaba 6

¹Yoordaanoos daajje higgakka'a lago aa'llakkam uullanne egettakkona losisoommisina ki'nnuwwi Moollanni Waa'i iina uwwu seer, ijaajii gatti ogorii

²ee uullannem lobakat doolle hee'llakkeena ki'nnuwwi, ki'nnuwwi oosii oos oosii hundim hee'llakkam doolli hundannem Ki'nnuwwi Moollanni Waa'a baddimmii ee seera, ijaajoo gatti ogoraa egerimmi hasisookko.

³Isra'ee'l minaadaba, macceessehe; ee seer hundinam ijaajammehe. Eekka issitakkolas luwwi hundim ki'nnuwwina makkookko. Xigonnem lobakat minaadab ikkakkamo; kiyyanno'i Waa'i gaassi niyyanno'ina uwwu neeyyaxxisannem marabii adii daadoo harish uullanne hee'llakkamo.

⁴«Isra'eela, macceese. Ni Moollanni Waa'i mexxo'i mat Waa'a.

⁵Ki Moollanni Waa'a ki wodan hundinnem, ki foor hundinnemii ki malaayyi hundinnemii iitte.

⁶An kaballa kiina uwwoommi ka ijaajjuwwa hundam xadditte.

⁷Ka ijaajjuwwa hundam ki oosina losise; minenne afuuttoo ammanem ihukko googo mattoo ammane, iinse'lloo ammanem ihukko ki'lloo ammane ka ijaajo hundi ammanem dabaransitaa tiire.

⁸Mare'i ihona ki anganne kare; ki miinennem kitaaphphe.

⁹Ki mi'n goocannee ooxxi gooccuwwannee kitaabe.

¹⁰«Ki Moollanni Waa'i gaassi kiyyanno'ina Abrihaamina, Yisaaqinaa Yaaqoobinaa aagu neeyyaxxi saga'llisannem at baxxitbee'i mishisoo lob beero'uwwi yoo uulla kiina uwwookko.

¹¹Ee uullanne at lago aa'lloo minneewwim dissitbee'i mishisoo mu'utinne wo'mmaakkoohane; hintibee'i wo'i balleewwi, kaassitbee'i woyi'n kaashshii weerii yoohane; Waa'i keese ee uulla aagisoo ammane ittaa godditaa lasage

¹²Gibxi uulli agiddaniinsi fissu Waa'a xaddoobee'isa ege'lle.

¹³Ki Moollanni Waa'a baddimminne lonse. Xale'i ixxena otossihe; hidi'l sagaram xale'i ixxi summinne aage.

¹⁴Ki hegeegonne hee'llam hanqo'i Waa'a laqqambee'i minaadab otossitam mulli waa'uwwina otossititte.

¹⁵Mulli waa'uwwina otossitakkolas Moollanni Waa'ik quunqi ki'nnuwwa uulliinsi bi'isookko. Mashka'oomim ki'nnuwwinne hee'oo Moollanni Waa'i to'achchoohane.

¹⁶«Maasa'anne issitakko'isa ki'nnuwwi Moollanni Waa'a keentakkotte.

¹⁷Ixxi ki'nnuwwina uwwu ijaajo, seeraa gatti ogoraa hundam qoxxitakka'a egellehe.

¹⁸Waa'ina xabbeenaa hanqo'anee ihu luwwi hundam issitakkolas hundem luwwim ki'nnuwwina taaphanookko; gaassi ki'nnuwwi anno'ina aagu neeyyaxxi saga'llisannem er harish uulla lago aa'llakkamo.

¹⁹Waa'i ki'nnuwwina aagu neeyyaxxi saga'llisannem ki'nnuwwi diina'a hundam hollitakkamo.

²⁰«Waaroo doollenne ki'nnuwwi oos ‹Ni Moollanni Waa'i ka ijaaj hundam egellona ijaajukkok mahinatte?› yaa xa'mmoo ammane

²¹‹Gaassi neese Gibxi adilina agid hee'nnummo. Ihukkaarem Waa'i ixxi wodaam malaayyinne agiddaniinsi fissukko.

²²Waa'i, Gibxi minaadabanne, Faari'oonannee ixxi gassaanonnee kee'mmaallisa baddisoo mare'ee agannaa issukkisa moo'nnaammo.

²³Gaassi niyyanno'ina uwweena neeyyaxxi sagara aagukkisannem ka uulla uwweena neese Gibxiinsi fissukko.

²⁴Ee lasage ni Moollanni Waa'i ka Seer hundam egelloommisinaa ixxom baddinoommisinaa ijaajukko. Neese ijaajammumlas hundi ammanem hundem luwwim niina taaphanoo'isa issaakko. Kaballa issukkuuyyi yoo'isam neese foorinne hee'isookko.

²⁵Ixxi neese ijaajukkisanne ni Moollanni Waa'i illagenne ka ijaajo hundam qoxxinaa egellumlas ookki niina muccuroom ihookko› yi'llehe.