Read Hadiyya See'l Kitaaba 8 Bible Online

See'l Kitaaba 8 - Hadiyya bible

See'l Kitaaba 8

¹«Foorinne hee'llakkeena, fikkaannitakkeenaa Waa'i gaassi ki'nnuwwi anno'ina uwweena neeyyatu uulla aaggakkeena xantakkamisinaa kaballa an ki'nnuwwina uwwummi ijaaj hundam qoxxitakka'a egellehe.

²Ki Moollanni Waa'i kiina uwwu ixxi ijaajjuwwa egettittisaa ki woda'nnekam la'eenaa keeneenaa ka udma'i uullanne sor hiincho hundam hawwi worinne higisukkuuyyi hinkid awwonsuda'e sawwihe.

³Sibaarinne hawwitoo'isa issukko. Ee lasage atii gaassi kiyyanno'ii ittakka'a laqqakkambee'i maanna'a itisukko. Eekka issukkokim manchi beet foorinne hee'eena xanookkok Waa'i sagarinnette bagaan xale'i hurbaatinnetti ihubee'isa losiseenatte.

⁴Ka sorem hiinchi woronnem ki eddechchi beeddukkoyyo; ki lokkim dashshukkoyyo.

⁵Anni ixxi ooso axeeroo'isa ki Moollanni Waa'im keese axeeroohan ihukkisa la'e.

⁶At ixxo baddimminnee ixxi googonnem marimminnee ki Moollanni Waa'ika ijaajo hundam egere.

⁷Oono'o, ki Moollanni Waa'i kiina harish uulla uwweena keese woraakko. Oo uullim cebbuwwiinsii duunnuwwiinsii firoo bu'uwwii daajjuwwii yoohane.

⁸Arasii so'ii, woyinii oda'ii, oroomaanii wee'l mishii, ee'isam marabii wo'mmaakkoohane.

⁹Oo uulli sibaattoobee'anee maham hooggoobee'anee. Oo uulli kiniinsi xaara, duunnuwwiinsim madaaba fissakkamane.

¹⁰Atim ittaa godditootto; kiina ka harish uulla uwwu ki Moollanni Waa'am galaxxitootto.

¹¹«Ki Moollanni Waa'a xaddaa an kaballa keese ijaajoommi ijaajo, seeraa gatti ogoraa xaddoobee'isa egere.

¹²Ittaa godditoohaaree er minneewwa baxxaa hee'lloohaaree

¹³gereebbikii la'llekii allaachchi, birii worqii ee'isam mulli amaxxii hundim lophphoohaare,

¹⁴bolxitoobee'isaa agiddanonne hee'lloo Gibxi uulliinsi fissu ki Moollanni Waa'a xaddoobee'isaa ege'lle.

¹⁵Ixxi keese qubaam hamashshii ginxa yakkam daquurii wo'mmaakkoo baddisoo ee haraar udma'i uullanne awwonsaakko; wo'i maham hee'oobee'i gogaalli uullanne sifo'i kiniinsi wo'o fissaakko.

¹⁶At ijaajantoo'isa moo'eena, keeneenaa lasonne kiina er luwwa isseenaa gaassi kiyyanno'i itta'a laqqambee'i maanna'a udma'i uullanne uwwukko.

¹⁷Ee bikkina ‹I malaayyinnee qoxallaninnee goddaanchi ihaammo› yitaa hore'em sawwititte.

¹⁸Goddaanchi ikkoo'isina malaayyee qoxallanoo uwwukkok ki Moollanni Waa'i ihukkisa sawwihe; ixxi eekka issookkok kaballa issoo'isam gaassi ki lobanno'inne aagu hidi'l sagara wonsheenatte.

¹⁹Ki Moollanni Waa'a xaddaa otossiteenaa awwaadeenaa qophpha'n waa'uwwi kolli daba'llitlas hanqoomam bi'lloohan ikkittisa kaballa an kiina qoxxisaa kuroommo.

²⁰Ki Moollanni Waa'ina ijaajantibeelas ki illagenne hee'oo mulli minaadaba bi'isoo'isam keesem xoqolansaa bi'isookko.