Read Hadiyya See'l Kitaaba 9 Bible Online

See'l Kitaaba 9 - Hadiyya bible

See'l Kitaaba 9

¹«Isra'ee'l minaadaba, macceese. Kiinninsi lophphitamanee malaayyaammuwwaa ikko'i minaadaphphi uullaa oot iimane afoo ixxuwwi lob beero'uwwaa ki gulummi issitaa a'lliteena kaballa Yoordaanoos daajji eeqidonne fittootto.

²Eekke'enne hee'llam minaadab uullichchi qeeraa'lluwwaa malaayyaammuwwaa; ixxuwwinnem ‹Ayyim uullixxameena xanoobee'i Eenaaq shumo'o› yakku'uuyyi macceessaatto.

³Ihukkaarem itoo giiri'nnoo'i ki Moollanni Waa'i ki illaginne maroo'isa kaballa moo'llootto. At illage matqaxanne ixxi kaachcha issookko. Ee bikkina ixxi uwwu neeyyaxxisanne ixxuwwa xoqoltaa hollitaa qaqqisom bi'issootto.

⁴«Ki'nnuwwi Moollanni Waa'i ki'nnuwwi illagiinsi ixxuwwa hollaa lasage ‹Waa'i ka uulla neese worukkok ni er bax bikkinatte› yitakka'a sawwitakkotte. Waa'i ee minaadaba xoqolaa hollookkok ixxuwwi jolli bikkinatte.

⁵Waa'i ixxuwwika uulla ki gulummi issitaa a'llitoo'isa issukkok at eranee hanqo'i luwwa issitoohanee ikkittaareyyo. Waa'i ixxuwwa xoqolaa holloo mashka'i ixxuwwi jor ikko'i bikkinaa ee'isam gaassi ki lob anno'ina, Abrihaamina, Yisaaqinaa Yaaqoobinaa uwwu neeyyaxxi sagara egereenatte.

⁶Ki wodan duud ihukkaarem ki Moollanni Waa'i ka er uulla ki gulummi issaa kiina uwwookko; oohim ki muccuroominnette ihubee'isa qoossitaa la'e.

⁷«Ki Moollanni Waa'a udma'i uullanne hinkid quuqissida'e xadditte. Gibxi uulliinsi fittitti balliinsi ki'isaa keyye waatteebe'i afeebe'e ixxonne boqqitaatto.

⁸Siina'i udma'i uullanne ki'nnuwwa bi'iseena ki'eebe'i afeebe'e Waa'a lobakata quuqissakko'ookko.

⁹Waa'i ki'nnuwwinne aagu hidi'l sagar kitaabamaakkoo ki'n ba'lluwwa aa'eena duunanne firaa hee'ummo. Anim eekke'enne maham itoo'nnii agoo'nnii sor ballaa sor hiimoo afuurummo.

¹⁰Ee lasagem ki'nnuwwi ee duu'n lugumonne wixxitakko'i ammane Waa'i gii'l woronnette ihaa wocukkuuyyi macceessakko'i sagara ixxi gaqqi anginne kitaabaakkoo lam ki'n ba'lluwwa iina uwwukko.

¹¹Sor balliinsii sor hiimiinsii lasage Waa'i hidi'l sagara kitaabaakkoo lam ki'n ba'lluwwaa iina uwwukko.

¹²«Ee lasage Waa'i ‹Qaqqissaa duuniinsi dille. At Gibxi uulliinsi awwonsitaa fissitti minaadab jor luwwa issimminne haashaaramaakko. An ixxuwwina uwwummi ijaaj hundiinsim ee ammanem qee'llita'a otossitam qophpha'n waa'a ixxuwwi gagina baxxo'ookko› yukko.

¹³«Ee lasage odim Waa'i ‹Oono'o, ku minaadab wodan duudaakkoohan ihukkisa la'oommo.

¹⁴Kanniinsi eehid ixxuwwa ayyim tiireena xanoobee'isa issaa bi'isoommo bikkina at cawwitaa ure. Anim ee lasage keese ixxuwwiinsi lophphaa malaayyaamoo dut minaadabina annaa ikkoo'isa issoommo› yukko.

¹⁵«Ee bikkina hidi'l sagar kitaabamaakkoo lamem ki'n ba'lluwwam i lamem angannem amadummisam duuniinsi dillummo. Ee ammane gii'l laban duunanne moo'amam hee'ukko.

¹⁶Ki'nnuwwim ki'nnuwwi Moollanni Waa'i ki'nnuwwina uwwu ijaajiinsi qaqqissakka'a qee'llitakka'a worqa[4] bukkitakka'a addichchi hagaranne qophpha'n waa'a baxxakka'a Waa'anne boqqitakko'isa moo'ummo.

¹⁷Ee bikkina lamem ki'n ba'lluwwam ki'nnuwwi illagenne huushaa iiqummo.

¹⁸Ee lasage odim sor ballaa sor hiimoo an maham itoo'nnii agoo'nnii Waa'i illagenne illillaachcha qubbaa otossummo. Eehid issummi mashka'im Waa'a kichche'isoo baaxiilo baxxakka'a ixxo quuqissakko'i bikkinatte.

¹⁹Waa'i ki'nnuwwa boobaninne bi'iseena ki'u bikkina ixxek malaayyaam quunqi eese baa'isaa hee'ukko. Ihukkaarem Waa'i odim i unxato macceesukko.

²⁰Waa'i Aaroonannem lobakata quuqu bikkina sheena gudaa hee'ukko. Ee bikkina an ee ammane Aarooninam edaa uunxummo.

²¹Ee addichchi kobi'llanne baxxakko'i baaxiilinne wo'mmaakkoo shigigaa'oo misila ki'isaa giiranne edummo. Ixxom iiqansaa dir issaa xaansummo; ixxi diram duuniinsi dilloo wo'onne issummo.

²²«Ki'nnuwwi odim Taabi'eranne, Maasahannee Qiibroot Hataawannee Waa'a quuqissakko'o.

²³Waa'i ‹Mallehe; an ki'nnuwwina uwwummi neeyyaxxi uulla lago aa'llehe› yaa Qaadees Baarne'iinsi asse'u ammanem ixxonne boqqitakko'o bagaan amma'nnantakko'oyyo. Ixxi sagarinam ijaajantakko'oyyo.

²⁴An ki'nnuwwa la'ummi ammaniinsi ki'isaa ki'nnuwwi Waa'anne boqqimma uttakko'oyyome.

²⁵«Anim ee bikkina sor ballaa sor hiimoo Waa'i illagenne illillaachcha ubummo. Eehid issummokim ixxi ‹Ki'nnuwwa bi'isoommo› yaa hee'u bikkinatte.

²⁶Anim ‹Hundam xantoo Waa'a! Ki malaayyinne wodinnee gatissaa Gibxi uulliinsi fissitti ki minaadaba bi'issitte.

²⁷Kiina awwaadaano Abrihaama, Yisaaqaa Yaaqoobaa sawwihe. Ka minaadaphpheka woda'n duudooma, boqqoomaa baaxiiloo hundam xiggitte› yaa uunxummo.

²⁸Eehid ihubeelas ‹Waa'i aagu neeyyaxxi saga'llisanne minaadaba ee uulla aagiseena xanukkoyyo› yita'a Gibxi uulli manni naacantamo. Hore'oomam ‹Minaadaba sabu bikkina sheena hasaa udma'i uullanne fissukko› yitamo.

²⁹Eehanniinsi hundiinsim hanaan ku minaadab ki gulummi ihona doo'llittanee ki lob malaayyinnee wodinnee Gibxi uulliinsi fissittanee.