Read Hadiyya Yohaannis Mishiraachcha 1 Bible Online

Yohaannis Mishiraachcha 1 - Hadiyya bible

Yohaannis Mishiraachcha 1

¹Mahim qooccamoo'n illageen sagar[1] hee'ukko. Oo sagarim Waa'inne maqire hee'ukko. Oo sagarim Waa'i hee'ukko.

²Mahim qooccamoo'n illageenim ixxi Waa'inne maqire hee'ukko.

³Luwwi hundim qooccamukkok ixxennette. Qooccamu luwwiinsi ma'lluchchim ixxi bee'eka qooccamukkoyyo.

⁴Ixxi foorina bu'o. Oo foorim mannina caakki hee'ukko.

⁵Oo caakkim caakkisookkok tuunsonnette. Tuunsim ixxo kaa'ukkoyyo.

⁶ Waa'iinsi asse'amaakkoo Yohaannisa yakkam mat manchi hee'ukko.

⁷Manni hundim ixxenne ihaa amma'nnoo'isina caakki bikkina kureena naqaash ihaa waarukko.

⁸Ixxi caakki bikkina kureena waarukko bagaan ixxi gagoom caakki hee'ukkoyyo.

⁹Manni hundinam caakkisoo hanqo'i caakki ka uulla waaram hee'ukko.

¹⁰Ixxi ka uullanne hee'ukko. Ka uullam qooccukkok ixxotte. Ihukkaarem ka uulli manni ixxo la'ukkoyyo.

¹¹Ixxi gaqqi uulla waarukkaare ixxi minaadab ixxo aa'imma sabbo'o.

¹²Ihukkaarem ixxo aa'lla'a ixxonne amma'nnito'i keen hundam Waa'i oos issukko.

¹³Ixxuwwim Waa'i oos ikko'ok manni sawwixxisinne te'im maarinnee xiiginnee qaramimminnette ihoo'n Waa'i ixxi oos issu bikkinatte.

¹⁴Sagarim manchi ihukko. Ixxonnem eroommii hanqii wo'mmaa ni lambe'enne hee'ukko. Ixxim Anni Waa'ina mexxo'i Beet ihukkisa ixxeka lomba moo'nnummo.

¹⁵Yohaannisim ixxi bikkina «An ‹Iinniinsi lasonne waarookkok iinniinsi gaassaatim hee'u bikkina iinniinsi lobane› yam hee'ummok ixxotte» yaa sagara iimaa'aa wocukko.

¹⁶Eroommanne eroomma edaa ixxaanninne wo'm eroomminne neese hundam maasse'ukko.

¹⁷Waa'i Muse'enne ihaa Seera uwwaakko. Ihukkaarem hanqii eroommii Yesuus Kiristoosinne uwwamukko.

¹⁸Waa'inne maqire hee'u matem Waa'i Beet mannina la'isukko bagaan Waa'a matim moo'ukkoyyo.

¹⁹Ayihuxxi minaadaba gassaan Yerusaaleemiinsi qeessuwwaa Keesammi Minenne awwaaddam keenoo Yohaannis ayyetda'e ihukkisa xa'mmitamisina asse'llo'aare

²⁰Yohaannis «An Kiristoosatteyyo» yaa kurukko bagaan lagukkoyyo.

²¹ Oo asse'anto'i keen «At ayyette? At hiraagaanchi Eeliyaasattennihe?» yita'a xa'mmito'o. Ixxim dabaraa «An Eeliyaasatteyyo» yukko. Odim dabatta'a «At neese egellummi hiraagaanchonnihe?» yito'o. Ixxim dabaraa «An ixxoyyo» yukko.

²²Ee lasage «Eehaara'i ki beyyo neese asse'llo'i keenina daballaa kulloommisina at ki gaga ayyette yitoolla?» yita'a xa'mmito'o.

²³ Yohaannisim ixxuwwina dabaraa hiraagaanchi Issaayyaas kitaabanne « ‹Udma'anne Moollannina googo gudissehe› yaa laaroo manchi sagar anette» yukko.

²⁴Farisaawe'uwwi asse'llo'i keen Yohaannisina odim

²⁵«Ata'i Waa'i doo'llaakkoo Kiristoosatteyyo te'im Eeliyaasatteyyo te'im hiraagaanchoyyo. Eehaara'i at manna mahina xammaqqoolla?» yita'a xa'mmito'o.

²⁶Yohaannis ixxuwwina dabaraa «An wo'inne xammaqoommuulla; ihukkaarem ki'nnuwwi laqqakkambee'ek ki'nnuwwi lambe'enne uullaakko.

²⁷An ixxeka caamma'i fatiram tireena hore'em laboombee'ek ixxi i lasonne waaroolla» yukko.

²⁸Ookki hundim ihukkok Yohaannis xammaqam hee'u Yoordaanoos daajji eeqidonne yoo Biitaanannette hee'ukko.

²⁹La'm balla Yesuus ixxi beyyo waarukkuuyyi Yohaannis moo'aa «Oono'o! Mannika baaxiilo shiinshoo Waa'i Gereechchi kane.

³⁰An ‹Ixxi iinniinsi gaassaatim hee'u bikkina iinniinsi lobane› yummok ixxotte.

³¹Isra'ee'l minaadab ixxo laqqamisina wo'inne xammaqummuuyyi waarummo bagaan an i gagim ixxo la'am hee'ummoyyo» yukko.

³²Odim Yohaannis «Keesammi Ayyaan handarekkichchisa iimaniinsi dillaa ixxi hanenne afuurukkuuyyi moo'ummo.

³³An i gagim ixxo la'am hee'ummoyyo. Ihukkaarem eese ‹Wo'inne xammaqe› yaa asse'ukkok iina ‹Keesammi Ayyaan iimaniinsi dillaa ixxonne afuurukkuuyyi moo'lloottokii Keesammi Ayyaaninne xammaqookkokii ixxotte› yukko.

³⁴Anim eekka moo'aa lasage ixxi Waa'i Beet ihukkisa kurummo» yaa Yesuus bikkina naqqasukko.

³⁵Odim eehanni la'm balla Yohaannis ixxi losaaniinsi laminne maqirem uullaakkoohaannonne

³⁶Yesuus higonam Yohaannis moo'aa «Waa'i Gereechchi oono'o!» yukko.

³⁷Yohaannis ee'isa yukkuuyyi macceessa'a lamem losaanim Yesuusa awwonto'o.

³⁸Yesuus oo lamem losaanim ixxo awwontamisa laso qerephaa moo'aa «Maha hassakkamuulla?» yaa xa'mmukko. Ixxuwwim dabatta'a «Losisaancho! At hee'lloo beyyi hannonnette?» yita'a xa'mmito'o.

³⁹Yesuusim ixxuwwina dabaraa «Waattakka'a moo'llehe!» yukko. Ee lasage ixxuwwi matta'a ixxi hee'oo beyyo moo'lla'a ee balla ixxenne maqirem hosso'o. Oo ammanim tommi sa'aata iheena ihaakkoo amman hee'ukko.

⁴⁰Yohaannis yu luwwa macceessa'a Yesuusa awwonta'a matto'i lamem keeniinsim mat Simi'oon abbaayyi Indiraasatte hee'ukko.

⁴¹Indiraas gaassaatim ixxi abbaayyi Simi'oona siidaa «Simi'oona, Waa'i doo'llaakkoo Kiristoosa neese siindaammo» yukko.

⁴²Simi'oonam Yesuus beyyo worukko. Yesuus Simi'oona moo'aa «At Yoona'i beet Simi'oonatte; at Keefa[2] yamantootto» yukko. Keefa yimmi «Kina» yimma.

⁴³Odim eehanni la'm balla Yesuus Galiila mareena hasukko. Ixxim Filiphphoosa siidaa «Filiphphoosa, at eese awwone» yukko.

⁴⁴Filiphphoos hee'ookkok Indiraasii Pheexiroosii hee'llam Beetasaayda yakkam beero'onnetti hee'ukko.

⁴⁵Filiphphoosim Naatinaa'eela siidaa «Muse'e kitaabu See'l kitaabannee hiraagaan kitaabbo'i kitaabbuwwannee ixxi bikkina kitaabbo'i Naazireexxi Yesuusa Yooseef beeto siindaammo» yukko.

⁴⁶Naatinaa'eelim ixxena dabaraa «Naazireetiinsi danaam luwwi fireena xanoohonnihe?» yukko. Filiphphoos ixxena dabaraa «Waattaa moo'e» yukko.

⁴⁷Naatinaa'eel ixxi beyyo waaronam Yesuus moo'aa «Jolbee'i hanqo'i Isra'ee'l manchi kuno'o!» yukko.

⁴⁸Naatinaa'eel ixxena dabaraa «At eese hinkid laqqitto?» yaa xa'mmukko. Odim Yesuus Naatinaa'eelina «Filiphphoos keese weeshoo'n illageenim an keese odakkichchi lugumonne hee'llittuuyyim moo'aammo» yaa dabarukko.

⁴⁹Naatinaa'eelim Yesuusina dabaraa «Losisaancho! At Waa'i Beeto! At Isra'eelina adila!» yukko.

⁵⁰Yesuusim ixxena «An keese odakkichchi lugumonne moo'aammo yummi bikkina at eese amma'nnitoohonnihe? Eehanniinsi lophphoo luwwam moo'llootto.

⁵¹ Hanqinam an ki'nnuwwina kuroommo; iiman fooqoohaare Waa'i asse'amaan Manchi Beet hanenne iim fittu'uuyyii aad dillitu'uuyyii moo'llakkamo» yukko.