Read Hadiyya Yohaannis Mishiraachcha 10 Bible Online

Yohaannis Mishiraachcha 10 - Hadiyya bible

Yohaannis Mishiraachcha 10

¹Odim Yesuus «Hanqinam an ki'nnuwwina kuroommo; gereebbi garoo mine goocinne aagimma uraa mulli googinne iiqaa aagoo manchi gamaanchoo bogaanchoo.

²Ihukkaarem goocinne aagookkok gereebba allaaraancho.

³Gooca egeraanchim ixxena gooca fooqaa'ookko. Oo gereebbim ixxeka sagara macceesookko. Ixxim ixxi gereebbika summa weeshaa fissookko.

⁴Ixxan ihu gereebbi hundam fissaa lasage ixxuwwi illageen higaa awwonsookko. Ixxuwwim ixxeka sagara laqqam bikkina ixxo awwontamo.

⁵Ihukkaarem mulli mannika sagara laqqambee'i bikkina ixxuwwiinsi gibbamo bagaan awwontamoyyo» yukko.

⁶Yesuus ka kobi'llishsha ixxuwwina kurukkaarem ixxi kurukkok maruchda'e ihukkisa ixxuwwi qoossito'oyyo.

⁷Ee bikkina Yesuus ixxuwwina «Hanqinam an ki'nnuwwina kuroommo; an gereebbi garoo minina gooca.

⁸Iinniinsi gaassita'a waatto'i keen hundim gamaanoo bogaanoo. Ihukkaarem gereebbi ixxuwwika sagara macceesooyyo.

⁹An gooca; iinninne aagookkok ayyim gatookko. Ixxim aagookkomee firookkomee. Itoo luwwam siixxookko.

¹⁰Gamaanchi waarookkok game'eenatte, sheenattee bi'iseenattee. Ihukkaarem an waarummok ki'nnuwwi heechcha siixxitakkamisinatte. Oo siixxitakkam heechchim wo'm heechcha.

¹¹«An er allaaraancho. Er allaaraanchi gereebbi bikkina yaa ixxi foore higisaa uwwookko.

¹²Ihukkaarem mannika gereebba allaaroo fo'annichchi gereebbina annichchoo allaaraanchoo ihubee'i bikkina oro'i waaroo ammane gereebba uraa gibookko. Oo oro'im gereebba hiddibbaa'aa massookko. Gereebbim binnaa xa'ookko.

¹³Oo fo'annichchi giboo mashka'im diinate siixxeena allaaroohane bagaan gereebbina hore'em kichche'oobee'i bikkinatte.

¹⁴«An er allaaraancho. Iyyanni eese la'oo'isam anim iyyanna la'oommisam an i gereebba la'oommo. Ixxuwwim eese laqqamo. Ixxuwwi bikkinam i foore higisaa uwwoommo.

¹⁶Ka gereebbinne maqire bee'i mulli gereebbim iina yookko. An ixxuwwa worimmi hasisoohane. Ixxuwwim i sagara macceessamo. Mat allaachcham ikkamo. Allaaraanchim mat ihookko.

¹⁷An i foore dabaraa aa'eena higisaa uwwoommi bikkina Iyyanni eese iittookko.

¹⁸An i doo'llinne i foore higisaa uwwoommo bagaan iinniinsi ayyim masseena xanooyyo. An i foore higisaa uwweenaa dabaraa aa'eenaa malaayyi yookko. An ee ijaajo aa'ummok Iyyanniinsette» yukko.

¹⁹Ee woshshinne ki'ukkok Ayihuxxi manni lambe'enne odim annannoom ihukko.

²⁰Ixxuwwiinsim dut keen «Ixxo habus amadaakko; ixxi machchaaraakko. Ixxi woshsha mahina macceessakkamuulla?» yito'o.

²¹Odim mulli keen «Habus amadu manchi ka'isa wocooyyo. Habus qooq manchika ille fooqaa'eena xanoohonnihe?» yito'o.

²²Yerusaaleemanne Keesammi Mine muccussakko'isa tiirakkam ugud hee'ukko. Ammanoom hagayyi hee'ukko.

²³Yesuusim Keesammi Minenne daba'llamakkam Salamoon Goocanne taakke'amam hee'ukko.

²⁴Ayihuxxi manni ixxo kululaa'lla'a kibbita'a «Neese hinkaa'n amman afeebe'e malansitootto? At Kiristoosatte ikkaattoolas caakkissaa kure» yito'o.

²⁵Yesuus ixxuwwina dabaraa «An ki'nnuwwina kuraammo; ihukkaarem ki'nnuwwi amma'nnitakko'oyyo. An Iyyanni summinne issoommi luwwi i bikkina naqqasookko.

²⁶Ihukkaarem ki'nnuwwi i gereebbi ikkakkobee'i bikkina amma'nnitakkamoyyo.

²⁷I gereebbi i sagara macceesookko. Anim ixxuwwa la'oommo. Ixxuwwim eese awwontamo.

²⁸An ixxuwwina heer heerina hee'oo heechcha uwwoommo. Ixxuwwi hore'em bi'llamoyyo. Ayyim ixxuwwa i angiinsi fissaa massooyyo.

²⁹Iina ixxuwwa uwwu Iyyanni hundiinsim lobane. Ayyim Iyyanni angiinsi ixxuwwa fissaa masseena xanooyyo.

³⁰Anii Iyyannii matome» yukko.

³¹Ayihuxxi manni odim ixxo aphphisseena kina ki'isso'o.

³²Yesuus ixxuwwina dabaraa «An Iyyanniinsi lobakat danaam baxo moo'isummo. Ee baxummi baxiinsi eese kininne aphphissakkamok hinkanninatte?» yukko.

³³Ayihuxxi manni ixxena dabatta'a «Neese keese kininne aphphinsoommok at baxxitti danaam baxinatte ihoo'n manchi ikkaa hee'llittuuyyim ki gaga Waa'i issitaa Waa'a game'llitoo bikkinatte» yito'o.

³⁴ Yesuus ixxuwwina dabaraa «Ki'nnuwwi See'l kitaabanne ‹An ki'nnuwwa waa'uwwa yaammo› yamamaa kitaabamaakkoollayyonnihe?

³⁵Keesammi Kitaabanne kitaabamukkok gindamooyyo. Waa'i sagar uwwamu keeno Waa'i ixxi gagim ‹waa'uwwa› yulas

³⁶Waa'i annanni issaa ka uulla asse'u eese ‹An Waa'i Beeto› yummaare ‹Waa'inne game'llamoolla› yitakkamonnihe?

³⁷An Iyyannika baxo baxumbeelas eese amma'nnitakkotte.

³⁸Eese amma'nnitakkobee'aarem an Iyyannika baxo baxoommuulla ihulas Iyyanni iinninne anim Iyyanninne mat inkummisa qoossitakka'a laqqakkamisina an baxoommi baxonne amma'nnehe» yukko.

³⁹Ixxuwwim Yesuusa odim amaddeena hasso'aare ixxuwwi angiinsi xorukko.

⁴⁰ Yesuus odim Yoordaanoos daajji eeqidonne Yohaannis luxxeka xammaqam hee'u beyyo maraa ee beyyonne afuurukko.

⁴¹Dut mannim ixxi beyyo waatta'a «Yohaannis maalalsiisoo mare'e maham issukkoyyo. Ihukkaarem Yohaannis ka manchi bikkina kuru woshshi hundim hanqa» yito'o.

⁴²Ee beyyonne lobakat keen ixxonne amma'nnito'o.