Read Hadiyya Yohaannis Mishiraachcha 11 Bible Online

Yohaannis Mishiraachcha 11 - Hadiyya bible

Yohaannis Mishiraachcha 11

¹ Biitaana yakkam gattenne hee'oo Ali'aazara yakkam manchi xissaa hee'ukko. Oo Biitaa'n gattim Maaraamee Maaraam aayya Maarta'aa hee'llam gatti hee'ukko.

²Oo Maaraame Moollanni lokkonne shitto'o labba'a isaanninne horoo'l saraatinne shiinshito'otan hee'llo'o. Xissu Ali'aazarim isena abbaayyi hee'ukko.

³Ee bikkina ixxi aayyuwwi «Moollanna! At iittitoo Ali'aazar xissaakko» yita'a Yesuus beyyo asse'llo'o.

⁴Ihukkaarem Yesuus eekka macceesu ammanenne «Ixxi xissukkok Waa'i Beet ixxonne lomba siixxoo'isinattee Waa'ikim lombi moo'amoo'isinatte bagaan ixxek xissi shoobee'ane» yukko.

⁵Maarta'a, Maarta'i aayyaa Ali'aazaraa Yesuus iittam hee'ukko.

⁶Ali'aazar xissukkisa macceesukkaarem Yesuus ee beyyonne lam balla hosukko.

⁷Ee lasage ixxi losaanina «Yihuxxi uulla daba'llinaa mallona» yukko.

⁸Ixxi losaanim «Losisaancho! Ayihuxxi manni hofqax ammaniinsi illageen keese kininne aphphisseena hassam hee'llo'oyyonnihe? Odim ee beyyo daba'llitaa matteenannihe?» yito'o.

⁹Yesuus ixxuwwina dabaraa «Mat balli tommoo lam sa'aatayyonnihe? Ayyim ballanne taakke'ookkok ka uulli caakka moo'oo bikkina ee caakka moo'ukkuuyyi qo'llooyyo.

¹⁰Ihukkaarem tuunsonne taakke'ookkok caakki ixxenne bee'i bikkina qo'llookko» yukko.

¹¹Yesuus eekka wocaa lasage ixxuwwina «Ni beshichchi Ali'aazar diriiraakko. An ixxo maraa diriiriinsi ki'isoommo» yukko.

¹²Ixxi losaan ixxena «Diriiraakkoohan ihulas fayye'ookko» yito'o.

¹³Yesuus «Ali'aazar diriiraakko» yukkok lehaakko yeenatte hee'ukko. Ihukkaarem ixxi losaan eekka wocukkaare hanqo'i diriichcham labissa'a hee'llo'o.

¹⁴Ee lasage Yesuus «Ali'aazar lehaakko.

¹⁵Ki'nnuwwi eesenne amma'nnitakkamisina an ee beyyonne hee'umbee'isanne liiramoommo; ihukkaarem kaba ixxi beyyo mallona» yukko.

¹⁶Qafa yakkam Toomaas ixxi besh hee'llo'i losaanina «Neesem ixxenne maqirem leneena mallona» yukko.

¹⁷Yesuus Biitaana afu ammane Ali'aazar waammamukkaanniinsi soor balla ihaa hee'ukko.

¹⁸Biitaan Yerusaalee'm beero'iinsi sas kiilomeetira ihooqaxa taakkiisoo abbis beyyi hee'ukko.[10]

¹⁹Maarta'anaa Maaraamenaa abbaayyi hee'u Ali'aazar lehu bikkina lobakat Ayihuxxi manni bakkaatteena waatta'a hee'llo'o.

²⁰Maaraame minenne afuutta'a hee'llo'isam Maarta'a Yesuus waaroo'isa macceesso'i ammanenne ixxo aa'lleena fitto'o.

²¹Maarta'a Yesuusina «Moollanna! At ka beyyonne hee'llitta'n iyyabbaayyi leham hee'ukkoyyo.

²²Kabadettem ihukkaare at xa'mmitti luwwi hundam Waa'i kiina uwwoo'isa an la'oommo» yito'o.

²³Yesuus Maarta'ana «Kiyyabbaayyi lehiinsi ki'ookko» yukko.

²⁴Maarta'am «Ixxi lasaanchi ayyaamonne lehiinsi kichchi ammane ki'oo'isa la'oommo» yito'o.

²⁵Yesuus isena dabaraa «An lehiinsi ki'isoommanee heechcha uwwoommanee. Eesenne amma'nnookkok lehukkaarem hee'ookko.

²⁶Foorinne yookkokim eesenne amma'nnookkok hore'em lehooyyo. At eekka amma'nnitoohonnihe?» yukko.

²⁷Maarta'am ixxena dabatta'a «Eeyya, Moollanna! At ka uulla waaroo doo'llantaattoo Kiristoosatte ikkittisa an amma'nnoommo; at Waa'i Beeto» yito'o.

²⁸Ee'isa yita'a lasage matta'a is aayyi Maaraamena «Losisaanchi waaraa keese weeshoolla» yita'a manni la'oobee'isa kutto'o.

²⁹Maaraame eekka macceesso'i ammanenne qaqqissa'a ki'lla'a ixxi beyyo matto'o.

³⁰Yesuus ee ammane Maarta'a ixxenne edanto'i beyyonne hee'ukko bagaan ee gatte afukkoyyi hee'ukko.

³¹Ee ammane Maaraam minenne bakkaatta'a hee'llo'i Ayihuxxi manni Maaraame qaqqissa'a shoottita'a fitto'isa moo'llo'i ammanenne waammi beyyo matta'a wi'lliteena fitto'oka labissa'a laseessa'a fitto'o.

³²Ee lasage Yesuus yoo beyyo Maaraame affa'a ixxo moo'llo'i ammanenne ixxi illagenne ubba'a «Moollanna! At ka beyyonne hee'llitta'n iyyabbaayyi leham hee'ukkoyyo» yito'o.

³³Maaraamee isenne maqire hee'llo'i Ayihuxxi mannii wi'llitamisa Yesuus moo'u ammanenne ixxi wodanonne lobakata kichche'aa

³⁴«Waammitakko'ok hannonnette?» yaa xa'mmukko. Ixxuwwim dabatta'a «Moollanna! Waattaa moo'e» yito'o.

³⁵Yesuusim wi'llukko.

³⁶Ee bikkina Ayihuxxi manni «Ixxi Ali'aazara hinkaa'nna iittooda'e moo'llehe» yito'o.

³⁷Mat mat keen odim «Qooqu manchikam ille fooqaa'ukkok Ali'aazar lehoobee'isa hooreena xanam hee'ukkoyyonnihe?» yito'o.

³⁸Ee lasage Yesuus lobakata kichche'aa waammi beyyo marukko. Oo waammim ki'n kolo'i ihaa suumenne kin ifiisamaakkoohan hee'ukko.

³⁹Yesuus ixxuwwina «Ka kina ki'issakka'a hoollehe» yukkaare ee lehu manchina aayyatte hee'llo'i Maarta'a dabatta'a «Moollanna! Ixxi lehukkaanniinsi soor balla ihu bikkina boboo'n hee'ooyyo?» yito'o.

⁴⁰Yesuus isena dabaraa « ‹At amma'nnitlas Waa'ika lomba moo'llootto› yaa hee'ummoyyonnihe?» yukko.

⁴¹Ee lasage waammiinsi manni kina ki'isaa hoorukko. Yesuus iim moo'ukkuuyyi «Iyyanna! I uunxato macceessitti bikkina keese galaxxoommo.

⁴²An eehid yummok ku ka beyyonne uullito'i manni at eese asse'llittisa amma'nnitamisinatte bagaan i uunxato hundi ammanem macceessoo'isa an la'oommo» yukko.

⁴³Ee'isa yaa lasage sagara iimaa'aa «Ali'aazara, fire!» yukko.

⁴⁴Ee bikkina oo lehaa hee'u Ali'aazarim ixxek angii lokkii karamukkisam illi kollim keefa'n eddechchinne xaaxamukkisam waammi woriinsi firukkaare Yesuus ixxuwwina «Marona; tillehe» yukko.

⁴⁵Maaraam beyyo waatta'a hee'llo'i dut Ayihuxxi manni Yesuus issu luwwa moo'lla'a ixxonne amma'nnito'o.

⁴⁶Ihukkaarem ixxuwwiinsi mat mat keen Farisaawe'uwwi beyyo matta'a issu luwwa ixxuwwina kutto'o.

⁴⁷Ee bikkina qeessa awwonsaanii Farisaawe'uwwii dummichchi daannuwwa wixxaa'lla'a «Ku manchi lobakat maalalsiisoo mare'e issoolli ihu bikkina ixxo maha issino?

⁴⁸Ka'isa ihona cawwinaa ullummaare manni hundim ixxonne amma'nnoohaare Oroo'm manni waatta'a niikka keesammi beyyoo ni minaadabaa bi'issa'a utteenatte» yito'o.

⁴⁹Ixxuwwiinsi mat hee'u Qayyaaf ee maarage hundiinsi lob qeessichchi hee'ukkok ixxuwwina «Ki'nnuwwi hore'em maham laqqakkambee'i qawwi manna!

⁵⁰Minaadab hundi bi'oohaanniinsi mat manchi minaadabina lehimmi eran ihukkisa laqqakkamoyyonnihe?» yukko.

⁵¹Ixxi ee maarage hundiinsi lob qeessichchi hee'u bikkina Yesuus Ayihuxxi minaadabina lehoo'isa hiraago wocukko bagaan eekka ixxi gagiinsi wocukkoyyo.

⁵²Yesuus lehookkok xale'i Ayihuxxi minaadabinatte ihoo'n binnita'a yo'i Waa'i ooso hundam mat issaa wixxaa'eenatte.

⁵³Ee ammaniinsi ki'issa'a Ayihuxxi gassaan Yesuusa Shiteena a'llanto'o.

⁵⁴Ee bikkina Yesuus ee beyyo uraa udma'i gadanonne yoo Efireema yakkam beero'o maraa ixxi losaaninnem afuurukko bagaan Ayihuxxi manni lambe'enne hasukkisa daba'llamukkoyyo.

⁵⁵Ee ammane Shaashshiqqi Ugud Ayihuxxi minaadabina hincaa hee'ukko. Ee ugudina lobakat manni ixxuwwi gaga muccussaqqiteena beyyi hundiinsim gaassita'a Yerusaaleema waatta'a hee'llo'o.

⁵⁶Ixxuwwim Keesammi Minenne waatta'a wixxito'i ammanenne Yesuusa hassu'uuyyi ixxuwwina'i ixxuwwim «Ki'nnuwwina maha laboolla? Ixxi ka ugudina waarooyyonnihe?» yaqqanto'o.

⁵⁷Qeessa awwonsaanii Farisaawe'uwwii Yesuusa amaddeenaa yita'a Yesuus yoo beyyo la'u manchi hee'ulas kuroo'isina ijaajja'a hee'llo'o.