Read Hadiyya Yohaannis Mishiraachcha 12 Bible Online

Yohaannis Mishiraachcha 12 - Hadiyya bible

Yohaannis Mishiraachcha 12

¹Shaashshiqqi Ugudina loh balli gataakkoohaannonne Yesuus Biitaana yakkam gatte ixxi lehiinsi ki'isu Ali'aazar hee'oo beyyo marukko.

²Ixxuwwi ee beyyonne Yesuusina hurbaata gudisso'aare Maarta'a ixxuwwina hincaa'llo'o. Ixxenne maqire hurbaata ittam hee'llo'i keeniinsi mat Ali'aazaratte hee'ukko.

³ Naardoosa yakkam bito xee'aalli shitto'ika mat xaarmuus kollo ihooqaxa Maaraame eebba'a Yesuus lokkonne labba'a isaanninne horoo'l saraatinne shiinshitam hee'llo'o. Ee minennem shitto'ik enji wo'mmaa qibibukko.

⁴Ihukkaarem Yesuus losaaniinsi mat hee'u Asqorotokkichchi Yihud ixxim Yesuusa higisaa uwwookkok

⁵«Ku shitto'i sas xibbi diinaarina biteesamaa mahina buxina uwwamooyyo?» yukko.[11]

⁶Ixxi eehid yukkok buxina qishixxaatette ihoo'n gamaanchi hee'u bikkinatte. Mashka'oomim diinaxxi karaxiita amadookkok ixxotte ihu bikkina karaxiitanne dissakko'i diinaxxeka ixxi gagina a'llam hee'ukko.

⁷Yesuus ixxuwwina «An waammamoommi ammanina gudissamulli ihu bikkina ise hawwissakkotte; ullehe.

⁸ Bux hundi ammanem ki'nnuwwinne maqire hee'ookko. Ihukkaarem an ki'nnuwwinne maqire hundi ammane hee'oommoyyo» yukko.

⁹Ayihuxxi mannik dut keen Yesuus Biitaan gattenne yoo'isa laqqo'i ammanenne waatto'o. Waatto'okim xale'i Yesuusa moo'lleenatte ihoo'n Yesuus lehiinsi ki'isu Ali'aazaram moo'lleenatte hee'ukko.

¹⁰Ali'aazar mashka'inne ki'ukkok dut Ayihuxxi manni qeessa awwonsaano sabba'a matta'a Yesuusanne amma'nnitam hee'llo'i bikkina qeessa awwonsaan Ali'aazaram shiteena a'llanto'o.

¹¹

¹²La'm balla ugudina waatta'a hee'llo'i dut minaadab Yesuus Yerusaaleema waaroo'isa macceesso'o.

¹³ Ee bikkina dimbaaphphi buyya amadda'a «Waa'ina lombi ihona! Waa'i summinne waaroo Isra'ee'l adil maasse'amaakkoohane!» yita'a shuuttu'uuyyi fitto'o.

¹⁴Keesammi Kitaabanne «Yerusaalee'm beero'o, baddititte! Oono'o! Ki adil hallichchi wotaranne saa'llaa waaroolla» yamamaa kitaabamukkisam Yesuus mat hallichchi wotara siidaa saa'llukko. [12]

¹⁵

¹⁶Ixxek losaan luxxeka eekka qoossito'oyyi hee'llo'o. Ihukkaarem Yesuus lomba siixxaa lasage Keesammi Kitaabanne kitaabamukkok ixxi bikkinatte ihukkisaa eekka ixxena issito'isaa sawwito'o.

¹⁷Yesuus Ali'aazara «Waammi woriinsi fire!» yaa lehiinsi ki'isu ammane ixxenne maqire hee'llo'i manni Yesuus bikkina kutto'o.

¹⁸Manni ixxenne edanteena matto'i mashka'im ixxi ee mare'e issukkisa macceesso'i bikkinatte hee'ukko.

¹⁹Farisaawe'uwwi ixxuwwina'i ixxuwwim «Neese maham issineena xannummoyyo. Moo'llehe; manni hundim ixxo awwonoolla» yaqqanto'o.

²⁰Ee ugudanne Waa'ina otossiteena matto'i keeniinsi mat qax manni Giriik manni hee'llo'o.

²¹Ixxuwwim Galiilanne yoo Beetasaayda yakkam beero'onne hee'oo Filiphphoos beyyo waatta'a «Moollanna, Yesuusa moo'nneena hansoommo» yito'o.

²²Filiphphoos Indiraas beyyo maraa Indiraasina kurukkaare lamim maqirem matta'a Yesuusina ee woshsha kutto'o.

²³Yesuus ixxuwwina dabaraa «Manchi Beet lobakat lomba siixxoo amman afaakko.

²⁴Hanqinam an ki'nnuwwina kuroommo; mat arasichchi uullanne ubaa shamubeelas mexxokkichchim hee'ookko. Ihukkaarem shamulas lobakat misha mishookko.

²⁵ Ixxi foorina qishixxookkok bi'ixxookko. Ihukkaarem ka uullanne ixxi foore sabukkok heer heerina hee'oo heechchina gudixxookko.

²⁶Ayyim iina awwaadookkok eese awwonimmi hasisookko. Iina awwaadookkok an yoommi beyyonne iinninne maqire hee'ookko. Iina awwaadookkoka ayyem Iyyanni lonsookko» yukko.

²⁷Odim Yesuus «Kaba an i woronne lobakata kichche'aammo. An kaba mayyoommo? ‹Iyyanna! At eese kanniinsi gatise› yihonnihe? Eehid yoommoyyo. Mashka'oomim an waarummok ka hawwo aa'eenatte.

²⁸Iyyanna! At ki summa lonse» yukko. Ee ammanenne «An i summa lonsaammo; odim lonsoommo» yoo sagar iimaniinsi waarukko.

²⁹Ee beyyonne uullita'a hee'llo'i manni eekka macceesso'i ammanenne «Kuk banqa» yito'o. Mulli keen odim «Ixxena wocukkok Waa'i asse'amaancho» yito'o.

³⁰Yesuus ixxuwwina dabaraa «Ku sagar waarukkok ki'nnuwwi bikkinatte bagaan i bikkinayyo.

³¹Kaba ka uullanne Waa'i oogatoo amman afaakko. Ka uulli gassaanchim biiranne uunjamoo amman afaakko.

³²Eese uulliinsi iim ki'isakka'a saqalakkam ammane manni hundam i kollonne woroommo» yukko.

³³Ixxi eekka wocukkok hinkido'i leho lehooda'e moo'iseenatte hee'ukko.

³⁴ Minaadab ixxena dabatta'a «Waa'i doo'llaakkoo Kiristoos heer heerinam hee'oo'isa Seeranne kitaabamukkoka macceensaammo. Eehaare at hinkid ‹Manchi Beet iim ki'immi hasisookko› yitoolla? Ku at Manchi Beeto yitoottok ayyette?» yito'o.

³⁵Yesuus ixxuwwina dabaraa «Caakki ki'nnuwwinne maqire hoffi ammaninam yookko. Tuunsi ki'nnuwwa amadoo'n gaassitakka'a caakki hee'ukkuuyyi taakke'llehe; tuunsonne taakke'ookkok hanno marooda'e la'ooyyo.

³⁶Ki'nnuwwi caakki oos ikkakkeena caakki hee'ukkuuyyi caakkanne amma'nnehe» yukko. Yesuus eekka wocaa lasage annanni ihaa maraa ixxuwwiinsi maaxamukko.

³⁷Yesuus ixxuwwi illagenne lobakat mare'e issukkaarem ixxonne amma'nnito'oyyo.

³⁸ Oohim hiraagaanchi Issaayyaas «Moollanna! Neese kullummoka ayyi amma'nnukko; Moollannik malaaydu ayyena moo'amukko?» yukkok wo'mmoo'isinatte.

³⁹Ee bikkina ixxuwwi ixxonne amma'nniteena xanto'oyyo.

⁴⁰ Odim Issaayyaas «Ixxuwwa fayyiisoo'isina ixxi kollonne daba'llitambee'isa Waa'i ixxuwwika ille moo'oobee'isa qooqisaakko. Odim qoossitambee'isam ixxuwwika wodanooma duudisaakko» yaakko.

⁴¹Issaayyaas eehid yaa ixxi bikkina wocukkok ixxeka lomba moo'u bikkinatte.

⁴²Ee'isa ihukkaarem Ayihuxxi manni gassaaniinsim dut keen Yesuusanne amma'nnito'o. Ihukkaarem wixxixxi miniinsi Farisaawe'uwwi yaayyitam bikkina baddita'a ixxi bikkina fissita'a wocco'oyyo.

⁴³Mashka'oomim Waa'iinsi siixxitam lombiinsi manniinsi siixxitam lomba iittito'i bikkinatte.

⁴⁴Yesuus sagara iimaa'aa odim «Eesenne amma'nnukkok eese asse'ukkaannonnem amma'nnaakko bagaan xale'i eesenne amma'nnukkoyyo.

⁴⁵Eese moo'ookkok eese asse'ukkokam moo'ookko.

⁴⁶Eesenne amma'nnookkok ayyim tuunsonne hee'oobee'isina an ka uullina caakki ihaa waaraammo.

⁴⁷Ayyim an yummoka macceesaa issubeelas ixxonne oogatoommok aneyyo. An waarummok ka uulla gatiseenatte bagaan ka uullanne oogateenayyo.

⁴⁸Eese sabaa an yummoka aa'oobee'aannonne oogatookkok yookko. An wocoommi sagar lasaanchonne ixxonne oogatookko.

⁴⁹Mashka'oomim an wocoommok eese asse'u Iyyanni ixxi gagim mayyaa wocoomda'e ijaajukkisa bagaan i malaayyinneyyo.

⁵⁰Ixxek ijaaj heer heerina hee'oo heechcha uwwoohan ihukkisa la'oommi bikkina an wocoommok Iyyanni ‹Woce› yukkane» yukko.