Read Hadiyya Yohaannis Mishiraachcha 13 Bible Online

Yohaannis Mishiraachcha 13 - Hadiyya bible

Yohaannis Mishiraachcha 13

¹Yesuus ka uulliinsi Anni beyyo maroo amman afukkisa la'u ammanenne Shaashshiqqi Ugudiinsi gaassaa ixxeka ka uullanne yo'i iittoo keeno lasaanchi afeebe'em iittookko.

²Yesuusii ixxi losaanii hii'm hurbaata ittam hee'llo'o. Sheexaanchim Simi'oon beet Asqorotokkichchi Yihud Yesuusa higisaa uwwoo'isina ixxonne sawwite aagisukko.

³Yesuus ee ammanenne Waa'i luwwi hundam ixxi anganne uwwukkisa, Waa'i beyyiinsi waarukkisaa Waa'i beyyom maroo'isaa la'u bikkina

⁴hanenne edde'u eddechcha dissaa fooxam lamadonne xaaxaa hurbaata uraa ki'ukko.

⁵Ee lasage angaa'llaanchonne wo'o issaa ixxi losaa'nneka lokko aanshaa lade'u fooxinne shiinshukkuuyyi gokkisimma asheerukko.

⁶Pheexiroosa yakkam Simi'oonikam aansheena waarukkaare «Moollanna! At i lokko aanshiteenannihe?» yukko.

⁷Yesuus ixxena dabaraa «An issoommi luwwa at kaba laqqooyyo. Ihukkaarem lasonne laqqootto» yukko.

⁸Pheexiroosim Yesuusina «At i lokko hore'em aanshitooyyo!» yukko. Yesuus ixxena «An ki lokko aanshumbeelas iinaa kiinaa mateeyyoom bee'e» yukko.

⁹Pheexiroosa yakkam Simi'oonim dabaraa «Moollanna! Eehaara'i iikka xale'i lokki ihoo'n angaa horooree eddaa aanshe» yukko.

¹⁰Yesuus dabaraa «Orachcho aanshaqqukkaannik lokkiinsi bagaan ixxek orachchi muccur ihu bikkina od aanshaqqimmi hasisooyyo. Ki'nnuwwiinsi matiinsi bagaan ki'nnuwwi hundim mucculluwwa» yukko.

¹¹Yesuus ixxo higisaa uwwookkok ayyetda'e ihukkisa la'am hee'u bikkina «Matiinsi bagaan ki'nnuwwi hundim mucculluwwa» yukko.

¹² Yesuus ixxuwwika lokko aanshaa eddechcha edde'aa ixxi beyyonne daba'llaa afuuraa ixxuwwina «An kaba ki'nnuwwina issummi luwwa laqqakka'atennihe?

¹³An losisaanchoo Moollannaa ihummi bikkina ki'nnuwwi eese ‹Losisaanchoo Moollannaa› yitakkamok hanqame.

¹⁴Eehannata'i an losisaanchoo Moollannaa ihaa hee'ummuuyyi ki'nnuwwika lokko aanshummisam ki'nnuwwina'i ki'nnuwwim lokko aanshaqqamimmi hasisookko.

¹⁵An ki'nnuwwina issaa moo'isummisam ki'nnuwwim ee an issummisam issehe.

¹⁶ Hanqinam an ki'nnuwwina kuroommo; awwaadaanchi ixxi moollanniinsi lophphooyyo. Asse'amaanchim ixxo asse'ukkaanniinsi lophphooyyo.

¹⁷Ki'nnuwwi eekka laqqakka'a issitakkolas maassaammuwwa.

¹⁸ An doo'llummi keeno la'oommi bikkina an wocoommok ki'nnuwwi hundi bikkinayyo. Keesammi Kitaabanne ‹Iinninne maqire hurbaata daayyamaa itukkok eesenne ki'ukko› yamamukkok wo'mmoo'isinatte.

¹⁹Oo woshshi ihoo'n gaassaa an ki'nnuwwina kuroommuullak woshshoom ihoo ammane ‹An anette› ihummisa amma'nnitakkamisinatte.

²⁰ Hanqinam an ki'nnuwwina kuroommo; an asse'ummoka ayyem aa'ookkok eesem aa'ookko. Eese aa'ookkok odim eese asse'ukkokam aa'ookko» yukko.

²¹Yesuus eekka wocaa lasage ixxi wodanonne lobakata kichche'aa ixxuwwina «Hanqinam an ki'nnuwwina kuroommo; ki'nnuwwiinsi mat eese higisaa uwwookko» yaa caakkisaa kurukko.

²²Ixxi losaanim ixxuwwik mal bi'aa «Wocookkok ayyenatte» yimminne mat matika ille moo'aqqanto'o.

²³Ixxi losaaniinsi Yesuus iittam hee'ukkok Yesuus gadanonne hee'ukko.

²⁴Pheexiroosa yakkam Simi'oon ixxo qaqqisaa «Wocookkok ayyi bikkinda'e ihukkisa xa'mme» yukko.

²⁵Ee bikkina oo Yesuus gadanonne afuuraa hee'ukkok «Moollanna! Ixxi ayyette?» yaa xa'mmukko.

²⁶Yesuusim dabaraa «An qorosho'o iiqaa cefo'onne qasaa uwwoommi mancho» yaa qorosho'o iiqaa cefo'onne qasaa Asqorotokkichchi Simi'oon beet Yihudina uwwukko.

²⁷Yihud ee qorosho'o aa'aa duuqukkisam Sheexaanchi ixxonne aagukko. Ee lasage Yesuus ixxena «Issitoo luwwa qaqqissaa isse» yukko.

²⁸Eekka Yihudina mahina wocuda'e hurbaata itteena afuutta'a hee'llo'i keeniinsi matim la'ukkoyyo.

²⁹Ihukkaarem mat mat keen diinaxxi karaxiita Yihud amadam hee'u bikkina ugudina mat luwwa maraa bito aa'oo'isina te'im buxina mat luwwa uwwoo'isina wocukkoka labissa'a hee'llo'o.

³⁰Yihudim Yesuus iiqaa uwwu qorosho'o aa'aa lasage ee ammanem firukko. Oo ammanim hiim hee'ukko.

³¹Yihud firaa lasage Yesuus ixxuwwina «Manchi Beet kaba lomba siixxaakko; ixxi mashka'innem Waa'i lophphaakko.

³²Waa'im Manchi Beet kollinne lomba siixxulas Manchi Beetom matemaaggem lonsookko.

³³ I ooso, an hofqax ammanina ki'nnuwwinne maqire hee'oommo. Eesem hassakkamo. Ihukkaarem an Ayihuxxi mannina ‹An maroommi beyyo ki'nnuwwi mattakkeena xantakkamoyyo› yummisam kaba ki'nnuwwina yoommo.

³⁴ An ki'nnuwwina haareechchi ijaajo uwwoommo. An ki'nnuwwa iittummisam ki'nnuwwina'i ki'nnuwwim iittammehe.

³⁵Ki'nnuwwina'i ki'nnuwwi iittantakkolas i losaan ikkakko'isa manni hundim eehanninne la'ookko» yukko.

³⁶Pheexiroosa yakkam Simi'oon Yesuusina «Moollanna! Hanno matteenatte?» yaa xa'mmukko. Yesuus dabaraa «An maroommi beyyo kaba at awwonteena xantooyyo. Ihukkaarem lasonne awwontootto» yukko.

³⁷Pheexiroosim dabaraa «Kaba an keese awwoneena xanoombee'ek mahinatte? An i foorem ki bikkina higisaa uwwoommo» yukko.

³⁸Yesuusim ixxena dabaraa «Ki foore i bikkina higissaa uwwitoohonnihe? Hanqinam an kiina kuroommo; sas kore eese lageebe'e antabaa'i muunooyyo» yukko.