Read Hadiyya Yohaannis Mishiraachcha 14 Bible Online

Yohaannis Mishiraachcha 14 - Hadiyya bible

Yohaannis Mishiraachcha 14

¹Odim Yesuus «Ki'nnuwwik wodan baa'oone. Waa'anne amma'nnehe; odim eesennem amma'nnehe.

²Iyyanni minenne lobakat beyyi yookko. An maraa ki'nnuwwina beyyo gudisoommo. Iyyanni minenne lobakat beyyi bee'an yakkota'n an ki'nnuwwina ‹Beyyo gudiseena maroommo› yam hee'ummonnihe?

³An maraa ki'nnuwwina beyyo gudisaa lasage daba'llaa waaraa iinninne maqire hee'llakkamisina ki'nnuwwam i beyyo massoommo.

⁴An maroommi beyyo massoo googom laqqakkamo» yukko.

⁵Toomaasim Yesuusina «Moollanna! At mattoo beyyi handa'e ihukkisa lanqoombee'i bikkina googo hinkid lanqeena xannoommo?» yukko.

⁶Yesuusim Toomaasina «An googo, hanqaa heechchaa. I kollinnette ihubeelas ayyim Iyyanni beyyo waareena xanooyyo.

⁷Eese laqqakko'oota'n Iyyannam laqqakkam hee'llakko'o. Kabadiinsi ki'issakka'a ixxo laqqakkamo. Ixxom moo'llakko'ookko» yukko.

⁸Filiphphoosim Yesuusina «Moollanna! Niina Waa'a moo'ise. Ixxo moo'issittaa'lleensi niina ihookko» yukko.

⁹Yesuusim Filiphphoosina dabaraa «An lobakat ammaniinsi ki'isaa ki'nnuwwinne hee'ummuuyyi eese laqqooyyonnihe? Eese moo'ukkok Waa'am moo'aakko. At eese hinkid ‹Waa'a moo'ise› yitoolla?

¹⁰Filiphphoosa, an Waa'inne yoommisa Waa'im iinninne yoo'isa amma'nnitooyyonnihe? Iinninne yoo Waa'i ixxeka baxo baxoolla bagaan an wocoommi luwwi i gagiinseyyo.

¹¹An Waa'inne yoommisa Waa'im iinninne yoo'isa kuroommoka amma'nnehe. Eebeelas an baxoommi bax bikkina amma'nnehe.

¹²Hanqinam an ki'nnuwwina kuroommo; eesenne amma'nnookkok an baxoommi baxo baxookko. An Waa'i beyyo maroommi bikkina an baxoommi baxiinsim lophphoo baxo baxookko.

¹³Ayyi luchchom i summinne xa'mmitakkolas Waa'i i kollinne lomba siixxoo'isina an issoommo.

¹⁴Ayyi luchchom i summinne xa'mmitakkolas an issoommo» yukko.

¹⁵Odim Yesuus «Eese iittitakkolas i ijaajo egettakkamo.

¹⁶An Waa'a uunxoommaare ki'nnuwwinne maqire doolli hundinam hee'oo'isina mulli Qoxxisaancho Waa'i asse'ookko.

¹⁷Oohim ka uulli manni moo'oobee'anee la'oobee'anee ihu bikkina aa'eena xanoobee'i hanqo'i Keesammi Ayyaana. Ihukkaarem oo Keesammi Ayyaan ki'nnuwwi woronne hee'oo bikkina laqqakkamo.

¹⁸An ki'nnuwwi beyyo daba'llaa waaroommo bagaan adaraa'llisa ki'nnuwwa uraa uroommoyyo.

¹⁹Hofqax ammaniinsi lasage ka uulli manni eese moo'ooyyo. Ihukkaarem ki'nnuwwi eese moo'llakkamo. Mashka'oomim an hee'oommane; ki'nnuwwim hee'llakkamo.

²⁰An Iyyanninne yoommisa ki'nnuwwim iinninne yoontakke'isa anim ki'nnuwwinne yoommisa ee ammane laqqakkamo.

²¹Eese iittookkok i ijaajo aa'aa egeroohane. Eese iittookkoka Iyyannim iittookko. Anim ixxo iittaa i gaga ixxena la'isoommo» yukko.

²²Yihud Yesuusina «Moollanna! At ki gaga ka uulli manninatte ihoo'n niina hinkid issitaate la'issoottok?» yukko. Ku Yihud Asqorotokkichchi Yihudatteyyo.

²³Yesuus ixxena dabaraa «Ayyi manchim eese iittulas an yummi luwwa egerookko. Iyyannim ixxo iittookko. Iyyannii anii ixxi beyyom waallaa ixxenne maqire hee'nnoommo.

²⁴Eese iittoobee'ek an yummi luwwam egerooyyo. An wocoommi woshshi eese asse'u Iyyanni woshsha bagaan iihaneyyo.

²⁵An ka woshsha ki'nnuwwinne maqire hee'ummuuyyim kaba kuraammo.

²⁶Ihukkaarem Iyyanni i summinne asse'oo Qoxxisaanchi Keesammi Ayyaan ki'nnuwwina luwwi hundam losisookko. An ki'nnuwwina kuroommi luwwi hundam tiissiisookko.

²⁷An ki'nnuwwina xumma uwwoommo. Oo uwwoommi xummim i xumma. An uwwoommi xummi ka uulli manni uwwoo xummi'nnoo'aneyyo. Ki'nnuwwik wodan baa'aa baddoone.

²⁸An ‹Uraa maraa daba'llaa ki'nnuwwi beyyo waaroommo› yummoka macceessakko'ookko. Eese iittitakkota'n an Waa'i beyyo maroommi bikkina liirantakkam hee'llakko'o. Mashka'oomim Waa'i iinniinsi lobane.

²⁹Ku woshshi ihoo ammane amma'nnitakkamisina an gaassaatim ki'nnuwwina kuraammo.

³⁰Ka uullik gassaanchi waaroolli ihu bikkina ka lasage an ki'nnuwwinne lobakata atooraroommoyyo. Ihukkaarem eese kaa'oo malaayyi ixxena bee'e.

³¹An Waa'a iittoommisa ka uulli manni la'oo'isina Waa'i eese ‹Isse› yaa ijaajukkisa issoommo» yaa «Ki'llehe; ka beyyiinsi mallona» yukko.