Read Hadiyya Yohaannis Mishiraachcha 15 Bible Online

Yohaannis Mishiraachcha 15 - Hadiyya bible

Yohaannis Mishiraachcha 15

¹Odim Yesuus «An hanqinam woyina yakkam xuda laboo haqqichchisa; kaasukkokim Iyyanna.

²Eesenne yoo caaffuwwiinsi misha mishoobee'eka hundam Iyyanni muraa hoorookko. Ihukkaarem misha mishoo caafa hundam edaa mishoo'isina ballachchaa axisookko.

³An ki'nnuwwina wocummi sagar ki'nnuwwa muccussaakko.

⁴Ki'nnuwwi iinninne mat ikkehe; anim ki'nnuwwinne mat ihoommo. Caaf aminne mat ihubeelas ixxi gaginne misha misheena xanoobee'isam ki'nnuwwim iinninne mat ikkakkobeelas misha mishshakkeena xantakkamoyyo.

⁵«An woyi'n xudina ama. Ki'nnuwwim caaffuwwa. Iinninne mat ihookkok anim ixxenne mat ihoommok ixxi lobakat misha mishookko. Iinniinsi annanni ikkakka'a maham issitakkeena xantakkamoyyo.

⁶Ayyi manchim iinninne mat ihubeelas amiinsi annanni ihu caafisa uunjamaa gogookko. Gogaa lasage wixxaa'akka'a giiranne edakkamaare shokkookko.

⁷Ki'nnuwwi iinninne mat ikkakkolas i sagarim ki'nnuwwinne mat ihulas hassakko'i luwwi hundam xa'mmehe; siixxitakkamo.

⁸Ki'nnuwwi lobakat misha mishshakkam ammane Iyyanni lomba siixxookko. I losaan ikkakko'isam eehanninne la'issakkamo.

⁹Iyyanni eese iittukkisam anim ki'nnuwwa iittaammo. Ki'nnuwwi i iittonne hee'llehe.

¹⁰An Iyyannika ijaajo egeraa ixxi iittonne hee'oommisam ki'nnuwwim i ijaajo egettakkolas i iittonne hee'llakkamo.

¹¹«An ka woshsha ki'nnuwwina wocummok i liiranchi ki'nnuwwanne ihoo'isinatte; ki'nnuwwannem liiranchi wo'mmoo'isinatte.

¹² I ijaaj kane; An ki'nnuwwa iittummisam ki'nnuwwina'i ki'nnuwwim iittammehe.

¹³Mat manchi ixxi beshina ixxi foore higisaa uwwimmiinsi lophphoo iitti bee'e.

¹⁴An ki'nnuwwa ijaajummi luwwa issitakkolas ki'nnuwwi iina beshshuwwa.

¹⁵An ki'nnuwwa ka lasage ‹awwaadaano› yoommoyyo. Mashka'oomim moollanni issoo luwwa awwaadaanchi la'ooyyo. Ihukkaarem an Iyyanniinsi macceesummi luwwi hundam ki'nnuwwina la'isummi bikkina ki'nnuwwa ‹i beshshuwwa› yaammo.

¹⁶An ki'nnuwwa doo'llummo bagaan ki'nnuwwi eese doo'llitakko'oyyo. Doo'llummokim i summinne xa'mmitakko'i luwwi hundam Iyyanni uwwoo'isina ki'nnuwwi mattakka'a hee'oo misha mishshakkamisinatte.

¹⁷Ki'nnuwwina'i ki'nnuwwim iittantakkamisina kaba an ki'nnuwwa ijaajaammo.

¹⁸«Ka uulli manni ki'nnuwwa sabulas ki'nnuwwiinsi illageenim eese sabukkisa laqqehe.

¹⁹Ki'nnuwwi ka uulli manni ikkakkota'n ka uulli manni ixxi keeno iittoo'isam ki'nnuwwam iittam hee'ukko. Ihukkaarem an ki'nnuwwa ka uulliinsi doo'llaammo. Ka uulli manni ki'nnuwwa saboo mashka'im ki'nnuwwi ka uulli manni ikkakkobee'i bikkinatte.

²⁰ An ki'nnuwwina ‹Awwaadaanchi ixxi moollanniinsi lophphooyyo› yummoka sawwi'llehe. Eese hawwissolas ki'nnuwwam hawwissamo. I woshsha macceessolas ki'nnuwwi woshsham macceessamo.

²¹Ihukkaarem ixxuwwi eese asse'ukkoka laqqambee'i bikkina i mashka'inne ki'nnuwwam hawwissamo.

²²An waaraa ixxuwwina kuroo'n yoomta'n ixxuwwina baaxiil iham hee'ukkoyyo. Ihukkaarem kaba ixxuwwi baaxii'l bikkina dabaabuttam luwwi bee'e.

²³Eese sabookkok Iyyannam sabaakkoohane.

²⁴Ayyim issubee'i luwwa ixxuwwi lambe'enne issoo'n yoomta'n ixxuwwina baaxiil iham hee'ukkoyyo. Ihukkaarem kaba ixxuwwi an baxoommi baxo moo'lla'atim eesee Iyyannaa sabbo'ookko.

²⁵ Sabbo'okim ‹Mashka'i bee'em eese sabbo'o› yamamaa ixxuwwi Seeranne kitaabamu sagar wo'mmoo'isinatte.

²⁶«An Iyyanni beyyiinsi ki'nnuwwina asse'oommi Qoxxisaanchi ixxim Iyyanni beyyiinsi firaa waaroo hanqo'i Keesammi Ayyaan waaroo ammane i bikkina kurookko.

²⁷Ki'nnuwwim luxxaanniinsi ki'issakka'a iinninne maqire hee'llakko'i bikkina i bikkina kuttakkamo.