Read Hadiyya Yohaannis Mishiraachcha 16 Bible Online

Yohaannis Mishiraachcha 16 - Hadiyya bible

Yohaannis Mishiraachcha 16

¹Odim Yesuus «Amma'nnatiinsi ubbakkambee'isina an ka hundam ki'nnuwwina kuraammo.

²Wixxixxi minneewwiinsim ki'nnuwwa yaayyakkamo. Ki'nnuwwa shitam keen ixxuwwi gaga Waa'ina awwaaddam kee'nnisa issitam amman waarookko.

³Ixxuwwi eekka issitamok eesee Iyyannaa laqqambee'i bikkinatte.

⁴Ihukkaarem ku woshshi ki'nnuwwanne afoo ammane an kurummisa tiittakkamisina ka woshsha ki'nnuwwina kuraammo. «An ki'nnuwwinne maqire hee'ummi bikkina kanniinsi illageen ka woshsha ki'nnuwwina kurummoyyo.

⁵Ihukkaarem an kaba eese asse'ukkaanni beyyo maroommuulla. Ki'nnuwwiinsi matim eese ‹At hanno matteenatte?› yaa xa'mmookkok bee'e.

⁶An kaba ka woshsha ki'nnuwwina kurummi bikkina lobakata kichche'llakko'ookko.

⁷Ihona bagaan an marimmi ki'nnuwwina eran ihukkisa hanqinam kuroommo. Mashka'oomim an marumbeelas Qoxxisaanchi ki'nnuwwina waarooyyo. Ihukkaarem an marumlas ki'nnuwwina ixxo asse'oommo.

⁸Ixxi waaroo ammane baaxii'l bikkina, xabbeenoo'm bikkinaa oogaxxi bikkinaa manni la'oo'isa issookko.

⁹Baaxii'l bikkina manni la'oo'isa issookkok ixxuwwi eesenne amma'nnimma hoogimmi baaxiil ihu bikkinatte.

¹⁰Xabbeenoo'm bikkina manni la'oo'isa issookkok an Iyyanni beyyo maroommi bikkina od eese moo'llakkambee'i bikkinatte.

¹¹Oogaxxi bikkina manni la'oo'isa issookkok ka uulli gassaanchonne[13] Waa'i oogatu bikkinatte.

¹²«Kaba ki'nnuwwi aa'llakkeena xantakkamoyyo bagaan an ki'nnuwwina kuroommi lobakat luwwi yookko.

¹³Ihukkaarem hanqo'i Keesammi Ayyaan waaroo ammane hanqi kollonne ki'nnuwwa awwonsookko. Ixxi macceesukkoka wocookko bagaan ixxi gagiinsi wocooyyo. Hanenne waaroo woshsham ki'nnuwwina baa'yyaatookko.

¹⁴Ixxi iinniinsi macceesu woshsha massaa ki'nnuwwina kuroo bikkina eese lonsookko.

¹⁵‹Iinniinsi macceesu woshsha massaa ki'nnuwwina kurookko› yummok Iyyannina yoo luwwi hundim iihan ihu bikkinatte.

¹⁶«Hofqax ammaniinsi lasage ki'nnuwwi eese moo'llakkamoyyo. Ee lasage odim hofqax ammanina moo'llakkamo» yukko.

¹⁷Ixxi losaa'nnek mat mat keen ixxuwwina'i ixxuwwim «Ku ixxi niina ‹An Iyyanni beyyo maroommi bikkina hofqax ammaniinsi lasage eese moo'llakkamoyyo. Odim hofqax ammanina moo'llakkamo› yukkok maruchcho?

¹⁸Hofqax ammane yookkok mayyeena hassaatette? Ixxi wocoo woshshi mayyimda'e niina aagukkoyyo» yaqqanto'o.

¹⁹Ixxuwwi ixxo xa'mmiteena hasso'isa la'u bikkina Yesuus «Ki'nnuwwina'i ki'nnuwwim xa'mmantakkamok ‹Hofqax ammaniinsi lasage eese moo'llakkamoyyo. Odim hofqax ammanina eese moo'llakkamo› yummok mayyeenatda'e ihukkisannihe?

²⁰Hanqinam an ki'nnuwwina kuroommo; ki'nnuwwi sottakku'uuyyi wi'llitakkamo. Ihukkaarem ka uulli manni liiramookko. Ki'nnuwwi kichche'llakkamo. Ihukkaarem ki'nnuwwik kichchechchi liiranchanne daba'llookko.

²¹Mat meentichcho qattam amman afoohaare xuuchchi amman afu bikkina kichche'llamo. Ihukkaarem qatta'a lasage ciilichcho qatto'i bikkina liiranta'a ee hawwo xaddamo.

²²Ee'isam ki'nnuwwim kaba kichche'llakko'ookko. Ihukkaarem an daba'llaa ki'nnuwwa moo'oommaare liirantakkamo. Ee liirancham ki'nnuwwiinsi hoorookkok matim bee'e.

²³Ee ammane ki'nnuwwi eese maham xa'mmitakkamoyyo. Hanqinam an ki'nnuwwina kuroommo; i summinne ihu luwwam iyyanna xa'mmitakkolas ki'nnuwwina uwwookko.

²⁴Kaballi afeebe'e i summinne maham xa'mmitakko'oyyo. Kaba xa'mmehe; ki'nnuwwik liiranchi wo'mmoo'isina xa'mmitakko'i luwwa siixxitakkamo.

²⁵«Ka woshsha an ki'nnuwwina kobi'llishshinne kuraammo. Ihukkaarem ki'nnuwwina kobi'llishshinnette ihoo'n Iyyanni bikkina caakkisaa wocoommi amman waarookko.

²⁶Ee ammane i summinne Iyyanna xa'mmitakkamo. ‹An ki'nnuwwi bikkina Iyyanna uunxoommo› yoommoyyo.

²⁷Mashka'oomim ki'nnuwwi eese iittitakka'a Iyyanni beyyiinsi waarummisa amma'nnitakko'i bikkina Iyyanni ixxi gagim ki'nnuwwa iittookko.

²⁸An Iyyanni beyyiinsi ka uulla waaraammo. Kaba odim ka uulla uraa Iyyanni beyyo mareenatte» yukko.

²⁹Ixxi losaanim «Oono'o! Kaba kobi'llishshinnette ihoo'n caakkissaa woccoolla.

³⁰At hundi luwwam laqqoo'isaa keese ayyim xa'mmona hassoobee'isaa kaba lanqaammo. At Waa'i beyyiinsi waattittisa eehanninne amma'nninoommo» yito'o.

³¹Yesuusim ixxuwwina dabaraa «Kabadu amma'nnitakkamuullannihe?

³²Ki'nnuwwi hundim eese mullam uttakka'a annannichchi minem binnitakkam amman waaroolla. Ammanoomim kaba afaakko. Ihukkaarem Iyyanni iinninne maqire yoo bikkina an mullatteyyo.

³³Ki'nnuwwi iinninne mat ihimminne xumma siixxitakkamisina an ki'nnuwwina kaka kuraammo. Ka uullanne hee'llakku'uuyyi ki'nnuwwina hawwi yookko. Ihukkaarem an ka uulla kaa'ummi bikkina lobakata liirammehe» yukko.