Read Hadiyya Yohaannis Mishiraachcha 17 Bible Online

Yohaannis Mishiraachcha 17 - Hadiyya bible

Yohaannis Mishiraachcha 17

¹Yesuus ee woshsha wocaa ki'aa iimane moo'ukkuuyyi «Iyyanna! Kaba amman afaakko. Ki Beet keese lonsoo'isina atim ki Beeto lonse.

²Mashka'oomim at ixxena uwwitti keenina hundinam heer heerina hee'oo heechcha uwwoo'isina manni hundannem at ixxena malaayye uwwitaatto.

³Oo heer heerina hee'oo heechchim at xale'i hanqo'i Waa'i ikkittisa la'immaa at asse'llitti Yesuus Kiristoosa la'imma.

⁴An baxoommisina at uwwitti baxo baxaa guullaa keese ka uullanne lonsaammo.

⁵Iyyanna! Uulli qooccamoo'n illageen kiinninne maqire iina hee'u lombinne kaba eese ki beyyonne lonse.

⁶«At ka uulliinsi fissitaa iina uwwitti mannina ki summa la'isaammo. Ixxuwwi ki keen hee'llo'o. At ixxuwwa iina uwwitto. Ixxuwwim ki sagara egetto'o.

⁷At iina uwwitti luwwi hundim kiinniinsette ihukkisa kaba ixxuwwi laqqo'ookko.

⁸At iina uwwitti sagara anim ixxuwwina uwwummaare aa'lla'a an ki beyyiinsi waarummisa hanqinam laqqo'ookko. At eese asse'llittisam amma'nnito'ookko.

⁹An ixxuwwi bikkina keese uunxoommuulla. An keese uunxoommuullak ixxuwwi kiihan ikko'i bikkina at iina uwwitti keeninatte bagaan mulli manni bikkina keese uunxoommoyyo.

¹⁰I keen hundim kiihane; ki keenim iihane. Anim ixxuwwanne lomba siixxaammo.

¹¹Kaba an ki beyyo waaroommuulla. Ka lasage ixxuwwi ka uullanne hee'llamo bagaan an ka uullanne hee'oommoyyo. Keesantaattoo Iyyanna! Anii atii mat inkummisam ixxuwwim mat ikkamisina at iina uwwitti keeno ki summinne egere.

¹² An ixxuwwinne maqire hee'ummuuyyi at iina uwwitti ki summinne ixxuwwa egeraammo[14]. Keesammi Kitaabanne kitaabamukkok wo'mmoo'isina bichchi beetiinsi bagaan ixxuwwiinsi matim bi'ukkoyyo.

¹³Ihukkaarem kaba an ki beyyo waaroommuulla. I liiranchi ixxuwwanne wo'mmoo'isina an ka uullanne hee'ummuuyyi ka woshsha wocaammo.

¹⁴An ixxuwwina ki sagara uwwaammo. An ka uullan ihumbee'isam ixxuwwim ka uullan ikkobee'i bikkina ka uulli manni ixxuwwa sabukko.

¹⁵An keese uunxoommok ixxuwwa joriinsi[15] egettonatte bagaan ka uulliinsi fissitoo'isinayyo.

¹⁶An ka uullan ihumbee'isam ixxuwwim ka uulli keenoyyo.

¹⁷Hanqinam ixxuwwa ki gagina annanni isse. Ki sagarim hanqa.

¹⁸At eese ka uulla asse'llittisam anim ixxuwwa ka uulla asse'aammo.

¹⁹Ixxuwwim hanqina ixxuwwi gaga annanni issita'a kiina hincaa'llamisina an i gaga kiina annanni issaa hincaa'aammo.

²⁰An keese uunxoommok xale'i ka keeninatte ihoo'n ku keen kuttam woshsha macceessa'a eesenne amma'nnitam keen hundim mat ikkamisinatte. Iyyanna! At eese asse'llittisa manni amma'nnoo'isina at iinninne mat ikkittisa anim kiinninne mat ihummisa ixxuwwim niinninne mat ikkamisina an keese uunxoommuulla.

²²Atii anii mat inkummisa ixxuwwim mat ikkamisina at iina uwwitti lomba anim ixxuwwina uwwaammo.

²³Oo uunxoommokim at eese asse'llittisaa eese iittittisam ixxuwwam iittittisaa ka uulli manni la'oo'isina ixxuwwi guullita'a mat ikkamisina an ixxuwwinne ixxuwwim iinninne mat inkoommisinatte.

²⁴Iyyanna! Oo at iina uwwitti keen uulli qooccamoo'n illageenim at eese iittitaa iina uwwitti lomba moo'lleena an yoommi beyyonne ixxuwwim ikkamisina hasoommo.

²⁵Hanqo'i muccur Iyyanna! Ka uulli manni keese la'ukkoyyo. Ihukkaarem an keese la'ummo. Ku keenim at eese asse'llittisa laqqo'ookko.

²⁶Anim ixxuwwina ki summa la'isaammo. At eese iittitti iitti ixxuwwi woronne ihoo'isinaa anim ixxuwwinne mat ihoommisinaa ki summa odim la'isoommo» yukko.