Read Hadiyya Yohaannis Mishiraachcha 18 Bible Online

Yohaannis Mishiraachcha 18 - Hadiyya bible

Yohaannis Mishiraachcha 18

¹Yesuus eehid yaa Waa'a uunxaa lasage ixxi losaaninnem Qeediroona yakkam dirifina eeqidonne kaasakko'oo haqqi woro maraa aagukko.

²Yesuus ixxi losaaninne maqire ee beyyonne dut ammane edamam hee'u bikkina Yesuusa higisaa uwwoo Yihud ee beyyo la'am hee'ukko.

³Ee bikkina Yihud gaadaa'nnekaa qeessa awwonsaaniinsii Farisaawe'uwwiinsii asse'anto'oo Keesammi Mine egeraa'nnekaa matqaxa awwonsaa waarukko. Ixxuwwim faanoossuwwa, sha'uwwaa bagadduwwaa amadda'a hee'llo'o.

⁴Yesuus ixxonne afoo luwwi hundam la'aa hee'u bikkina ixxuwwi illagenne firaa «Ayye hassakkamuulla?» yukko.

⁵Ixxuwwim dabatta'a «Naazireexxi Yesuusa hansoommuulla» yito'o. Yesuusim ixxuwwina «Naazireexxi Yesuus anette» yukko. Yesuusa higisaa uwwu Yihudim ixxuwwinne maqirem uullaa hee'ukko.

⁶Yesuus ixxuwwina «Naazireexxi Yesuus anette» yu ammanenne afa'llaachcha matta'a uullanne ubbo'o.

⁷Odim Yesuus «Ayye hassakkamuulla?» yukko. Ixxuwwim «Naazireexxi Yesuusatte» yito'o.

⁸Yesuusim dabaraa «Naazireexxi Yesuus anette ihummisa ki'nnuwwina kuraammo. Hassakkamok eesette ihulas ku keen mattona» yukko.

⁹Eehid yukkokim «Iina uwwitti kee'nneka matom uunjummoyyo» yaa wocu woshshi wo'mmoo'isinatte.

¹⁰Ee ammane Pheexiroosa yakkam Simi'oonina bisa'i hee'u bikkina seejjiinsi fissaa hundiinsi lob qeessichchina awwaadaanchika makki kolli macce aphphisaa murukko. Ee awwaadaanchikim summi Malkoosa yakkaman hee'ukko.

¹¹ Yesuusim Pheexiroosina «Ki bisa'a seejjanne aagise. Iyyanni iina uwwu hawwo an aa'immi hasisooyyonnihe?» yukko.

¹²Ee lasage gaadaan, gaadaa'n awwonsaanchi Ayihuxxi waardiyyii Yesuusa amadda'a katto'o.

¹³Katta'a ki'lla'a Haanna'a yakkam manchi beyyo gaassita'a massito'o. Haanna'a ee maarage hundiinsi lob qeessichchi hee'u Qayyaafina ballo hee'ukko.

¹⁴ Oo Qayyaaf «Minaadaphphi bikkina mat manchi lehuta'n erane» yaa Ayihuxxi manni gassaano sogukkane.

¹⁵Pheexiroosa yakkam Simi'oonii Yesuus losaa'nnek matii Yesuusa awwonto'o. Oo mulli losaanchi lob qeessichchinne la'amam hee'u bikkina Pheexiroos biiranne uullonam Yesuusinne maqirem ee hundiinsi lob qeessichchika qash woro aagukko. Oo lob qeessichchinne la'amoo losaanchi gooca egetto'i awwaadaanchona kuraa Pheexiroosam qash woro aagisukko.

¹⁷Oo gooca egetto'i awwaadaancho Pheexiroosina «At ee manchi losaaniinsi matoyyonnihe?» yito'o. Pheexiroosim dabaraa «An ixxi losaanchoyyo» yukko.

¹⁸Ee ammane uulli qiidam hee'u bikkina hundiinsi lob qeessichchina awwaadaanii Keesammi Mine egeraanii giira giitta'a uullita'a iibbixxitam hee'llo'o. Pheexiroosim ixxuwwinne maqirem uullaa iibbixxam hee'ukko.

¹⁹Ee lasage losaa'n bikkinaa losisu losishshi bikkinaa hundiinsi lob qeessichchi Yesuusa xa'mmukko.

²⁰Yesuusim dabaraa «An maaxaa wocummoyyo. Ayihuxxi minaadab wixxitam minneewwannee Keesammi Minennee hundi ammanem losisummo bagaan maham maaxaqqanne wocummoyyo.

²¹Iinniinsi macceesso'i keen an yummi luwwa laqqam bikkina mayyumda'e kuttona ixxuwwa xa'mme bagaan eese mahina xa'mmitoolla?» yukko.

²²Eekke'enne uullaa hee'u mat gaadaanchi Yesuus eehid yukkaare «Lob qeessichchina kuttoottok ee'isannihe?» yaa oobo'inne Yesuusa aphphisukko.

²³Yesuusim dabaraa «An jora wocaammoolas wocummi jora kure. Hanqa wocaammoolas eese mahina aphphissoolla?» yukko.

²⁴Ee lasage Haanna'a Yesuusa karukkisam hundiinsi lob qeessichchi hee'u Qayyaaf beyyo asse'ukko.

²⁵Ee ammane Pheexiroosa yakkam Simi'oon uullaa giira iibbixxam hee'ukko. Manni odim Pheexiroosina «Atim ixxi losaaniinsi matoyyonnihe?» yita'a xa'mmito'aare Pheexiroosim «An ixxi losaanchoyyo» yaa lagukko.

²⁶Ee hundiinsi lob qeessichchina awwaadaa'nnek mat Pheexiroosina «Kaasakko'i haqqi woronne ixxenne maqirem an keese moo'ummoyyonnihe?» yukko. Ixxim macce Pheexiroos muru manchina qarmanchi hee'ukko.

²⁷Yesuusinne maqire hee'ukkisa Pheexiroos odim lagukko. Ee ammanchom antabaa'i muunukko.

²⁸Ee lasage soodaraar daram Qayyaaf miniinsi gassaanchi qash woro Yesuusa massakko'o. Ayihuxxi minaadab Shaashshiqqi Uguxxi hurbaata ittam bikkina haashaarantambee'isina gassaanchi qash woro aaggo'oyyo.

²⁹Ee bikkina Philaaxoos firaa «Ka mancho kasassakko'ok mahinatte?» yukko.

³⁰Ixxuwwim «Ku manchi jora issoo'n yoohan yakkota'n kiina higinsaa uwwinam hee'nnummoyyo» yito'o.

³¹Philaaxoosim ixxuwwina «Massitakka'a ki'nnuwwi See'llisanne ixxonne oogattehe» yukko. Ayihuxxi mannim ixxena «Neese ayyem shinona seer uwwooyyo» yito'o.

³² Oohim ihukkok Yesuus hinkido'i leho lehooda'e wocu woshshi wo'mmoo'isinatte.

³³Philaaxoosim qash woro daba'llaa aagaa Yesuusa weeshaa «At Ayihuxxi manni adilannihe?» yukko.

³⁴Yesuusim ixxena dabaraa «At kid yittok ki sawwitiinsettennii mulli manni i bikkina kurukkaarette?» yukko.

³⁵Philaaxoosim dabaraa «An Ayihudichchonnihe? Keese iina higissa'a uwwito'ok ki shumo'oo ki shumo'i qeessa awwonsaano. At issitti luwwi maruwwa?» yukko.

³⁶Yesuusim ixxena dabaraa «Iikki adillan ka uullanneyyo. Iikki adillan ka uullannette yakkota'n an Ayihuxxi anganne aagoombee'isa i awwaadaan i bikkina qasantam hee'llo'o. Ihukkaarem i adillan ka uullanneyyo» yukko.

³⁷Philaaxoosim ixxena «Eehaare at adilannihe?» yukkaare Yesuus dabaraa «At yittisam an adila. An qaramummokii ka uulla waarummokii hanqi bikkina kureenatte. Hanqi manchi ayyim i woshsha macceesookko» yukko.

³⁸Philaaxoosim ixxena «Hanqi maruwwa?» yukko. Eehid yaa lasage Philaaxoos odim Ayihuxxi manni beyyo firaa «An ka manchonne matem bi'ishsham siidummoyyo.

³⁹Karanto'i mannika mat mancho kido'i ugudanne fatakoommisina ki'nnuwwina losan yoo bikkina ka Ayihuxxi adila fatakihona hassakkamonnihe?» yukko.

⁴⁰Ixxuwwim «Ka manchoyyo! Niina Barbaana fatakihe» yita'a shuutto'o. Barbaan fangichchi hee'ukko.