Read Hadiyya Yohaannis Mishiraachcha 19 Bible Online

Yohaannis Mishiraachcha 19 - Hadiyya bible

Yohaannis Mishiraachcha 19

¹Ee lasage Philaaxoos Yesuusa massaa gansiisukko.

²Gaadaanim uttiinsi adilla'n mare'e baxxa'a ixxi horoorenne issita'a adilluwwisam kashar eddechcha eddeessa'a

³«Ayihuxxi manni adila, kiina hechcho!» yitu'uuyyi ixxi beyyo waatta'a oobo'inne aphphisso'o.

⁴Odim Philaaxoos ixxuwwi beyyo firaa «Oono'llehe! An ixxonne bi'ishsha siidumbee'isa laqqakkamisina ki'nnuwwi beyyo fissaa woroommuulla» yukko.

⁵Yesuusim uttiinsi baxamaakkoo adilla'n mare'e horoorenne issakko'isamii kashar eddechcham eddeesakko'isamii firukko. Philaaxoosim «Manchoom oono'llehe!» yukko.

⁶Qeessa awwonsaanii Keesammi Mine egeraanii Yesuusa moo'llo'i ammanenne «Ixxo saqale! Saqale!» yitu'uuyyi shuutto'o. Philaaxoosim ixxuwwina «An ixxonne bi'ishsha siidumbee'i bikkina ki'nnuwwim massitakka'a saqallehe» yukko.

⁷Ayihuxxi minaadabim dabatta'a «Niina Seer yookko; ixxi gaga Waa'ina Beet issu bikkina ee ni see'llisanne ixxi lehimmi hasisookko» yito'o.

⁸Philaaxoos ee woshsha macceesu ammanenne lobakata baddukko.

⁹Philaaxoos odim qash woro aagaa Yesuusina «At waattittok hanniinsette?» yukko. Ihukkaarem Yesuus maham dabarukkoyyo.

¹⁰Ee bikkina Philaaxoos ixxena «Woccooyyonnihe? Keese fatakeenaa saqaleenaa iina malaayyi yoo'isa laqqooyyonnihe?» yukko.

¹¹Yesuusim dabaraa «Iimaniinsi uwwamubeeta'n eesenne kiina malaayyi hee'am hee'ukkoyyo. Ee bikkina eese kiina higisaa uwwukkaannik baaxiil lobane» yukko.

¹²Philaaxoos ee woshsha macceesu ammanenne Yesuusa fatakeena hasukko. Ihukkaarem Ayihuxxi manni «Ka mancho fatakitlas at Oroo'm uulli adilina beshichchoyyo. Ixxi horoore adil issaqqookkok ayyim adilanne ki'oohane» yita'a shuutto'o.

¹³Philaaxoos ee woshsha macceesu ammanenne Yesuusa fissaa kina dahakka'a baxakko'oohaannonne oogatakkeena afuurakkam beyyonne afuurukko. Eehido'i beyyik summi Ibro'isinne Gabata yamamookko.

¹⁴Ee beyyonne afuuraa Ayihuxxi minaadabina «Ki'nnuwwik adil oono'llehe!» yukko. Oo ballim Usheexxaxxi Ayyaamina gudakkam balli hee'ukko. Oo ammanim balli loh sa'aata ihooqax amman hee'ukko.

¹⁵Ayihuxxi minaadabim «Ixxo bi'ise! Ixxo bi'ise! Ixxo saqale!» yita'a shuutto'o. Philaaxoosim ixxuwwina «Ki'nnuwwika adila saqalonnihe?» yukko. Qeessa awwonsaanim dabatta'a «Niina Oroo'm adiliinsi bagaan mulli adil bee'e» yito'o.

¹⁶Ee ammanenne Philaaxoosim Yesuus saqalamoo'isina ixxuwwi anganne higisaa uwwukkaare ixxuwwim Yesuusa aa'llo'o.

¹⁷Yesuus ixxom saqalakkam masqala iyyaa Horoo'l Qooma yakkam beyyo marukko. Ee beyyik summi Ibro'isinne Golgota yamamookko.

¹⁸Ee beyyonne Yesuusa saqalto'o. Yesuus qeddinnee makkinnem lam mancho saqalto'o.

¹⁹Philaaxoosim «Kuk Ayihuxxi manni adil Naazireexxi Yesuusatte» yoo woraqata kitaabaa Yesuus saqalamu masqalanne amaxxansukko.

²⁰Oo Yesuus saqalamu beyyi Yerusaalee'm beero'ina abbis hee'u bikkina lobakat Ayihuxxi manni waatta'a ee kitaabamukkoka qananaa'llo'o. Kitaabamaa hee'ukkokim Ibro'isinnette, Laatii'nnisinnettee Giriikisinnettee hee'ukko.

²¹Ayihuxxi minaadaphphek qeessa awwonsaanim Philaaxoosina «Ixxena ‹Ayihuxxi manni adila› yitaa kitaabbitte. Ihukkaarem ‹Ku manchi «An Ayihuxxi mannina adila» yaakkoohane› yitaa kitaabe» yito'o.

²²Philaaxoosim dabaraa «An kitaabummoka matemaaggem kitaabaammo» yukko.

²³Gaadaanim Yesuusa saqalta'a lasage ixxeka eddechcha massita'a soor beyyi issita'a soor gaadaan baxxanto'o. Hanenne edde'oo qeeraa'l qambiisam massito'o. Oo qambiis hundoomim dadamaakkoohane bagaan gobamoo'n yoohan hee'u bikkina

²⁴ ixxuwwina'i ixxuwwim «Ayyena afooda'e moo'nneena saamo fissinona bagaan kaka dereelloone» yaqqanto'o. Ixxuwwi eehid issito'ok Keesammi Kitaabanne «Iikka eddechcha baxxanto'o. I qambiisinam saamo issaqqanto'o» yamamaa kitaabamukkok wo'mmoo'isinatte.

²⁵Yesuus saqalamu masqa'l gadanonne ixxi ama, ixxi amaayya, Qalophphaasa yakkam manchina are Maaraamee Magdala yakkam beero'i Maaraamee uullita'a hee'llo'o.

²⁶Yesuus ixxi amaa ixxi iittoo losaanchoo ixxi gadanonne uullito'ookkoka moo'aa ixxi amana «Taa meentichche, ki beet oono'o!» yukko.

²⁷Ee losaanchinam «Kiyyumma ootto'o!» yukko. Ee ammaniinsi ki'isaa oo losaanchi Yesuusika ama ixxi mine massukko.

²⁸ Yesuusim hundi luchchim beeddukkisa la'aa Keesammi Kitaabanne kitaabamukkok wo'mmoo'isina «Xeebe'aammo» yukko.

²⁹Ee ammanenne shiishaakkoo woyi'n diqaas wo'mmaakkoo humbulli eekke'enne hee'u bikkina ee beyyonne hee'llo'i keen hallaammi'nnoo'i luwwa ee woyi'n diqaasanne ceffa'a hiisoophpha yakkam luwwaannonne agadanne issita'a ixxi suumenne hincaa'llo'o.

³⁰Yesuus ee shiishu woyi'n diqaasika agu ammanenne «Beeddaakko» yaa horoore qubbaa'aa ixxeka foore uwwaa lehukko.

³¹Yesuus saqalamu balli Usheexxaxxi Ayyaamina gudakkam balli hee'ukko. Oo Usheexxaxxi Ayyaam lobakata lonsakkam balli hee'u bikkina leesh masqalanne hosoobee'isa saqalanto'i kee'nneka lokko iiqqa'a leesha dilliisseena Ayihuxxi manni Philaaxoosa xa'mmito'o.

³²Ee bikkina gaadaan matta'a Yesuusinne maqire saqalanto'i lamem manchikam lokko iiqqo'o.

³³Ihukkaarem Yesuus beyyo matto'i ammanenne lehaakkoo moo'llo'i bikkina ixxeka lokko iiqqo'oyyo.

³⁴Ihona bagaan ee gaadaaniinsi mat Yesuusika midaado bagadinne qasukkaare xiigii wo'ii firukko.

³⁵Eekka moo'ukkok ki'nnuwwi amma'nnitakkamisina ee woshsha kuraakko. Ixxi kuru woshshim hanqa. Ixxi kuru woshshi hanqi ihukkisa ixxi gagim la'ookko.

³⁶ Oo woshshim ihukkok Keesammi Kitaabanne «Ixxi miqik matichchim iiqamooyyo» yamamaa kitaabamukkok wo'mmoo'isinatte.

³⁷ Odim Keesammi Kitaabaannonne mulli beyyonnem «Ixxuwwim qasso'oka moo'llamo» yamamaa kitaabamaakko.

³⁸Ee lasage Armaate'i beero'i Yooseef Yesuusika leesha masseena Philaaxoosa uunxaa Philaaxoos uwwukkaare massukko. Yooseefim Yesuusa awwonaanchi hee'ukko. Ihukkaarem Ayihuxxi manni awwonsaano baddu bikkina Yesuus awwonaanchi hee'ukkok maaxaqqannette hee'ukko.

³⁹ Kanniinsi illageen hiimonne Yesuus beyyo waaraa hee'u Niqoodimoosim sadee mat kiilo'oo ihooqax karbe'e yakkam enja geneeno'inne hamaaramaakkookkoka amadaa waarukko.

⁴⁰Oo lamem manchim Yesuusika leesha massita'a talbiinsi baxamaakkoo danaam eddechchinne Ayihuxxi manni losa'nnisam enja edda'a keefanto'o.

⁴¹Yesuusa saqalakko'i beyyonne kaasakko'oo haqqi hee'ukko. Ee haqqi woronnem ayyim waammamoo'n yoo haareechcho hinakko'oo bar hee'ukko.

⁴²Oo balli Usheexxaxxi Ayyaamina gudakkam balli hee'u bikkinaa oo waammi barim abbis beyyonne hee'u bikkinaa Yesuusa ee barenne waammito'o.