Read Hadiyya Yohaannis Mishiraachcha 2 Bible Online

Yohaannis Mishiraachcha 2 - Hadiyya bible

Yohaannis Mishiraachcha 2

¹Eehanni saxxi ballina Galii'l uullanne yoo Qaana'a yakkam beero'onne bollochcho'i hee'ukko. Yesuusina ama Maaraamem eekke'e hee'llo'o.

²Yesuusim ixxi losaaninne maqirem ee bollochcho'o weeshamaa hee'ukko.

³Bollochcho'i mannina woyi'n diqaas beeddukkaare Maaraame Yesuusina «Woyi'n diqaas beeddaakko» yito'o.

⁴Yesuus isena «Iyyumma, an issoommi luwwa at kuttitte. Iina amman afukkoyyome» yukko.

⁵Yesuus ama awwaadaanina «Ixxi kuroo luwwa maham issehe» yito'o.

⁶Ayihuxxi mannina muccurimmi losan hee'u bikkina aanshaqqakkam wo'o issimmina kiniinsi baxamaakkoo loh jaalo'uwwi eekke'e hee'ukko. Oo jaalo'uwwi annannichchim tommi wo'i harachcho[3] amadoohan hee'ukko.

⁷Yesuus ee awwaadaanina «Jaalo'uwwanne wo'o wonshehe» yukko. Ixxuwwim jaalo'uwwanne wo'o ciffaa'lla'a wonshito'o.

⁸Ixxi ee awwaadaanina «Huno'llehe, hoffokam inkiittakka'a bollochcho'i maadda egeraanchina massitakka'a uwwehe» yukkaare ixxuwwim massita'a uwwito'o.

⁹Oo bollochcho'i maadda egeraanchim gubbaa moo'u ammanenne woyi'n diqaasanne daba'llaa hee'ukko. Ixxim oo woyi'n diqaas hanniinsi waaruda'e la'ukkoyyo. Ihukkaarem wo'o inkiitto'i keen laqqa'a hee'llo'o. Bollochcho'i maadda egeraanchi bollochcho'i annichcho weeshaa

¹⁰«Ayyi manchim gaassaa illichchi woyi'n diqaasa uwwaa manni agaa goddaa lasage qiraare'e uwwookko. Ihukkaarem at illichchom kabad afeebe'e uwwittoyyo» yukko.

¹¹Yesuus Galiilanne Qaana'a yakkam beero'onne ka luxxi maalalsiisoo mare'e issaa ixxi lomba moo'isukko. Ixxi losaanim ixxonne amma'nnito'o.

¹² Ee lasage Yesuus ixxi amanne, abbaayyuwwinnee ixxi losaaninnee maqirem Qifirinnaahoom beero'o dillaa ee beyyonne hofqax ballam afuurukko.

¹³ Ayihuxxi mannik Shaashshiqqi Ugud hincaakkoohaannonne Yesuus Yerusaaleema marukko.

¹⁴Ixxim Keesammi Minenne diinate dabassitam keenii labeennuwwa, gereebbaa handare'ee biteessam keenii daddattu'uuyyi moo'aa

¹⁵jiraafa dadaa ee jiraafinne gereebbaa labeennuwwaa hundam Keesammi Miniinsi fissukko. Diinate dabassitam kee'n xaraphpheezam qubbaa'aa ixxuwwi diinate fincukko.

¹⁶Odim handare'e biteessam keeninam «Kaka ka beyyiinsi fissitakka'a hoollehe! Iyyanni mine dadda'l min issitakkotte» yukko.

¹⁷ Ee ammane ixxi losaan Keesammi Kitaabanne «Ki mi'n to'achchi eese gii'llisa shokkiisukko» yamamaa kitaabamukkoka sawwito'o.

¹⁸Ee lasage Ayihuxxi manni ixxena «Kaka issitoo malaayyi kiina yoo'isa moo'isoo mare'i maruwwa?» yito'o.

¹⁹ Yesuus ixxuwwina dabaraa «Ka Keesammi Mine ginditakkolas an sas ballanne dabaraa baxoommo» yukko.

²⁰Ayihuxxi mannim dabatta'a «Ku Keesammi Min baxamaa beeddukkok sorennee loh hiinchonnette. At sas ballanne dabattaa baxxoohonnihe?» yito'o.

²¹Ihukkaarem Yesuus «Keesammi Mine» yaa wocukkok ixxi gaqqi bikkinatte hee'ukko.

²²Yesuus lehiinsi ki'aa lasage ixxi losaan eekka sawwita'a Keesammi Kitaabanne kitaabamukkokaa Yesuus wocukkokaa amma'nnito'o.

²³Ee ugudanne Yesuus Yerusaaleemanne hee'ukkuuyyi maalalsiisoo mare'uwwa issukkoka moo'lla'a lobakat keen ixxonne amma'nnito'o.

²⁴Ihukkaarem Yesuus manni hundam la'am hee'u bikkina ixxuwwa amma'nnukkoyyo.

²⁵Ixxi manni wodanonne yoo luwwa la'am hee'u bikkina ayyi manchim manni bikkina ixxena kurona hasam hee'ukkoyyo.